މީހުންނަށް އިންޒާރު ދިނުމުގެ ނުރައްކާތެރި ކަމުގެ ވާހަކަ ދާޚިލީ ވަޒީރު ދައްކަވާއިރު، ސަރުކާރުގެ ވަށައިގެން ތިއްބެވީ މިޒާތްޒާތުގެ ބޭފުޅުން ނޫންތޯއެވެ؟

މި ދުވަސްވަރަކީ ޓްވީޓެއްގެ މައްސަލަ ބޮޑުވެގެން އުޅޭ ދުވަސްވަރެކެވެ.

ޓްވީޓްކޮށްގެން އުޅެނީ އިދިކޮޅު ޕާޓީގެ މެމްބަރެކެވެ.

ޓްވީޓުގައި އޮތީ އެއްޗެއް އަގު ބޮޑުވެގެން އެ ގަތުމަށްފަހު ހިތްހަމަ ނުޖެހިގެން ކޮށްފައިވާ ޕޯސްޓެކެވެ.

އޭގައި އޮތީ ކޮންމެވެސް ކައްޒާބެއްގެ ވާހަކައެކެވެ.

ދެން އޮތީ ބޮޑު އަގުގައި އެބުނާ ފޮއްޓެއް ގަތްވާހަކައެވެ. ދެން އޮތީ "ކަލޭ މަށަށް މަގުމަތިން ނުފެންނާށޭ" މިހެންނެވެ.

ޓްވީޓް ކުރި މީހާ ޕޮލިހަށް ހާޒިރުކުރުވުމަށް ޗިޓް ފޮނުވުމާއެކު ސިޔާސީ ފާރާތްތަކުން އެކަމާ ދެކޮޅަށް ޓްވީޓް ކުރަން ފެށިއެވެ. މިތަނުން އެއް ޓްވީޓަކަށް ރައްދުދެއްވާ ދާޚިލީ ވަޒީރު ޓްވީޓެއް ކުރައްވައިފިއެވެ. އޭގައި އޮތީ މީހަކަށް އިންޒާރެއް ދީފި ނަމަ އެކަން ބަލާނެ ކަމަށެވެ. އެބުނާ ޓްވީޓަކުން މީހަކަށް ނުރައްކާ ވެއްޖެ ކަމަށެވެ. ކޮންމެ ކަމެއް ސިޔާސީ ނުކުރުމަށެވެ. މިހާ ހިސާބުން އުފެދުނު ސުވާލަކީ އިންޒާރު ދިނީ ކާކަށް ބާވައެވެ. ނުރައްކާވީ ކާކަށް ބާވައެވެ. މައްސަލަ ހުށަހެޅީ ކާކު ބާވައެވެ. ދާޚިލީ ވަޒީރު މި ދައްކަވަނީ ކާކުގެ ވާހަކަ އެއް ބާވައެވެ.

އެބުނާ ޓްވީޓެއްގައި ލިޔެފައި އޮތް ކައްޒާބު ފުލުހުންނާ ދާޚިލީ ވަޒީރު ރައްދު ކުރައްވަނީ ކާކަށްބާވައެވެ. ނުރައްކާވި މީހެއް އިނގޭނީ ފުރަތަމަ ކައްޒާބަކީ ކާކުކަން އެނގިގެން ނޫންތޯއެވެ. އެއަށްވުރެ ބޮޑަށް އާއްމު ރައްޔިތުން އުފައްދަމުންދާ އެއް ސުވާލަކީ މިބުނާ ޓްވީޓެއް މިހާ ނުރައްކާތެރި އެއްޗަކަށްވެ މީހެއްގެ ފުރާނަޔަށް ނުރައްކާ ވާވަރުގެ މައްސަލަ އަކަށް މިކަންވެ ކޮންމެ ރައްޔިތެއްގެ ދިފާއުގައި އަދި ހިމާޔަތުގައި ފުލުހުން މަސައްކަތް ކުރާނެ ކަމަށް ދާޚިލީ ވަޒީރު ވިދާޅުވެ، ފުލުހުން ލައްވާ މިކަން ތަހުގީގުކުރަން ފެށި އިރު ދާޚިލީ ވަޒީރުވެސް ހިމެނިވަޑައިގަންނަވާ ސަރުކާރުގެ ސިޔާސީ މަގާމު ތަކުގައި ތިއްބެވި ބޭބޭފުޅުންގެ ފަރާތުން އެހެން މީހުންނަށް ކުރިމަތިކުރުވި ތްރެޓް ތަކުގެ މައްސަލަ ފުލުހުން ލައްވާ ބައްލަވަން ދާޚިލީ ވަޒީރު ނޫޅުއްވާ ހުންނަވަނީ ކީއްވެގެންބާވައެވެ.

