ފުރުގާނު މިސްކިތުގެ ޚަތިމުތައް އުކާލާ، އާދިއްތަ ދުވަހުގެ ފަތިހު މިސްކިތައް ގެއްލުންދީފިއެވެ.

މާލޭގެ އަމީނީ މަގުގައި ހުންނަ މި މިސްކިތައް ގެއްލުން ދީފައިވާ މަންޒަރު ފެންނަ ވީޑިއޯ ސޯޝަލް މީޑިއާ ގައި ވަނީ އާންމު ވެފައެވެ. ވީޑިއޯ އިން ފެންނަ ގޮތުގައި މިސްކިތުގެ ކަރަންޓު ބޯޑު ތަކަށާއި، އިސްކުރުބަރި އަށް ގެއްލުން ދީފައިވެއެވެ.

ފުރުގާނު މިސްކިތައް ގެއްލުން ދިންކަން ފުލުހުންވެސް ވަނީ ކަށަވަރު ކޮށްދީފައެވެ. އަދި އެ މައްސަލަ ކަމާބެހޭ ފަރާތްތަކަށް ހުށަހަޅާ ބަލަމުން ދާ ކަމަށް ވެސް ބުނެފައިވެއެވެ.

މި ހާދިސާ އާ ބެހޭ ގޮތުން ޝޭޚް އާދަމް ނިޝާން ފޭސް ބުކް ގައި ކުރެއްވި ޕޯސްޓެއްގައި މިސްކިތައް ލިބިފައިވާ ގެއްލުންތައް ދައްކައިދޭ ވީޑިއޯ އާއި މަންޒަރު ހިމަނުއްވަމުން ވިދާޅުވީ، މިކަން ހިނގީ "ފަތިސް ނަމާދު ކުރިން ކަމަށާއި ފުރްޤާން މިސްކިތުގެ ފަހަތުގައި ހުރި މުސްޙަފްތައް މުޅިތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ތަޅާ ހިމުންކޮށްލައި އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް އުކާލާ ހަދާފައި،" ވާ ކަމަށެވެ.

އޭނާ ވިދާޅުވީ، މިކަން ކޮށްފައިވަނީ އެ މިސްކިތުގައި އަބަދުހެން، ނަމާދު ގަޑިތަކުގައިވެސް ނިދާފައި އޮންނަ “ބުއްދިފިލާ ގޮސްފައިވާ” ޒުވާނެއް ކަމަށެވެ.

"މީގެ ކުރިން އެތައް ފަހަރަކުވެސް މީނާ ވަނީ މުސްޙަފްތައް އުކާލުމާއި މިފަދަ އެތައް ކަމެއް މިމިސްކިތުގައި ކޮށްފައެވެ."

"މިވަރު ކުރަމުންދާއިރު މިސްކިތްތަކުގައި ކެމެރާ ހަރުކޮށްގެން 24 ގަޑި އިރު މާލެ ސިޓީ ކައުންސިލްއިން ބަލަން ތިބޭ ތިބުމުގެ އެއްވެސް ފައިދާއެއް އެބައޮތްތޯ،" ވެސް ނިޝާން ވަނީ ސުވާލު ކުރައްވާފައެވެ.

ނިޝާން ވަނީ، ކީރިތި ޤުރްއާނަށާއި، الله ގެ ގެކޮޅުގެ ޙުރުމަތް ކަނޑައިގެން އެތައް ފަހަރަކު އެމީހާގެ މައްސަލަ ފުލުހަށް ރިޕޯޓު ކުރެވިފައިވާ އިރު މިކަމަށް އެޅޭނެ ފިޔަވަޅެއް މިދައުލަތުގައި ނެތީތޯ ވެސް ސުވާލު ކުރައްވާފައެވެ.