ހުޅުމާލޭގައި ކާރެއްގެ ތެރޭގައި މީހަކު ރަހީނުކޮށް ފޭރެން އުޅެފި
ދިވެހި ފިރިހެނަކު ކާރެއްގެ ތެރޭގައި ރަހީނުކޮށް، އޭނާއަށް އަނިޔާކޮށްފައިވޭ
ހުޅުމާލޭގައި ކާރެއްގެ ތެރޭގައި މީހަކު ރަހީނުކޮށް ފައިސާ ހޯދަން އުޅުމުގެ ތުހުމަތުގައި ހައްޔަރު ކުރި މީހާ
ހުޅުމާލޭގައި ކާރެއްގެ ތެރޭގައި މީހަކު ރަހީނުކޮށް، ފައިސާ ހޯދަން އުޅުނު މައްސަލައެއްގައި މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކޮށްފައިވަނީ ދަފްތަރު ނަންބަރު 9022، ތޮލާލް މޫސާ ކަމަށް ފުލުހުން މަޢުލޫމާތު ދީފައިވެއެވެ.
ފުލުހުން ބުނާ ގޮތުގައި މި ހާދިސާ ހިނގާފައިވަނީ ބުރާސްފަތި ދުވަހުގެ ރޭ ހުޅުމާލޭ އޯކިޑްމާ ހިނގުމުގައެވެ. މި މައްސަލައިގައި ދިވެހި ފިރިހެނަކު ކާރެއްގެ ތެރޭގައި ރަހީނުކޮށް، އޭނާއަށް އަނިޔާކޮށްފައިވާ ކަމަށް ފުލުހުންނަށް ރިޕޯޓުކޮށްފައިވެއެވެ. އަދި ރަހީނުކުރެވުނު މީހާގެ އާއިލާއަށް ގުޅައިގެން ފައިސާ ހޯދުމަށް މަސައްކަތްކޮށްފައިވާ ކަމަށްވެސް ފުލުހުން ބުނެފައިވެއެވެ.
މި ހާދިސާއާ ގުޅިގެން ތޮލާލް މޫސާ ހައްޔަރުކޮށްފައިވާއިރު، މިދިޔަ ބުރާސްފަތި ދުވަހުގެ ރޭ ހިޔާ ފްލެޓެއްގެ ތެރޭގައި މީހަކު ރަހީނުކޮށް، އަނިޔާކުރި މައްސަލައެއްގައި ވެސް 12 މީހަކު ހައްޔަރުކޮށް ބަންދު މުއްދަތު އިތުރުކޮށްފައިވާކަން ފާހަގަކުރެވެއެވެ.
އެ މައްސަލައިގައި މީހުން ހައްޔަރުކޮށްފައިވަނީ ރަހީނުކުރެވުނު މީހާގެ އިނގިލި ބުރިކޮށްލަން އުޅެނިކޮންނެވެ.
ފަހަކަށް އައިސް ރަހީނުކުރުމުގެ މައްސަލަތައް އިތުރުވެފައިވާކަން ފާހަގަކުރެވޭއިރު، ހުޅުމާލޭގައި މި ބާވަތުގެ ކުށްތައް އިތުރުވަމުން ދިއުމާ ގުޅިގެން، ރައްޔިތުންގެ މެދުގައި ކަންބޮޑުވުން އުފެދިފައިވާކަން ފާހަގަކުރެވެއެވެ.
