އަމޯރިމް އާއެކު ޔުނައިޓެޑަށް ކާމިޔާބު ހޯދޭނެ: ސީއީއޯ
13 ނޮވެމްބަރު 2024 | ބުދަ 05:39ރަސްމީކޮށް އަމޯރިމް ކުލަބާ ހަވާލުވެފައިވާއިރު، އޭނާ ކާމިޔާބު މަސައްކަތްތަކެއް ކުރާނެ ކަމުގެ ޔަގީންކަން އޮތް ކަމަށް ވެސް އޭނާ ވިދާޅުވި އެވެ.
ޔުނައިޓެޑުގެ ކޯޗުކަމާ ހަވާލުވި އަމޯރިމް، އެ ކުލަބުގެ ސީއީއޯ އާއެކު
މެންޗެސްޓަރ ޔުނައިޓެޑުގެ ކޯޗުކަމާ ހަވާލުވި ޕޯޗުގަލްގެ ރުބެން އަމޯރިމްގެ އިރުޝާދުގެ ދަށުން، އެ ކުލަބަށް ކާމިޔާބީ ހޯދޭނެ ކަމަށް، ޔުނައިޓެޑުގެ ސީއީއޯ އޮމަރް ބެރާޑާ ވިދާޅުވެއްޖެ އެވެ.
ޔުނައިޓެޑުގެ ކޯޗުކަމަށް އަމޯރިމް ހަމަޖެއްސީ ކުރިން އެ މަގާމުގައި ހުރި ނެދަލެންޑްސްގެ އެރިކް ޓެން ހާގް ވަކި ކުރުމަށްފަހު އެވެ. ޔުނައިޓެޑުގެ ކޯޗުކަމުން ޓެން ހާގް ވަކިކޮށްފައި ވަނީ އޭނާގެ އިރުޝާދުގެ ދަށުން މި ސީޒަންގައި ޔުނައިޓެޑުގެ ނަތީޖާތަްއް ދަށްވުމުގެ ސަބަބުންނެވެ. ޚާއްސަކޮށް ޕްރިމިއާ ލީގުގައި ޔުނައިޓެޑުގެ ނަތީޖާތައް އިންތިހާ އަށް ދަށްވެފައިވާއިރު، މިއީ ޔުނައިޓެޑުގެ ތާރީޚުގައި ވެސް ޕްރިމިއާ ލީގުގައި އެ ޓީމަށް އެންމެ ދަށް ނަތީޖާއާ ކުރިމަތިލާން ޖެހުނު ސީޒަނެވެ.
ޔުނައިޓެޑުގެ ކޯޗުކަމާ އަމޯރިމް ހަވާލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އަމޯރިމް ޔުނައިޓެޑަށް އިރުޝާދު ދޭނެ އެވެ. މިދިޔަ ހަފުތާގެ ތެރޭގައި ޔުނައިޓެޑުން އެ ޓީމުގެ ކޯޗަކަށް އަމޯރިމް ހަމަޖައްސާފައިވާއިރު، ރަސްމީކޮށް އޭނާ ޔުނައިޓެޑާ ހަވާލުވީ ހޯމަ ދުވަހު އެވެ. މިހާރު އަމޯރިމް ޔުނައިޓެޑަށް ގޮސްފައިވާއިރު، އޭނާ ވަނީ ޔުނައިޓެޑުގެ ވެރިން އަދި ކުޅުންތެރިންނާ ވެސް ބައްދަލު ކޮށްފަ އެވެ.
އަމޯރިމްއާ ގުޅޭ ގޮތުން ވާހަކަ ދައްކަވަމުން ޔުނައިޓެޑުގެ ސީއީއޯ ވިދާޅުވީ، އަމޯރިމް ޔުނައިޓެޑާ ހަވާލުވުމުން އޭނާ ވަރަށް އުފާވެފައި ހުރި ކަމަށެވެ. އަދި ރަސްމީކޮށް އަމޯރިމް ކުލަބާ ހަވާލުވެފައިވާއިރު، އޭނާ ކާމިޔާބު މަސައްކަތްތަކެއް ކުރާނެ ކަމުގެ ޔަގީންކަން އޮތް ކަމަށް ވެސް އޭނާ ވިދާޅުވި އެވެ. މީގެ އިތުރުން ސީއީއޯ ވިދާޅުވީ، އަމޯރިމް އާއެކު ޔުނައިޓެޑަށް ކާމިޔާބަށް ވާސިލްވެ، މިހާރު އޮތް ޙާލަތު ބަދަލު ކުރެވޭނެ ކަމަށް ވަރަށް ބޮޑަށް އުންމީދު ކުރައްވާ ކަމަށެވެ.
މީގެ ކުރިމް ބެންފީކާ އަދި ޕޯޗުގަލް ޤައުމީ ޓީމަށް ވެސް ކުޅެފައިވާ އަމޯރިމް ކޯޗިންގެ ކެރިއަރު ފެށީ 2018 ވަނަ އަހަރު އެވެ. އޭގެ ފަހުން ޔުނައިޓެޑު ވެގެން ދާނީ އަމޯރިން އިރުޝާދު ދޭނެ ހަތަރު ވަނަ ކުލަބަށެވެ. އޭނާގެ އިރުޝާދުގެ ދަށުން ސްޕޯޓިން ވަނީ 230 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 164 މެޗުންނެވެ. 34 މެޗު އެއްވަރުވެފައިވާއިރު، 33 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ ފަސް ތައްޓެއް ވެސް ކާމިޔާބު ކޮށްފަ އެވެ.
