ގެދޮރުވެރިޔާ ސްކީމުގެ ދަށުން ދޭން ނިންމި 4،000 ފުލެޓު ލިބޭ މީހުންގެ ވަގުތީ ލިސްޓު ބުރާސްފަތި ދުވަހު ހާމަނުކުރާނެކަން ހައުސިން މިނިސްޓަރު ޑރ.އަލީ ހައިދަރު ހާމަކުރައްވައިފިއެވެ.

ބުރާސްފަތި ދުވަހު ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ މި ހަފްތާގެ ނިޔަލަށް ލިސްޓް ހާމަކުރާނެ ކަމަށް ނިންމާފައިވާ ކަމަށެވެ.

މިއަދަކީ ބުރާސްފަތި ދުވަސް ކަމަށްވާއިރު، ދެވަނަ ފަހަރަށް ސުވާލުކުރުމަށް މިނިސްޓަރު ހައިދަރު ވަނީ ޖަވާބެއް ދިނުމުގެ ބަދަލުގައި ހަފްތާ ފެށެނީ ކޮން ދުވަހަކުތޯ ސުވާލު ކޮށްފައެވެ. އަދި ވިދާޅުވީ ހަފުތާ ފެށޭ ދުވަހުގެ އެއް ދުވަސް ކުރިން ފުލެޓު ލިސްޓު އިއުލާނު ކުރާނެ ކަމަށެވެ.

ފްލެޓް ލިސްޓް އާންމުކުރުން ލަސްވެ، ގިނަ ބައެއްގެ ފާޑު ކިޔުން ސަރުކާރަށް އަމާޒުވެފައިވާއިރު، މިނިސްޓަރު ހައިދަރު ވަނީ ލިސްޓް ނެރޭނެ ކަމަށް ވިދާޅުވެ، އެކި ތާރީހުތައް ދެއްވާފައެވެ.

އެގޮތުން އޮކްޓޫބަރު މަސް ނިމުމުގެ ކުރިން ލިސްޓް އާއްމު ކުރާނެ ކަމަށް މިނިސްޓަރު ހައިދަރު ވިދާޅުވި ނަމަވެސް އެމަހުގެ 28 ވަނަ ދުވަހު ހައުސިން މިނިސްޓްރީން ވަނީ އިތުރު ވަގުތު ބޭނުންވާ ކަމަށް ބުނެ، ބަޔާނެއް ނެރެފައެވެ. އަދި ނޮވެންބަރު މަހުގެ މިހަފްތާގެ ތެރޭގައި ވެސް ލިސްޓް އާއްމު ކުރާނެކަން ހާމަކޮށްފައިވެއެވެ. އަދި ޖުމްހޫރީ ދުވަހާއި ގުޅިގެން އާދިއްތަ އަދި ހޯމަ ދުވަސް ސަރުކާރު ބަންދު ދުވަހުގެ ގޮތުގައި ކަނޑައެޅުމުން ހަފްތާ ގުނަމުންދަނީ ބަންދު ދުވަސްތައް ހިމަނައިގެން ތޯ އަދި ނޫންތޯ ބައެއް މީހުން ސުވާލު އުފައްދާފައިވެއެވެ. ނަމަވެސް މިކަމަށް ސަރުކާރުގެ ފަރާތުން ޖަވާބު ދީފައިނުވެއެވެ.

އިތުބާރު ހުރި ފަރާތަކުން ރާއްޖެއެމްވީއަށް ބުނީ ފްލެޓު ލިސްޓު އާއްމު ކުރުމަށް ނިންމާފައިވަނީ 17 ނޮވެންބަރު 2024 ވާ އާދިއްތަ ދުވަހެވެ.

މިދިޔަ ސަރުކާރުން ހިންގި ގެދޮރުވެރިޔާ ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު އެގްރީމެންޓް ވެސް ވަނީ ހަދާފައެވެ.

ފްލެޓް ދޫކުރުމުގެ މައްސަލައާ ގުޅޭގޮތުން އަދިވެސް ވާނުވާ ނޭނގޭ ކަމަށް ފްލެޓް ލިސްޓުގައި ހިމެނޭ ބައެއް ފަރާތްތަކުން ފާހަގަކޮށްފައިވާއިރު، ސަރުކާރުން ދައްކާ ވާހަކަތަކުގެ ރާގު އެކި ފަހަރު ބަދަލުވަމުންދާތީ އެކަމުގެ ކަންބޮޑުވުން އެތައް ފަހަރެއްގެ މަތިން ފާޅުކޮށް، ސިލްސިލާކޮށް މުޒާހަރާވެސް ދަނީ ކުރަމުންނެވެ.