ޣައްޒާގެ މެދުތެރެއަށް އިޒްރޭލުން ހަމަލާދީ ފަލަސްތީނުގެ އެތައް ބަޔަކު ޝަހީދުކޮށްލައިފި

އާދިއްތަ ދުވަހުގެ ފަތިހު ޣައްޒާގެ މެދުތެރޭގައި ހުރި އަލް-ބުރެއިޖް އަދި އަލް-ނުސީރާތް ރެފިއުޖީ ކޭމްޕްތަކުގައި ހުރި ދެ ގެއަކަށް އިޒްރޭލުގެ ހަނގުރާމަ މަތިންދާބޯޓުތަކުން ހަމަލާދީފިއެވެ. މި ހަމަލާގައި މަދުވެގެން 7 ފަލަސްތީނު މީހުން ޝަހީދުވެ، އަދި އެތައް ބަޔަކު ޒަޚަމްވެފައިވެއެވެ. ބައެއް މީހުން ފުނޑުވެފައިވާ އިމާރާތްތަކުގެ  ދަށުވެފައިވުމާއެކު، މީހުން ސަލާމަތްކުރުމުގެ މަސައްކަތް ކުރިއަށްދާ ކަމަށް ވަފާ ނިއުސް އިން ވަނީ ބުނެފައެވެ.

ސިއްހީ އޮފިޝަލުން ބުނާ ގޮތުގައި، ފުރަތަމަ ހަމަލާ އަމާޒުކޮށްފައިވަނީ އަލް-ބުރެއިޖް ކޭމްޕްގައި ހުރި އާންމު ރައްޔިތެއްގެ ގެއަކަށެވެ. މި ހަމަލާގައި 3 މީހުން ޝަހީދުވެ، އެތައް ބަޔަކު ޒަޚަމްވެފައިވެއެވެ. މި ހަމަލާއާ ގުޅިގެން އިމާރާތުގެ ދަށުވެ އެތައް ބަޔަކު ގެއްލިފައިވާ ކަމަށް ބެލެވޭއިރު، ދަތި ހާލުގައި މީހުން ސަލާމަތްކުރާ ޓީމުތަކުން ދަނީ އެމީހުން ހޯދުމުގެ މަސައްކަތް ކުރަމުންނެވެ.

ވަކި އެހެން ހަމަލާއެއްގައި، އިޒްރޭލުގެ ބޮން އަޅާ ބޯޓުތަކުން އަމާޒުކޮށްފައިވަނީ ނުސީރާތް ރެފިއުޖީ ކޭމްޕްގައި ހުރި އާންމު މީހެއްގެ ގެއަކަށެވެ. މި ހަމަލާގައި މަދުވެގެން 4 މީހުން މަރުވެ، އެތައް ބަޔަކު ޒަޚަމްވެފައިވެއެވެ.

ޣައްޒާގެ އެކި ސަރަޙައްދުތަކުގައި އިޒްރޭލުން ދެމުންދާ ހަމަލާތަކުގެ ސަބަބުން ޒަޚަމްވާ މީހުންގެ އަދަދު ގިނަވުމާއެކު، އެ ސަރަޙައްދުގެ ހޮސްޕިޓަލްތަކަށް ބަލިމީހުން ބަލައިގަތުމުގައި ގޮންޖެހުންތަކާ ކުރިމަތިވެފައިވާތީ، މެޑިކަލް ޓީމުތަކަށް ވަނީ ވަގުތުން އެހީތެރިކަން ފޯރުކޮށްދިނުމުގައި ދަތިތަކާ ކުރިމަތިވެފައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިޒްރޭލުން ދެމުންދާ ހަމަލާތަކުގެ ސަބަބުން މިހާތަނަށް މަދުވެގެން 43,799 ފަލަސްތީނު މީހުން މަރުވެފައިވާކަން ރެކޯޑުތަކުން ދައްކައެވެ. އަދި 103,601 އަށްވުރެ ގިނަ މީހުން ވަނީ ޒަޚަމްވެފައެވެ.