ތިން ވަނަ މެޗުން ވެސް މޮޅުވެ، ފުވައްމުލައް ދެ ވަނަ ބުރަށް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގައި ކުޅުނު ތިން ވަނަ މެޗުން ވެސް މޮޅުވެ، ފުވައްމުލައް ސިޓީން މުބާރާތުގެ ދެ ވަނަ ބުރުގެ ޖާގަ ކަށަވަރު ކޮށްފި އެވެ.

މުބާރާތުގެ ގުރޫޕު އޭގައި ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި ފުވައްމުލަކުން ވަނީ ދ.މީދޫގެ މައްޗަށް 4-0 އިން ކުރި ހޯދައިފަ އެވެ. މެޗުގެ ފުރަތަމަ ހާފުގައި ފުވައްމުލަކުން ވަނީ ދެ ލަނޑު ޖަހައިފަ އެވެ. އަދި އަނެއް ދެ ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގައި ފުވައްމުލަކުގެ ދެ ލަނޑު ވެސް ޖެހީ އަލީ ޝަމާލް ޢަބްދުﷲ އެވެ. މެޗުގެ ދެ ވަނަ ހާފުގައި ފުވައްމުލަކުގެ ތިން ވަނަ ލަނޑު ޖެހީ އިނާން އަޙުމަދު އެވެ. އެ ލަނޑު އޭނާ ޖެހީ ޝަމާލް ހުރަސްކޮށްދިން ބޯޅައެއް އެއް ފަހަރުން ގޯލަށް ފޮނުވާލައިގެންނެވެ. މެޗުގެ އެންމެ ފަހު ވަގުތުގައި ފުވައްމުލަކަށް ލިބުނު ޕެނަލްޓީ ކާމިޔާބުކޮށް، ޝަމާލް ވަނީ މެޗުގައި އޭނާގެ ހެޓްރިކް ހަމަކޮށްފަ އެެވެ.

ނަތީޖާ އާއެކު ފުވައްމުލަކުން މުބާރާތުގެ ދެ ވަނަ ބުރުގެ ޖާގަ ހޯދިއިރު، މިހާތަނަށް ކުޅުނު ތިން މެޗުން ވެސް މޮޅުވެ އެ ޓީމު އޮތީ މި ގުރޫޕުގެ އެއްވަނައި ގައެވެ. ދެ ވަނައިގައި އޮތް ކުޑަހުވަދޫ އަށް ދެ މެޗުން ލިބެނީ ތިން ޕޮއިންޓެވެ. ތިން ވަނައިގައި މީދޫ އަށް ވެސް ލިބެނީ ތިން ޕޮއިންޓެވެ.