ޒަކިއްޔާގެ މަރުގެ ތަހުގީގުގައި ބޮޑެތި ކަންބޮޑުވުންތަކެއް، ކޮންމެ ލަސްވުމަކީ ނުތަނަވަސް ކަމެއް ކަމަށް ބުނެ ރައްޔިތުން މަގުމައްޗަށް

ޒަހަމްތަކަކާއެކު މަރުވެފައި އޮއްވާ ފެނުނު ނ.ހޮޅުދޫ، ޒަކިއްޔާ މޫސާގެ މަރުގެ ތަހުގީގުގައި ހުރި ކަންބޮޑުވުންތައް ހާމަކޮށް އެ މައްސަލާގައި އިންސާފު ހޯދައިދިނުމަށް ގޮވާލާ ހޮޅުދޫގައި ބޮޑު އެއްވުމެއް ބާއްވައިފިއެވެ.

ހުކުރު ދުވަހުގެ ހަވީރު ހޮޅުދޫގައި ބޭއްވި މި އެއްވުމުގަައި އެރަށުގެ ގިނަ އަދަދެއްގެ ރައްޔިތުންވަނީ ބައިވެރިވެ އަޑު އުފުލާފައެވެ.

ރަށުގެ ގިނަ ރައްޔިތުން ބައިވެރިވި މި އެއްވުމުގައި ޒަކިއްޔާއަށް އިންސާފު ހޯދާއިދިނުމަށާއި، ތަހުގީގުގައި ހުރި ގިނަ ކަންބޮޑުވުންތައް ފާހަގަކޮށްފައިވެއެވެ.

މި އެއްވުމުގައި، ޒަކިއްޔާގެ މަރުގެ ތަހުގީގާ ގުޅޭގޮތުން ފުލުހުން ހާމަ ކުރި މައުލޫމާތުތަކުގައި ސުވާލު އުފެދޭ އެތައް ކަމެއް ހުރިކަން ފާހަގަކޮށް ބޯޑުތަކުގައި ޝުޢޫރުފާޅުކޮށްފައިވެއެވެ. އެގޮތުން ކޮންމެ ލަސްވުމަކީ ނުތަނަވަސް ކަމެއް ކަމަށާއި، ރައްޔިތުން ގުނބޯ ހައްދަން ނޫޅުއްވުމަށް ގޮވާލާފައިވެއެވެ. ހަނު ނުތިބޭނެ ކަމަށާއި، އިންސާފު ހޯދައިދިނުމަށް ގޮވާލާފައިވެއެވެ. އަދި ވެ ނިމިގެން އުޅެނީ "ހަމަ އެހާ ކުޑަ" ކަމެއްތޯ އާއި، ވަޅީގައި އޭރު ނެތް ލެ އެއް ފޮޓޯގައި ހުރީ ކީއްވެތޯ އާއި ހުރިހާ ކަމެއް ކަށަވަރު ކުރީ ގޭގައި ތިބި މީހުންގެ ބާޔާނުން އެކަނިތޯ ވަނީ ސުވާލު އުފައްދާފައެވެ.

މި އަނިޔާވެރި މަރުގެ ތަހުގީގު އަވަސްކުރުމަށް ގޮވާލާ ބޭއްވި މި އެއްވުމުގެ ބައިވެރިން ތިބީ ކަޅު ހެދުމުގައެވެ. އަދި ކޮންމެ މީހެއްގެ މޫނުމަތިން ފެނުނީ ހިތްދަތިކަމާ ނުތަނަވަސް ކަމެވެ. ރަށުގެ އާބާދީއެއް އޮތްގޮތަށް މި އެއްވުމުގައި ބައިވެރިވެ ޝުއޫރު ފާޅުކޮށްފައިވާއިރު، އެންމެ ބޮޑަށް ފާހަގަކުރި އެއްކަމަކީ އެންމެ ފަހުން ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ފާހަގަކުރި ކަންކަން ސާފުނުވުމާއި، މި މައްސަލައިގައި ފުލުހުންގެ އިހުމާލު އޮތް މިންވަރެވެ.

