ރަސްމީ ގަޑީގައި މުއިއްޒުގެ ސަރުކާރުގެ މަގާމުތަކުގައި ތިބި މީހުން ނުކުތީ މުޒާހަރާ އަށް ހުރަސް އަޅަން
20 ނޮވެމްބަރު 2024 | ބުދަ 12:05ސަރުކާރުގެ މަގާމުތަކުގައި ތިބި ފަރާތްތަކުން ސުލްހަވެރި ކަމާއެކު ކުރިއަށް ދިޔަ މުޒާހަރާ ގެ ތެރެއަށް ވަދެގަނެ، ހަމަ ނުޖެހުން އުފެއްދުމަށް މަސައްކަތް ކުރި
ޤާނޫނު އަސާސީގެ ދިފާއުގައި އިދިކޮޅު މައި ޕާޓީ އެމްޑީޕީ އިން ކުރިއަށް ގެންދިޔަ މުޒާހަރާގެ ތެރެއިން
ރައްޔިތުންގެ އެއްވެސް މަޝްވަރާ އެއް ނެތި، ގާނޫނު އަސާސީ އަށް ކުއްލި ގޮތަކަށް ބޮޑެތި ބަދަލުތަކެއް ގެންނަން މުއިއްޒުގެ ސަރުކާރުން އުޅުމުން އެކަމާ ދެކޮޅަށް "ގާނޫނު އަސާސީގެ ދިފާއުގައި" ނަމުގައި ބުދަ ދުވަހު މެންދުރު މުޒާހަރާ ކުރުމަށް ރައްޔިތުންގެ މަޖިލިސް ހުންނަ ސަރަހައްދަށް އެމްޑީޕީގެ މެމްބަރުން ޖަމާވުމުން އެކަމަށް ހުރަސް އެޅުމަށް ސަރުކާރަށް ތާއީދު ކުރާ ބަޔަކު ވަނީ އެއްވެ ހަމަ ނުޖެހުން އުފެއްދުމަށް މަސައްކަތް ކޮށްފައެވެ.
ސަރުކާރަށް ތާއީދު ކުރާ އެކްޓިވިސްޓުންގެ އަމަލުތައް ނޫސްވެރިންނަށް އެ ސަރަހައްދުން ވަނީ ފާހަގަ ކުރެވިފައެވެ. އެމީހުން ވަނީ އެމްޑީޕީގެ ބައިވެރިންނަށް މުޚާތަބުކޮށް ހަޑިހުތުރު އެއްޗެތި ގޮވާ، އަޑުގަދަކޮށް ހަޅޭއްލަވާފައެވެ.
ގާނޫނު އަސާސީން ރައްޔިތުންނަށް ލިބޭ ޚިޔާލު ފާޅު ކުރުމާއި މުޒާހަރާ ކުރުމުގެ ހައްގުގެ ދަށުން، ސުލްހަ ވެރިކަމާއެކު ޝުއޫރު ފާޅު ކުރުމަށް އެއްވި އެމްޑީޕީގެ ސަޕޯޓަރުންނާ ކުރިމަތި ލުމަށް ސަރުކާރަށް ތާއީދު ކުރާ ފަރާތްތަކުން މަސައްކަތް ކުރުމުން އެކަމަށް ފުލުހުން ވަނީ ހުރަސް އަޅާ އެމީހުން ފަހަތައް ޖައްސާފައެވެ.
އެމްޑީޕީގެ މުޒާހަރާގެ ތެރެއަށް ވަދެގަންނަން މަސައްކަތް ކުރި ސަރުކާރު ފަޅީގެ މީހުންގެ ތެރޭގައި ސަރުކާރުގެ އިސް މަގާމުތަކުގައި ތިބި ފަރާތްތައް ހިމެނުނުކަން ވަނީ ފާހަގަ ކުރެވިފައެވެ. މުޒާހަރާ ހިނގަމުން ދިޔައީ ސަރުކާރުގެ ރަސްމީ ގަޑީގައި ކަމަށް ވީ ނަމަވެސް ރަސްމީ މަސައްކަތް ދޫކޮށްލުމަށްފަހު އެމީހުން ތިބީ މަގުމައްޗަށް ނުކުމެ އެމްޑީޕީގެ މުޒާހަރާ އަށް ހުރަސް އެޅުމަށެވެ.
