މުޅި ރާއްޖޭގައިވެސް، ބޮޑުވެފައި ހުރި ހުރިހާ މައްސަލަތައް ހައްލު ކުރުމަށް މަސައްކަތް ފަށާފައިވާ ކަމަށާއި، މި އަހަރުގެ މިހާތަނަށް 655 ކިލޯގެ މަސްތުވާތަކެތި އަތުލައިގަނެފައިވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އއ. ރަސްދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ ޑުރަގުގެ ވަބާ ކަމަށާއި، މިއީ ގައުމުގައި ޒަމާންތަކެއްވީ ބޮޑު މައްސަލައެއް ކަމަށެވެ. ރައީސް މުއިއްޒު ވިދާޅުވީ ކޮންމެ ރަށެއްގައި، ކޮންމެ މުޖުތަމައެއްގައި އެ މައްސަލަ އެބައޮތް ކަމަށާއި، ރައްޔިތުން އެމައްސަލަ ހައްލުކުރަން ބޭނުންވާ ކަމަށެވެ. އަދި ޒުވާނުންވެސް އެކަމުން ދުރުކޮށްގެން، ބޭނުންތެރި، ބިނާކުރަނިވި، ފައިދާހުރި ބަޔަކަށް ހަދަން މައިންބަފައިންވެސް ބޭނުންވާ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ ރާއްޖޭ ރީތި ނަމެއްގެ ގޮތުގައި ބޭރަށް ވިއްކެންވެސް އޮތީ ވެސް މި ގައުމުގައި ހަމަޖެހުން ގާއިމްކޮށް، ސްޓެބިލިޓީ އޮތް، ރައްކާތެރި، އަމާން ގައުމަކަށް ހެދިގެން ކަމަށާއި، އެކަން ކުރެވޭނީ ޑުރަގުގެ ވަބާއިންވެސް ދުރަށް ގޮސްފައިވާ، ބިނާކުރަނިވި މުޖުތަމައެއް ގާއިމް ކުރެވިގެން ކަމަށް ރައީސް މުއިއްޒު ވިދާޅުވިއެވެ.
މިމައްސަލަ ހައްލު ކުރުމަށް ޚާއްސަ އިސްކަމެއްދީފައިވާކަން ފާހަގަކުރައްވައި ރައީސް މުއިއްޒު ވިދާޅުވީ ޑުރަގުގެ ވިޔަފާރީގައި އުޅޭ ބޭރު މީހުން ރާއްޖޭގައި ވަރަށްގިނަ ކަމަށާއި، މިދިޔަ އަހަރުގެ ތެރޭގައި 153 ބޭރު މީހުން ޑުރަގާ އެކީގައި ހިފައި 153 މީހުން ޑީޕޯޓުކޮށްފައިވާ ކަމަށެވެ. ރައީސް މުއިއްޒު ވިދާޅުވީ ޑުރަގުގެ ވިޔަފާރި ކުރާ ނުވަތަ ޑުރަގް ބޭނުންކުރާ ތަންތަން ސަރޗް ކުރުންވެސް އިންތިހާއަށް އިތުރުކޮށްފައިވާ ކަމަށެވެ. އެގޮތުން، މި ނިމިގެންދާ އަހަރު، 13435 ތަނެއް ބަލައި، އެކަމުގައި އުޅޭ ފަރާތްތައް ހޯދާފައިވާ ކަމަށެވެ.
ޑުރަގުގެ ވިޔަފާރީގައި އުޅޭ ބޭރު މީހުން ރާއްޖޭގައި ވަރަށްގިނަ. އަދި މީގައި ގިނައީވެސް ނުގަވާއިދުން އުޅޭ ބޭރު މީހުން. އަޅުގަނޑުމެން ވާނީ މިދިޔަ އަހަރުގެ ތެރޭގައި، 153 ބޭރު މީހުން، ޑުރަގާ އެކީގައި ހިފައި، އެ މީހުންގެ މައްސަލަ ބަލައި، ޑީޕޯޓް ކޮށްފައި. 153 މީހުން. އޭގެ ކުރީ އަހަރުގެ ތެރޭގައި، 2023ގެ ނޮވެންބަރާ ހަމައަށް، މިދިޔަ އަހަރުގެ ނޮވެންބަރާ ހަމައަށް 74 މީހުން ޑީޕޯޓް ކޮށްފައި ވަނީ. އެހެން ނަމަވެސް، އަޅުގަނޑުމެން އެކަމަށް ދިން އިސްކަމުގެ ތެރެއިން، މި އަހަރުގެ ތެރޭގައި 153 މީހުން ވަނީ ޑިޓެއިން ކުރެވި އަދި ޑީޕޯޓް ކުރެވިފައި. އަޅުގަނޑުމެން ވާނީ ޑުރަގުގެ ވިޔަފާރި ކުރާ، ނޫނީވިއްޔާ ޑުރަގް ބޭނުންކުރާ ތަންތަން ސަރޗް ކުރުންވެސް އިންތިހާއަށް އިތުރުކޮށްފައި. އެގޮތުން، މި ނިމިގެންދާ އަހަރު، 13435 ތަނެއް އަޅުގަނޑުމެން ބަލައި، އެކަމުގައި އުޅޭ ފަރާތްތައް ވާނީ ހޯދާފައި. އެއީ، އޭގެ ކުރީ އަހަރާ ބަލާއިރުގައި 8581. ގާތްގަނޑަކަށް ދެގުނަ. ދެގުނައަށްވުރެ ތަންކޮޅެއް މަދު. މާނައަކީ އަޅުގަނޑުމެން ވަރަށް އިސްކަން އެބަދެމޭ، މި މައްސަލަ ހައްލުކުރަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
އަތުލައިގަނެފައިވާ މަސްތުވާތަކެއްޗަށް އިޝާރާތް ކުރައްވައި ރައީސް މުއިއްޒު ވިދާޅުވީ މިއަހަރުގެ މިހާތަނަށް 655 ކިލޯގެ މަސްތުވާތަކެތި އަތުލައިގަނެފައިވާ ކަމަށާއި، މިތަކެތި ނައްތާލާނީ ނޫސްވެރިންގެ ކުރިމަތީގައި ކަމަށެވެ.
