ސައްހަ ވިސާ ނެތި ޤަވާއިދާ ޚިލާފަށް އުޅެމުންދިއަ 13 ބިދޭސީން ހައްޔަރުކޮށްފި
މާލޭގައި ބިދޭސީން ދިރިއުޅެމުންދިއަ 2 ތަނެއް ވަނީ ބަލައި ފާސްކޮށްފައި
އިމިގްރޭޝަނުން ކުރިއަށް ގެންދިޔަ އޮޕަރޭޝަންގެ ތެރެއިން ތަނެއް ބަލައި ފާސްކުރަނީ
ސައްހަ ވިސާ ނެތި ޤަވާއިދާ ޚިލާފަށް އުޅެމުންދިއަ 13 ބިދޭސީން ހައްޔަރުކޮށްފިއެވެ.
މޯލްޑިވްސް އިމިގްރޭޝަނުން މައުލޫމާތު ދޭ ގޮތުގައި ޤަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް މިމަހުގެ 6 ވަނަ ދުވަހު ކުރިއަށް ގެންދިއަ ރެއިޑު ގައި މާލޭގައި ބިދޭސީން ދިރިއުޅެމުންދިއަ 2 ތަނެއް ވަނީ ބަލައި ފާސްކޮށްފައެވެ.
އަދި އެތަންތަނުން ސައްހަ ވިސާ ނެތި ޤަވާއިދާ ޚިލާފަށް އުޅެމުންދިޔަ 13 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.
ޤަވާއިދާ ޚިލާފަށް ރާޢްޖޭގައި އުޅެމުން އަންނަ ބިދޭސީންގެ މައްސަލަ ހައްލުކުރުމުގެ މަސައްކަތް އިމިގްރޭޝަނުން ކުރަމުން އަންނައިރު ޤަވާއިދާ ޚިލާފަށް ވިޔަފާރިކޮށް، ސައްހަ ވިސާ ނެތި އުޅެމުންދާ ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރުމުގެ މަސައްކަތް ދަނީ ކުރަމުންނެވެ.
އިމިގްރޭޝަނުން ބުނެފައިވަނީ ޤަވާއިދާ ޚިލާފަށް ރާއްޖޭގައި ދިރިއުޅެމުންދާ ބިދޭސީން ގަވާއިދުގެ ތެރެއަށް ވެއްދުމަށްޓަކައި ގިނަގުނަ މަސައްކަތްތަކެއް ކުރެވެމުންދާ ކަމަށެވެ. މިގޮތުން ފެއްޓި ޚާއްޞަ އޮޕަރޭޝަނަކީ މި މައްސަލަ ޙައްލުކުރުމަށް އެޅުނު އެންމެ މުހިންމު ފިޔަވަޅުތަކުގެ ތެރެއިން އެއް ފިޔަވަޅު ކަމުގައި އިމިގްރޭޝަނުން ވަނީ ބުނެފައެވެ.
މިހާތަނަށް ޤަވައިދާ ޚިލާފަށް ރާއްޖޭގައި އުޅެމުންދިޔަ 4428 ބިދޭސީން ވަނީ ޑީޕޯޓުކޮށްފައެވެ.
ބިދޭސީންގެ މައްސަލަ ހައްލު ކުރުމަށް މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރަމުންނެވެ.