އެއްވުމުގައި ވާހަކަ ދެއްކި ޒަކިއްޔާގެ އާއިލާގެ މީހަކު ބުނީ، މިއީ މުޅި ރާއްޖޭގެ ރައްޔިތުންގެ ކަންބޮޑުވުމެއް ކަމަށާއި، އެއީ އަމިއްލަ މަރެއް ނޫން ކަމަށެވެ. އެމަރުގެ ފަހަތުގައި ފޮރިވިފައިވާ ކަންތައްތަކެއް ވާކަން ފާހަގަކޮށް އޭނާ ބުނީ، ހަށިގަނޑުން ފެނުނު ޒަޚަމްތަކުން އެކަން ވަރަށް ރަނގަޅަށް އިނގޭ ކަމަށެވެ.

އޭނާ ބުނި ގޮތުގައި ޒަކިއްޔާ އަމިއްލަ އަށް މަރުނުވާނެ ކަން ހޮޅުދޫ ރައްޔިތުން ވެސް ގަބޫލު ކުރެއެވެ. އެކަމަކު ފުލުހުންނަކަށް އެކަން ނުހޯދުނު ކަމަށް އޭނާ ފާހަގަ ކުރިއެވެ.

ޑިސެމްބަރު މަހުގެ 3 ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މުހައްމަދު ސާމިހު ވިދާޅުވީ ޑޮކްޓަރުގެ މައުލޫމާތުން ޒަކިއްޔާ މަރުވާން ދިމާވި ސަބަބެއްގެ ގޮތުގައި ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކުގެ ސަބަބުންކަން އެނގޭ ކަމަށެވެ.

އެހެންކަމުން މިހާތަނަށް ތަހުގީގުން ހޯދުނު ހޯދުންތަކުން ޒަކިއްޔާއަށް ލިބިފައިވާ އަނިޔާގެ ޒަޚަމްތަކަކީ ނުވަތަ ޒަކިއްޔާ މަރުވެފައިވަނީ އިތުރު އެއްވެސް ފަރާތެއްގެ އަމަލެއްގެ ސަބަބުން ދޭހަކޮށްދޭނެ އެއްވެސް ހެއްކެއް ފެންނަން ނެތުމާއެކު އެ މައްސަލާގައި އިތުރު މީހެއްގެ ބައިވެރިވުމެއް އޮތްކަން މިހާތަނަށް ތަހުގީގަށް ފާހަގަކުރެވިފައި ނުވާކަމަށް ސާމިހު ވިދާޅުވިއެވެ.

ޒަކިއްޔާގެ ވާތް ފަރާތުގައި ފުން ތިން ޒަހަމެއް، އަދި ކަނާތް ފަރާތުގައި ފުން ދެ ޒަހަމެއްގެ އިތުރުން ކަރުގެ މެދާ ހިސާބުން ތިލަކޮށް ހުރި އެއް ޒަހަމު ހުރިކަން ފާހަގަ ކުރެވުނު ކަމަށް އެ ނޫސްވެރިންގެ ބައްދަލުވުމުގައި ސާމިހު ވިދާޅުވިއެވެ.

ޒަކިއްޔާ މަރުވެފައި އޮއްވައި ފެނުނީ ސެޕްޓެމްބަރު މަހުގެ 10ވަނަ ދުވަހުގެ ހެނދުނުގެ ވަގުތެއްގައެވެ. މި މައްސަލާގައި އޭނާ މަރާލި ކަމަށާއި އެކަމުގައި އިންސާފު އަވަސްކޮށްދިނުމަށް އެދި ހޮޅުދޫގައި ނޮވެމްބަރު 25 ވަނަ ދުވަހު ވެސް ވަނީ އެއްވުމެއް ބާއްވާފައެވެ.