ފަރެސްމާތޮޑާ އަތުން ކުޑަހުވަދޫ އަށް މުހިންމު މޮޅެއް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ގދ.ފަރެސްމާތޮޑާއާ ދެކޮޅަށް ކުޅުނު މެޗުން މޮޅުވެ، ދ.ކުޑަހުވަދޫ އިން މުބާރާތުގައި މުހިންމު މޮޅެއް ހޯދައިފި އެވެ.

ގަލޮޅު ރަސްމީ ދަނޑުގައި އަންގާރަ ދުވަހުގެ ހަވީރު މި ދެ ޓީމު ބައްދަލު ކުރިއިރު، ދެ ޓީމު ވެސް ވަނީ ކުޅުނު ފުރަތަމަ މެޗުން ބަލިވެފަ އެވެ. އެހެންކަމުން އެ މެޗުން މޮޅުވުން ދެ ޓީމަށް ވެސް އޮތީ މުހިންމުވެފަ އެވެ. އެ މެޗުގައި ކުޑަހުވަދޫ އިން ފަރެސްމާތޮޑާގެ މައްޗަށް ކުރި ހޯދީ 3-0 އިންނެވެ.

މެޗުގެ ފުރަތަމަ ހާފުގައި ވެސް ކުޑަހުވަދޫ އިން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. ނަމަވެސް މެޗުގައި ކުޑަހުވަދޫ އިން ތިން ލަނޑު ވެސް ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ވަރަށް ކުރީ ކޮޅު ކުޑަހުވަދޫ އަށް ލީޑު ލިބުނީ ފަރެސްމާތޮޑާ ކުޅުންތެރިޔެއް އަތުން ބައި ކޮޅަށް ވަތް ލަނޑުންނެވެ. އެއީ ކުޑަހުވަދޫގެ މުޙައްމަދު ޒިހާން ޙުސެއިން ފޮނުވާލި ބޯޅަ، ކުޅުންތެރިޔާގެ ގައިގައި ޖެހިފައި ގޯލަށް ވަދެގެންނެވެ. އޭގެ ފަހުން މެޗުގައި ކުޑަހުވަދޫގެ ދެ ވަނަ ލަނޑު ޖެހީ ޒިހާން އެވެ. މެޗުގައި ކުޑަހުވަދޫގެ ތިން ވަނަ ލަނޑު ޖަހަން ޒިހާން ފޮނުވާލި ބޯޅަ ގޯލަށް ވަނީ ފަރެސްމާތޮޑާގެ ގޯލު ކީޕަރުގެ އަތުގައި ޖެހިފަ އެވެ.

މި މެޗުގައި ކުޑަހުވަދޫ އިން ކުޅެފައި ވަނީ އެ ޓީމުގެ މުޙައްމަދު ސައިފް އަދި އަޙުމަދު ރިޟްވާން ނުލަ އެވެ. އެއީ ފުރަތަމަ މެޗުގައި ފުވައްމުލައް ސިޓީއާ ދެކޮޅަށް ކުޅުނު މެޗުގައި ދެ ކުޅުންތެރިންނަށް ދެއްކި ރަތް ކާޑުގެ ސަބަބުންނެވެ.

މޮޅާއެކު ކުޑަހުވަދޫ އިން އޮތީ ގުރޫޕު އޭގެ ތިން ވަަނައިގަ އެވެ. އެއީ މިހާތަނަށް ކުޅުނު ދެ މެޗުން ތިން ޕޮއިންޓާ އެކު އެވެ. މި ގުރޫޕުގެ އެއް ވަަނައިގައި އޮތީ ދެ މެޗުން ވެސް މޮޅުވެފައިވާ ފުވައްމުލައް ސިޓީ އެވެ. ދެ ވަނައިގައި ދ.މީދޫ އަށް ތިން ޕޮއިންޓު ލިބެނީ އެއް މެޗު ކުޅެގެންނެވެ.