މޭރީގެ މަރުގެ ތުހުމަތުކުރެވޭ ލަމްހާ ޝަރުތުތަކާއެކު ބަންދުން ދޫކޮށްލި މައްސަލަ ހައިކޯޓުން ބަލައެއް ނުގަތް
މީގެ ކުރިން މޭރީގެ މަރުގެ މައްސަލައިގައި ލަމްހާގެ މައްޗަށް ތުހުމަތު ކުރެވި، އޭނާ ހައްޔަރުކޮށް ހުރީ ޝަރީއަތް ނިމެންދެން ބަންދުގަ
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ އޭނާގެ ފިރިމީހާ މާވިން އަދި މާވިންގެ ލޯބިވެރިޔާ ލަމްހާ
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ޅ. ހިންނަވަރު، މާފިނި، ހަލީމަތު ލަމްހާ ލަމްހާ ޝަރުތުތަކާއެކު ބަންދުން ދޫކޮށްލުމުން ހައިކޯޓަށް ހުށަހެޅި މައްސަލަ ބޭރުކޮށްލައިފިއެވެ.
ކްރިމިނަލް ކޯޓުން ލަމްހާ ޝަރުތުތަކާއެކު ބަންދުން ދޫކޮށްލީ މި ހިނގާ ނޮވެމްބަރ މަހުގެ 12 ވަނަ ދުވަހުއެވެ. އެ މައްސަލަ ދައުލަތުން ހައިކޯޓުގައި އިސްތިއުނާފްކުރުމުން ހައިކޯޓުން ވަނީ އެ މައްސަލަ ބަލައި ނުގަތުމަށް ނިންމާފައެވެ.
މީގެ ކުރިން މޭރީގެ މަރުގެ މައްސަލައިގައި ލަމްހާގެ މައްޗަށް ތުހުމަތު ކުރެވި، އޭނާ ހައްޔަރުކޮށް ހުރީ ޝަރީއަތް ނިމެންދެން ބަންދުގަ އެވެ. މި މައްސަލައިގައި ލަމްހާގެ މައްޗަށް ދައުވާ އުފުލީ 2021، އޮކްޓޯބަރު މަހުގެ ތެރޭގައި ޝަރީއަތް ފެށުމަށް ފަހު ލަމްހާގެ އެންމެ ބޮޑު ޝަކުވާއަކީ އަޑުއެހުންތައް ރަނގަޅު ސްޕީޑެއްގައި ކުރިޔަށް ނުދިއުމެވެ.
މޭރީ ގްރޭސްގެ މަރުގެ މައްސަލައިގައި ދައުވާކުރަނީ ހަލީމަތު ލަމްހާގެ އިތުރުން މޭރީގެ ފިރިމީހާ އަދި ލަމްހާ ލޯބީގެ ގޮތުން ގުޅިގެން އުޅުނު މާވިންގެ މައްޗަށެވެ. މޭރީގެ މަރުގެ މައްސަލާގައި އުމުރުން 30 އަހަރުގެ މާވިން ހައްޔަރުކުރީ އޮކްޓޫބަރު 27، 2021 ގައެވެ. ލަމްހާ ހައްޔަރުކުރީ ނޮވެމްބަރު 16، 2021 ގައެވެ.
މީގެ ކުރިންވެސް ކްރިމިނަލް ކޯޓުގައި އެދިގެން ލަމްހާ ޝަރުތުތަކާއެކު ދޫކޮށްލިއެވެ. މިދިޔަ ނޮވެމްބަރު މަހު އޭނާ ދޫކޮށްލަން ކޯޓުން އަމުރުކުރި ނަމަވެސް ދައުލަތުން މި މައްސަލަ ހައިކޯޓަށް ހުށަހެޅުމުން، 20 ޑިސެމްބަރު 2023 ގައި ހައިކޯޓުން ވަނީ ކްރިމިނަލް ކޯޓުގެ ނިންމުން ބާތިލުކޮށް އޭނާގެ ބަންދު ދަމަހައްޓާފައެވެ.