ހަމައެއާއެކީގައި ކޮންފިސްކޭޓް ކުރެވުނު ޑުރަގުގެ އަދަދަށް ބަލާއިރު، މި އަހަރު 655 ކިލޯގެ ޑުރަގް އަޅުގަނޑުމެން ކޮންފިސްކޭޓް ކޮށްފިން. އެ ތަކެތި ނައްތާލަނީ. ނައްތާލަނީވެސް ނޫސްވެރިންގެ ކުރިމަތީގައި. މިދިޔަ އަހަރު، 2023ގެ ނޮވެންބަރާ ހަމައަށް، ކޮންފިސްކޭޓް ކޮށްފައި ވަނީ، އެންމެ 113 ކިލޯ. އެހެންވީމާ، ހަގުނަ އިތުރަށް އަޅުގަނޑުމެން މި އަހަރުގެ ތެރޭގައި ޑުރަގް ކޮންފިސްކޭޓް ކޮށްފިން. އާދެ، މިއީ ޑުރަގުގެ އަގަށް ބަލާއިރުގައިވެސް ބޮޑު ޢަދަދެއް. މި އަހަރުގެ ތެރޭގައި އަޅުގަނޑުމެން ކޮންފިސްކޭޓް ކުރި ޑުރަގުގެ އަގު އެއީ، 1.3 ބިލިއަން ރުފިޔާ. އެއްހާސް ތިންސަތޭކަ މިލިއަން ރުފިޔާގެ ޑުރަގް ކޮންފިސްކޭޓް ކުރިއިރުގައި، މިދިޔަ އަހަރު ނޮވެންބަރާ ހަމަޔަށް ކޮންފިސްކޭޓް ކުރީ، އޭގެ ގާތްގަނޑަކަށް ހަގުނަ މަދު، 255 މިލިއަން ރުފިޔާގެ ޑުރަގް. މިއީ އަޅުގަނޑުމެން މި މައްސަލަ ޙައްލުކުރުމަށްޓަކައި ކުރަމުންދާ މަސައްކަތް. މިހާރު ފުލުހުންގެ އިދާރާގެ ތެރެއިން، އަދި އިމްޕްލިމެންޓް ކުރުމުގެ މަސައްކަތުގައި އުޅޭ އިދާރާތަކުގެ ތެރޭގައި، މިކަމުގައި ކޮމްޕްރޮމައިޒް ވެފައި ތިބޭ މީހުންނެއް ނުތިބޭނެ. އަޅުގަނޑުމެން މި އިސްކަންދެނީ، މިކަން ހަގީގީ މާނައިގައި ހައްލުކުރުމަށް.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒު ވިދާޅުވީ ގައުމު ތަރައްގީ ކުރުމަށް ކުރާ މަސައްކަތްތަކާއި، ބޮޑެތި މައްސަލަތައް ހައްލުކުރުމަށް ކުރާ މަސައްކަތުގައި ރައްޔިތުންގެ އެހީތެރިކަން ބޭނުންވާ ކަމަށެވެ. އަދި ވިދާޅުވީ އެ އެހީތެރިކަމާއި، އެ އެއްބާރުލުމާ އެކީގައި މަސައްކަތް ކުރުމުން މި ގައުމުގައި ހުރި ބޮޑެތި މައްސަލަތައް ހައްލުވާނެ ކަމަށް ރައީސް މުއިއްޒު ވިދާޅުވިއެވެ.
