ފަގީރުންނަށް ފައިދާވާން ނޭދޭ ސިޔާސީ ވެރިން ކުރިއަށް އޮތްތާ އިތުރަށް ފެންނާނެ: ރައީސް މުއިއްޒު
މިއަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ވެސް ރައީސް ވަނީ ގައުމުގެ މަހުޖަނުންނަށް ބަހުގެ ހަމަލާއެއް ދެއްވާފައި
ރައީސް މުއިއްޒު މި ސަރުކާރުގެ ސިޔާސީ އިސް މަގާމުތަކުގައި ތިބި ބައެއް ފަރާތްތަކާއެކު - މުއިއްޒު ވިދާޅުވާ ރައްޔިތުންގެ ފަޅިއަކީ ކޮބައި ކަމެއް ސާފެއް ނުވޭ
ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފު ވާތަން ކުރިޔަށް އޮތް ތާނގައި އިތުރަށް ފެންނާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެއެވެ.
ބުރާސްފަތި ދުވަހު މެންދުރުފަހު އެކްސްގައި ކުރެއްވި ޕޯސްޓެއްގައި މިހެން ވިދާޅުވީ ކޮން ކަމަކާ އަމާޒު ކުރައްވާފައިކަން ސީދާ ވިދާޅުނުވިޔަސް، ރާއްޖޭގެ ޓޫރިސްޓް ފެސިލިޓީތަކަށް އަމާޒުކޮށް، އެ ފެސިލިޓީތަކަށް ލިބޭ ޑޮލަރު މަޖުބޫރުކޮށްގެން ރާއްޖޭގެ ބޭންކުތަކަށް ޖަމާކޮށް، ރިސޯޓަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭ ގޮތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ނުކުރާނޭ ކަމަށް ރާއްޖޭގެ ބޮޑެތި ރިސޯޓު ގްރޫޕްތަކުން މި ދަނޑިވަޅުގައި އަންނަނީ ބުނަމުންނެވެ.
ޑޮލަރުގެ ތާށިކަން ހައްލު ކުރަން ކަމަށް ބުނެ އެމްއެމްއޭ އިން ވަރަށް ކުއްލި ގޮތަކަށް ކަމާ ބެހޭ ފަރާތްތަކުގެ މަޝްވަރާއެއް ނެތި ގަވައިދަށް މި ގެނައި ބަދަލަށް ރިސޯޓުތަކުން ދެކޮޅު ހަދަމުން ދިއުމާއެކު މި އައު ގަވައިދު ބޭކާރު އެއްޗަކަށް ވެދާނެ ކަމުގެ ހީތައް ވަނީ އިތުރުވެފައެވެ.
ބުރާސްފަތި ދުވަހުގެ ޕޯސްޓުގައި އަނެއްކާވެސް ރައީސް ވަނީ "މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ" ގެން ކަމަށް ވިދާޅުވެފައެވެ.
ރައީސް މި ވިދާޅުވާ ރައްޔިތުންގެ ފަޅިއަކީ ކޮބައިކަމާ ސުވާލު އުފެދިފައިވާއިރު، ބައެއް ފަރާތްތަކުން ބުނަނީ ރައްޔިތުން ކަމަށް ރައީސް އެ ވިދާޅުވަނީ ތަނަވަސްކަން ކުޑަ މީހުން ނުވަތަ ފަގީރުން ކަމަށާއި، އެހެން އެންމެންނަކީ ރައްޔިތުން ނޫން ކަމަށެވެ. އަނެއް ބަޔަކު ބުނަނީ ވިޔަފާރިވެރިން ނޫން އެންމެންނަކީ ރައީސް އެ މަނާކުރައްވާ ރައްޔިތުން ކަމަށެވެ. އަނެއް ބަޔަކު ބުނަނީ ރައީސް އަށް ގައުމެއްގެ ރައްޔިތުންނަކީ ކޮބައިކަން ރަނގަޅަށް އެނގިވަޑައި ނުގަންނަވާ ކަމުގައެވެ.
މިއަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ވެސް ރައީސް ވަނީ ގައުމުގެ މަހުޖަނުންނަށް ބަހުގެ ހަމަލާއެއް ދެއްވާފައެވެ.
މުއިއްޒު ވިދާޅުވީ، އެމަނިކުފާނު ކުރިއަށް މިގެންދަވަނީ 'އެންމެ މުއްސަނދި މީހާ އަތުން ހޯދާފައި، އެންމެ ނިކަމެތި މީހާ އަށް ލިބޭ ނިޒާމު" ކަމަށާއި "އަދުލުވެރިކަން އޭރުން އަންނާނެ" ކަމަށެވެ.
"ރިޗް ފިއު (މަދު މަހުޖަނުން) އެމީހުން އަތުގައި ހުރިހާ މުއްސަނދިކަމެއް ބޭއްވުމުގެ ބަދަލުގައި، ޑިސްޓްރިބިއުޓް ކޮށްލާ އެންމެ ނިކަމެތި މިހާ، މިހާރު ހުރި ހިސާބުން ނަގާ މައްޗަށް ޖައްސާލާ، ހަމަހަމަ ކޮށްލާ، އަދުލުވެރި ކުރުން އެއީ އަޅުގަނޑުމެންގެ ސިޔާސަތު،" މުއިއްޒު ވިދާޅުވިއެވެ.
