ލުބުނާނުގެ ހަތަރު ޕެރަމެޑިކުންނާއެކު ޖުމްލަ ހަ މީހުން އެ ޤައުމުގެ ދެކުނުގެ ނަބަތިއްޔާ ސަރަޙައްދުގައި ހުރި ސިވިލް ޑިފެންސް މަރުކަޒަކަށް އިޒްރޭލުން ދިން ހަމަލާއެއްގައި މަރުވެއްޖެކަމަށް، އަދި ބާލްބެކް ސިޓީ ކައިރީގައި ހުރި އެހެން ސިވިލް ޑިފެންސް މަރުކަޒަކަށް ދިން ދެވަނަ ހަމަލާއެއްގައި 12 ސަލާމަތީ ޚިދުމަތްތެރިން މަރުވެއްޖެކަމަށް ލުބުނާނުގެ ސިއްޙަތާ ބެހޭ ވުޒާރާއިން ރިޕޯޓުކޮށްފިއެވެ.

އަނެއްކޮޅުން އިޒްރޭލުގެ ހަމަލާތަކުގައި ވޭތުވެދިޔަ 24 ގަޑިއިރުގެ ތެރޭގައި ފަލަސްޠީނުގައި މަދުވެގެން 24 މީހުން މަރުވެ، 112 މީހުން ޒަޚަމް ވެފައިވާ ކަމަށް ޣައްޒާގެ ސިއްޙަތާ ވުޒާރާއިން ބުނެފިއެވެ.

ފަލަސްޠީނު ދަރިކޮޅުގެ އެމެރިކާގެ ކޮންގްރެސް މެންބަރު ރަޝީދާ ޠަލީބް ވަނީ އެމެރިކާގެ ޚާރިޖީ ވަޒީރު އެންތަނީ ބްލިންކަން އިސްތިޢުފާ ދިނުމަށް ގޮވާލައްވާފައެވެ. އެއީ ޣައްޒާއަށް އިންސާނީ އެހީ އިތުރުކުރުމަށް އިޒްރޭލުގެ އިދާރާތަކަށް ދީފައިވާ ސުންގަޑި ހަމަވެ، އެކަން ނުކުރުމުން އިޒްރޭލަށް އެއްވެސް ފިޔަވަޅެއް އެޅުމުގެ ބަދަލުގައި، އިޒްރޭލަށް ދޭ އެހީ ކުރިއަށް ގެންދާނެ ކަމަށް އެމެރިކާ އިން ބުނުމާ ގުޅިގެންނެވެ.

ޣައްޒާގެ ރައްޔިތުން މަޖުބޫރުން އެމީހުންގެ ވަޒަނުން ނެރެ އިޒްރޭލުގެ ބާރުތަކުން ބޭރުކޮށްފައިވަނީ ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ގޮތުގައި ބެލެވޭ މިންވަރަށް ކަމަށް ހިއުމަން ރައިޓްސް ވޮޗްއިން ބުރާސްފަތި ދުވަހު ނެރުނު ރިޕޯޓެއްގައި ބުނެފައިވެއެވެ.

"ހިއުމަން ރައިޓްސް ވޮޗްއިން ދެނެގަތް ގޮތުގައި މަޖުބޫރުން މީހުން ނެރެ ބޭރުކުރުން ވަނީ ފުޅާ ދާއިރާއެއްގައި ހިންގާފައެވެ. އަދި ހެކިތަކުން ދައްކާ ގޮތުގައި މިކަން ވަނީ ނިޒާމީ ގޮތެއްގައި އަދި ދައުލަތުގެ ސިޔާސަތެއްގެ ބައެއްގެ ގޮތުގައި ހިންގާފައެވެ. މިފަދަ ޢަމަލުތައް އިންސާނިއްޔަތާ ދެކޮޅު ކުށްތަކުގެ ގޮތުގައިވެސް ބެލެވެއެވެ،" އެ ރިޕޯޓުގައި ބުނެފައިވެއެވެ.

އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 43,736 ފަލަސްޠީނު ރައްޔިތުން ވަނީ ޝަހީދުވެފައެވެ. އޭގެ އިތުރުން، 103,370 މީހުން ވަނީ ޒަޚަމްވެފައެވެ.

ޣައްޒާ ހަނގުރާމަ ފެށުނު ފަހުން ލުބުނާނަށް އިޒްރޭލުން ދިން ހަމަލާތަކުގައި މިހާތަނަށް، 3،386 މީހުން މަރުވެ، 14،417 މީހުން ޒަޚަމްވެފައިވެއެވެ.