ސަރުކާރުގެ މަގާމުތަކުގައި ތިބި ފަރާތްތަކުން ސުލްހަވެރި ކަމާއެކު ކުރިއަށް ދިޔަ މުޒާހަރާ ގެ ތެރެއަށް ވަދެގަނެ، ހަމަ ނުޖެހުން އުފެއްދުމަށް މަސައްކަތް ކުރުމުން މުޒާހަރާގެ ބައިވެރިންވެސް ވަނީ އެކަން ފާހަގަ ކޮށް ފާޑުކިޔާފައެވެ.
މަޖިލީސް ކުރާ އިމާރާތުގެ ކައިރިއަށް އެއްވުމަށް އެމްޑީޕީގެ މުޒާހަރާގެ ބައިވެރިން މަސައްކަތް ކުރި ނަމަވެސް ފުލުހުން ވަނީ ބައިވެރިން މަޖީދިއްޔާ ސްކޫލުގެ މައިގޭޓާ ހަމަ އަށް ފަހަތައް ޖައްސާފައެވެ.
ސުލްހަވެރި ކަމާއެކު އެމްޑީޕީ އިން ކުރިއަށް ގެންދިޔަ މުޒާހަރާގެ ބައިވެރިން ތިބީ ގާނޫނު އަސާސީ ދިފާއު ކުރުމަށް ގޮވާލާ ލިޔުންތައް ލިޔެފައިވާ ބޯޑުތައް ހިފައިގެންނެވެ.
ބައިވެރިން ހިފައިގެން ތިބި ބައެއް ލިޔުންތަކުގައި "ރައްޔިތުންގެ މަޖިލީހަކީ ޕަޕެޓް ޝޯވް އެއް"، "ރާއްޖޭގެ ޑިމޮކްރަސީ އޮތީ ނުރައްކަލުގައި،" "މަޖިލީސް މެންބަރުން ކަސްތޮޅު ނާޅުވާ" ފަދަ މެސެޖްތައް ފާހަގަ ކުރެވެއެވެ.
"ގާނޫނު އަސާސީގެ ދިފާއުގައި" ނަމުގައި ކުރަމުންދިޔަ މުޒާހަރާގައި، އެމްޑީޕީގެ ޕާލިމެންޓަރީ ގްރޫޕްގެ މެމްބަރުން، މަޖިލީހުގެ ޖަލްސާ ނިމުމާއެކު ވަނީ ބައިވެރިވެފައެވެ.
ސަރުކާރުން ގާނޫނު އަސާސީ އަށް ގެންނަން ހުށަހަޅާފައިވާ ބަދަލުތަކުގެ ތެރޭގައި، މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން މެމްބަރުކަން ގެއްލޭ ގޮތް ހެދުން ހިމެނެއެވެ. މި ބަދަލު ގެނައުމުން އަމިއްލަ ގޮތުން އިންތިޚާބުވާ މެމްބަރުންވެސް ޕާޓީއަކާ ގުޅިއްޖެ ނަމަ އޭނާގެ ގޮނޑި ގެއްލޭނެއެވެ.
އަވަސް އަރުވާލައިގެން އެ ބަދަލު ގާނޫނު އަސާސީ އަށް ގެންނާތީ، އެކަމުގެ ކަންބޮޑުވުން ގިނަ ބަޔަކު ވަނީ ފާޅުކޮށްފައެވެ.
ފާޑުކިޔާ ފަރާތްތަކުން ބުނެފައިވަނީ މި ބަދަލުގެ ބޭނުމަކީ މުޅި މަޖިލީސް ރައީސް މުއިއްޒުގެ މުށުތެރެއަށް ލުމާއި މެންބަރުންގެ ކޮންޓްރޯލް ސަރުކާރުގެ މުށުތެރޭގައި ބޭއްވުން ކަމުގައެވެ.
މުޒާހަރާގެ ބައިވެރިން ބުނެފައިވަނީ މިއީ ރައްޔިތުންގެ މަޖިލީހެއްގެ ގޮތުގައި މަޖިލީސް ފެންނާނެ އެންމެ ފަހު ދުވަސް ކަމުގައެވެ.
