ބެންފީކާ އަތުން ބަޔާން މޮޅުވީ މުސިއާލާ ޖެހި ލަނޑުން

ޔުއެފާ ޗެމްޕިއަންސް ލީގުގައި ބެންފީކާއާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެއްޖެ އެވެ.

ބަޔާންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ބަޔާނުން ކާމިޔާބު ކުރީ 1-0 އިންނެވެ. މެޗުގެ ދެ ވަނަ ހާފުގައި ބަޔާނުން ޖެހި ލަނޑުންނެވެ.

މެޗުގެ ފުރަތަމަ ހާފުގައި ވެސް ބަޔާނުން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. މެޗުގައި ލަނޑު ޖަހާނެ ގިނަ ފުރުސަތުތަކެއް ބަޔާނުން ތަނަވަސްކުރި އިރު، އެ ޓީމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އަދި ސާޖް ގްނަބްރީ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގެ ދެ ވަނަ ހާފު ފަށައިގެން ކުރީ ކޮޅު ބަޔާނުން ވަނީ ލަނޑު ޖަހައިފަ އެވެ. އެގޮތުން މެޗުގެ 67 ވަނަ މިނެޓުގައި ބަޔާންގެ އެ ލަނޑު ޖެހީ ޖަރުމަނުގެ ޒުވާން ކުޅުންތެެރިޔާ ޖަމާލް މުސިއާލާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ކޭން އެވެ.

މޮޅާއެކު ބަޔާން އޮތީ ލީގުގެ 17 ވަނައިގަ އެވެ. އެއީ މިހާތަނަށް ކުޅުނު ހަތަރު މެޗުން ހޯދި ހަ ޕޮއިންޓާ އެކު އެވެ. ހަތަރު މެޗުގެ ތެރެއިން ބަޔާން މޮޅުވެފައި ވަނީ އެންމެ ދެ މެޗުންނެވެ. އަނެއް ދެ މެޗުން ބަޔާން ވަނީ ބަލިވެފަ އެވެ. މި ސީޒަނާ ދިމާކޮށް ބަޔާންގެ ކޯޗުކަމާ ހަވާލުވި ވިންސެންޓް ކޮމްޕެނީގެ އިރުޝާދުގެ ދަށުން ޗެމްޕިއަންސް ލީގުގައި އެ ޓީމުގެ ނަތީޖާތައް ދަށްވުމުގެ ސަބަބުން، އޭނާ އަށް ޕްރެޝަރު ކުރިމަތިވާނެ ކަމަށް ރިޕޯޓުތަކުގައި މީގެ ކުރިން ވަނީ ފާހަގަ ކޮށްފަ އެވެ. ނަމަވެސް، ބެންފީކާ އަތުން ހޯދި މޮޅާއެކު، ކޮމްޕެނީ އަށް އޮތް ޕްރެޝަރަށް ކޮންމެ ވެސް ވަރެއްގެ ލުޔެއް ލިބޭނެ ކަމަށް ބެލެވެ އެވެ.