ޝަރީއަތް ނިމެންދެން ބަންދުކޮށްފައި ހުރި ލަމްހާގެ ބަންދު މުރާޖައާ ކޮށްދިނުމަށް މިދިޔަ އޮކްޓޫބަރު މަހު ކްރިމިނަލް ކޯޓަށް އަނެއްކާވެސް ހުށަހެޅިއެވެ. އަންގާރަ ދުވަހު ކްރިމިނަލް ކޯޓުގައި ކުރިއަށްދިޔަ އަޑު އެހުމުގައި އޭނާ ޝަރުތުތަކާއެކު ބަންދުން ދޫކޮށްލާފައިވާއިރު، ޝަރުތުތަކުގެ ތެރޭގައި ހިމެނެނީ ވަކި ވަގުތުތަކެއްގައި ބޭރަށް ނުދިއުމާއި، ކޯޓުން އަންގާ ގަޑިތަކަށް، ކޯޓަށް ހާޒިރުވުމާއި ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމާއި މާލެއިން ބޭރަށް ފުރައިގެން ނުދިއުމުގެ އިތުރުން މައްސަލައިގައި ހެކި ބަސް ދީފައިވާ އެއްވެސް މީހަކާއި ބައްދަލު ނުކުރުމަށެވެ. މީގެ އިތުރުން މޭރީ ގްރޭސްގެ އާއިލާގެ އެއްވެސް މީހަކާ ވެސް ބައްދަލު ނުކުރުމަށް ޝަރުތުކޮށްފައިވެއެވެ.
އެންމެފަހުން މި މައްސަލައިގައި ބޭއްވި އަޑުއެހުމުގައި ލަމްހާގެ ފަރާތުން ވަނީ ލަމްހާ ބަންދުގައި ބަހައްޓަން ޖެހޭ ސަބަބެއް އޮތް ކަމަށް ގަބޫލު ނުކުރެވޭ ކަމަށާއި އަދި ބަންދު ދިގުލައިގެން ދިޔުމުގެ ސަބަބުން އޭނާގެ ހައްގުތައް ގެއްލެމުންދާ ކަމަށް ބުނެފައެވެ. ލަމްހާ ދޫކޮށްލާފައި ހުއްޓާ ހައިކޯޓުން އޭނާ ބަންދުކުރަން އަމުރުކުރީ އޭރު ދަށު ކޯޓުގައި މައްސަލައާއި ގުޅޭ ހެކިބަސް ނަގަމުންދާތީ ޝަރީއަތް ދެން ލަސްވެގެން ނުދާނެ ކަމަށް ބެލުމަށްފަހުއެވެ.
ނަމަވެސް މި މަހުގެ 6 ވަނަ ދުވަހު ބޭއްވި އަޑުއެހުމުގައި ލަމްހާ ބަންދުން ދޫކޮށްލުމަށް ދައުލަތުން ދެކޮޅު ހެދިއެވެ. އަދި އިތުރު ހެކިންގެ ހެކިބަސް ނެގުން ކުރިއަށް އެބައޮތް ކަމަށާއި، ލަމްހާގެ ބަންދުކޮށްފައި ހުރީ މުޖުތަމައުއަށް ނުރައްކާވާ ފަދަ ޖިނާއީ ބޮޑު ކުށެއް ޖަމާއަތް ހަދައިގެން ކުރުމުގެ ތުހުމަތުގައި ކަމަށެވެ. އެހެންކަމުން އެ ހާލަތް އަދިވެސް އޮތުމުން ލަމްހާ ދޫކޮށްލަން އެއްބަސް ނުވެވޭނެކަމަށް ދައުލަތުން ވަނީ ބުނެފައެެވެ.
ލަމްހާގެ މައްޗަށް، އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، އޭނާގެ މައްޗަށް ވަނީ, އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާވެސް އުފުލާފައެވެ. އަދި މި މައްސަލައިގައި ހިމެނޭ މާވިންގެ މައްޗަށް ދައުލަތުން އުފުލާފައިވަނީ އެނގިހުރެ މީހަކު މެރުމުގެ ދައުވާއެވެ.
އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަައުވާވެސް ލަމްހާގެ މައްޗަށް އުފުލާފައިވާއިރު، ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.