މިސާލަކަށް މި ސަރުކާރުގެ ކުރީގެ ޑެޕިއުޓީ މިނިސްޓަރެއްގެ މަގާމުގައި ހުރި އަންހެނަކު ރައީސް މުއިއްޒުގެ ފަހަތްޕުޅުގައި ހުރެގެން އޭރުގެ ރައީސް އިބްރާހިމް މުޙައްމަދު ސާލިޙްގެ ފުރާނައަށް ގެއްލުންދީ ލޭ އޮހޮރުވާލައިގެން ވިއަސް ވެރިކަމުން ބާލަންޖެހޭ ކަމަށް ހުތުރު ބަހުން ލިޔެ ކޮށްފައިވާ ޓްވީޓް އޯކޭ ވެފައި ފަހުން މި ކުރި ޓްވީޓް އޯކޭ ނުވަނީ ކީއްވެތޯއެވެ. އެއްކޮޅަށް ހުންނަ މީހާ ކޮށްފިއްޔާ ކޮންމެ ކަމެއްވެސް ހަމަ ވަރިހަމަ ވަނީ ނޫންތޯއެވެ.

ހަމަ މިބުނާ މީހާ މި ސަރުކާރުގެ ޑެޕިއުޓީ މިނިސްޓަރުގެ މަގާމުގައި ހުރެގެން އަވައްޓެރި އިންޑިއާގެ ބޮޑުވަޒީރަށް ތްރެޓްކޮށް ހަޑިހުތުރު އެއްޗެހި ގޮވާ ކުރި ޓްވީޓްތަކުގެ ސަބަބުން އިންޑިއާގައި ދިރިއުޅެމުން ދިއަ އަދި އިންޑިއާއަށް ދަތުރުކުރި ދިވެހި ރައްޔިތުންގެ ސަލާމަތަށް ނުރައްކާވެ ރާއްޖޭގެ އިގްތިސާދަށް ދެ ބިލިއަށް ޑޮލަރުގެ ބޮޑު ގެއްލުމެއް ލިބުނު މައްސަލަ ދާޚިލީ ވަޒީރު ބައްލަވާލެއްވުން ކިހިނެއް ވާނެތޯއެވެ.

އަދި ހަމަ މިއާއި އެކު މި ސަރުކާރު ހިންގާ ޕާޓީގެ ޗެއަރޕާސަންގެ މަގާމުގައި ހުންނެވި އަބްދުލްރަހީމް އަބްދުﷲ އިދިކޮޅުގައި ހުންނަވައިގެން އެމްއެންޑީއެފްގެ ތެރެއަށް ވަދެގަތުމަށާއި ޑިފެންސް މިނިސްޓަރ ދަމާ ނެރުމަށާއި ރައީސް އޮފީސް ތެރެއަށް ވަދެގަތުމަށާއި، އެތަނަށް ވަދެ ރައީސް ސާލީޙް ދަމާ ނެރުމަށް ވިދާޅުވެ ޕޯޑިއަމްތަކުގައި އެބޭފުޅުންގެ ފުރާނަ އަށް ނުރާއްކާވާ ގޮތަށް ތްރެޓް ކޮށް ދައްކަވާފައި ހުރި ވާހަކަތަކުގެ މައްސަލަ ދާޚިލީ ވަޒީރު ބައްލަވާލެއްވުން ކިހިނެއްވާނެތޯއެވެ. އަދި ހަމަ އޭރުގެ ޑިފެންސް މިނިސްޓަރ މާރިޔާދީދީގެ ގެކޮޅު ދޮށަށް ވަޒީރު ނިސްބަތްވެވެޑައިގަންނަވާ އޭރުގެ އޮޕޮޒިޝަންގެ މީހުން ގޮސް ޑިފެންސް މިނިސްޓަރުގެ ފުރާނައަށް ގެއްލުން ދިނުމަށް ގޮވާ ހަޑިހުތުރު އެއްޗެހި ގޮވި މައްސަލަ މިއަދު ދާޚިލީ ވަޒީރު ބައްލަވާލެއްވުން ކިހިނެއް ވާނެތޯއެވެ.

ގައުމުގެ އަމާންކަމަށާއި ސުލްހަ މަސްލަސްކަމުގެ ވާހަކަޔާ ރައްޔިތުންގެ ފުރާނަޔާ ހަށިގަނޑުގެ ރައްކާތެރިކަމުގެ ވާހަކަ އާއި މީހުންނަށް އިންޒާރު ދިނުމުގެ ނުރައްކާތެރި ކަމުގެ ވާހަކަ ދާޚިލީ ވަޒީރު ދައްކަވާއިރު، ވަޒީރު ހުންނެވި ސަރުކާރުގައި ވަށައިގެން ތިއްބެވީ މިޒާތްޒާތުގެ ބޭފުޅުންކަމާއި، އެބޭބޭފުޅުންގެ މައްސަލައެއް ބަލާލުމުގެ ގާބިލުކަން ވަޒީރަށް ލިބިވަޑައިނުގަންނަވާކަން އެއީ ހަޤީގަތް ނޫންތޯއެވެ.

ދަންނަންތޯއެވެ؟ އަދުލާއި ހަމަހަމަކަން ނެތް ތަނެއްގައި އެއްވެސް ހަމަ ޖެހުމެއް ނޯންނާނެއެވެ. ހަމަހަމަކަން ބާއްވަަަވަން އުޅުއްވާ ނަަމަ ދުވަސްވެފައި ހުރި މިދެންނެވި މައްސަަލަތަކުން ފައްޓަވާށެވެ. އެކަމަކު އެކަމެއް ނުވާނެއެވެ. ނުވެސް ކުރެވޭނެއެވެ.