ނިއުޝާ އާއި ފިލްޒާ އަދި ތަލްޙަތު މަގާމަށް އަލުން އައްޔަން ކުރުމަށް މަޖިލީހުން ފާސްކޮށްފި
ނިއުޝާ އަމީން އާންމުގެ މަޤާމުގައި ބެހެއްޓުމަށް 79 މެންބަރުން ވޯޓު ދެއްވި
މަޖިލީހުގެ އަމީން އާއްމު ފާތިމަތު ނިއުޝާ އާއި ކައުންސެލާ ޖެނެރަލް ފާތިމަތު ފިލްޒާ
ރައްޔިތުންގެ މަޖިލީހުގެ އަމީން އާއްމުގެ މަޤާމުގައި ހުންނެވި ފާތިމަތު ނިއުޝާ، ކައުންސެލް ޖެނެރަލްގެ މަޤާމުގައި ހުންނެވި ފާތިމަތު ފިލްޒާ އަދި ސާޖެންޓް އެޓް އާމްސްގެ މަޤާމުގައި ހުންނެވި މޭޖަރ ރިޓަޔަރޑް ތަލްޙަތު ޙަސަން އެ މަގާމުގައި ބައިތިއްބަން މަޖިލީހުން ފާސްކޮށްފިއެވެ.
މަޖިލީހުގެ ގަވައިދުގައިވާ ގޮތުގެ މަތިން، މަޖިލީހުގެ އަމީން އާންމު ކައުންސެލް ޖެނެރަލް އަދި ސާޖެންޓް އެޓް އާމްސްގެ މަޤާމުގައި ތިއްބެވި ބޭފުޅުން އެ މަޤާމުތަކުގައި ދެމިތިއްބެވުމާ މެދު ގޮތެއް ނިންމުމަށް މަޖިލީހަށް ހުށަހެޅުނެވެ.
ހޯމަ ދުވަހުގެ ޖަލްސާގައި ނެގުނު ވޯޓުގައި ފާތިމަތު ނިއުޝާ އަމީން އާންމުގެ މަޤާމުގައި ބެހެއްޓުމަށް 79 މެންބަރުން ވޯޓު ދެއްވާފައިވެއެވެ. ކައުންސެލް ޖެނެރަލް ފާތިމަތު ފިލްޒާ އަދި ސާޖެންޓް އެޓް އާމްސް ތަލްޙަތު ޙަސަން އެ މަޤާމުތަކުގައި ބެހެއްޓުމަށް 80 މެންބަރުން ވޯޓު ދެއްވިއެވެ.
މަޖިލީހުގެ ގަވައިދުގައި ބަޔާންކޮށްފައިވާ ގޮތުން، ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހައި ހިނދަކު، ހިނގަމުންދާ މަޖިލީހުގެ އަމީން އާންމާއި ކައުންސެލް ޖެނެރަލް އަދި ސާޖެންޓް އެޓް އާމްސްގެ މަޤާމަށް މީހުން އައްޔަނުކުރަންޖެހެއެވެ. މިއަދުގެ ވޯޓާއެކު، މި ތިން ބޭފުޅުން އެ މަޤާމުތަކުގައި ކުރިއަށް އޮތް ދައުރުގައިވެސް ދެމިތިއްބަވާނެއެވެ.
