ބައިނަލްއަޤުވާމީ ރަޙުމަތްތެރިކަމުގައި ބަންގްލަދޭޝްއާ ދެކޮޅަށް ކުޅުނު މެޗުން ރާއްޖޭގެ ޤައުމީ ފުޓުބޯޅަ ޓީމު މޮޅުވެއްޖެ އެވެ.

ބަންގްލަދޭޝްގެ ބަޝުންދަރާ އެރީނާގައި ބުދަ ދުވަހުގެ ހަވީރު ކުޅުނު މެޗު ރާއްޖެ އިން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަަމަ ހާފުގައި ރާއްޖެ އިން ޖެހި ލަނޑުންނެވެ. މެޗު ފަށައިގެން 18 ވަނަ މިނެޓުގައި ރާއްޖެ އިން ވަނީ ބަންގްލަދޭޝް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ރާއްޖެ އަށް ޖަހައިދިނީ އަލީ ފާސިރު (ސެންޓޭ) އެވެ. ސެންޓޭ އެ ލަނޑު ޖެހީ ހަމްޒާ މުޙައްމަދު (ހަމްޕު) ތަނަވަސްކޮށްދިން ފުރުސަތެއްގައި ލިބުނު ބޯޅަ ބޮލުން ގޯލަށް ވައްދާލައިގެންނެވެ. އޭގެ ފަހުން ވެސް މެޗުގައި ރާއްޖެ އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ.

މިއީ ފާއިތުވި އެއް އަހަރު ދުވަހުގެ ތެރޭގައި ރާއްޖޭގެ ޤައުމީ ޓީމުން ކުޅުނު ފުރަތަމަ މެޗެވެ. މި މެޗުގެ ކުރިން، އެންމެ ފަހުން ޤައުމީ ޓީމުން މެޗެއް ކުޅުނީ މިދިޔަ އަހަރުގެ އޮކްޓޯބަރު މަަހުގެ 17 ވަނަ ދުވަހު ފީފާ ވޯލްޑް ކަޕް ކޮލިފިކޭޝަންގައި ބަންގްލަދޭޝްއާ ދެކޮޅަށެވެ. އެ މެޗުން ރާއްޖެ ވަނީ ބަލިވެފަ އެވެ. އަނެއްކޮޅުން މިއީ ބަންގްލަދޭޝްގައި އެ ޤައުމާ ދެކޮޅަށް ކުޅެގެން ރާއްޖެ މޮޅުވީ ފުރަތަމަ ފަހަރެވެ. ބައިނަލްއަޤުވާމީ މި ބްރޭކުގައި ރާއްޖެ އިން ދެ މެޗު ވެސް ކުޅެނީ ބަންގްލަދޭޝްއާ ދެކޮޅަށެވެ. ދެ ވަނަ މެޗުގައި ބަންގްލަދޭޝްއާ ދެކޮޅަށް ރާއްޖެ ދެން ނިކުންނާނީ ހޮނިހިރު ދުވަހު އެވެ.

ބަންގްލަދޭޝް އަތުން ހޯދި މި ތާރީޚީ މޮޅު ރާއްޖެ އިން ޚާއްސަކޮށްފައި ވަނީ ޤައުމީ ޓީމުގެ ކުރީގެ މިޑްފީލްޑަރު މުޙައްމަދު އާރިފް (ބަކާ) އަށެވެ. އުމުރުން 38 އަހަރުގައި ބަކާ ނިޔާވެފައި ވަނީ މިއަހަރުގެ ޖޫން މަހުގެ 25 ވަނަ ދުވަހު އެވެ. ބަންގްލަދޭޝް މެޗަށްފަހު ޤައުމީ ޓީމުގެ ކުޅުންތެރިން ވަނީ އެ މޮޅު ބަކާ އަށް ޚާއްސަ ކުރަން ބޭނުންވާކަން ހާމަކޮށްފައިވާ ޕޯސްޓަރެއް ހިފައިގެން ތިބެފަ އެވެ.