ކުއްލި މައްސަލަ ބޭރުކޮށްލީ ގަވައިދާ ހިލާފަށް، އުޅެނީ ރައްޔިތުންނަށް އޮޅުވާލަން - މައުރޫފް
އިޒްރޭލް ޕާސްޕޯޓު މައްސަލައިގައި ވެސް މަޖިލީހުން ކަންތައްކުރީ މިފަދައިން
ކެންދޫ ދާއިރާގެ މެންބަރު މައުރޫފް ޒާކިރު
7 ދުވަސްވެއްޖެކަމަށް ބުނެ އާސަންދައާއި ގުޅޭ ކަންބޮޑުވުންތަކާއި އެކު ހުށަހެޅި ކުއްލި މައްސަލަ ބޭރުކޮށްލީ ގަވައިދާ ހިލާފަށް ކަމަށާއި، އެއީ ރައްޔިތުންނަށް އޮޅުވާލަން ކުރާކަމެއް ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
އެމްޑީޕީގެ ޕާލަމެންޓްރީ ގްރޫއްޕުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި މައުރޫފް ވިދާޅުވީ މަޖިލީހަށް ހުށަހެޅި އާސަންދައާއި ގުޅޭ ކުއްލި މައްސަލަ ބޭރުކޮށްލި އިރު، ގަވައިދުގައި ބުނާ މުއްދަތު އެބައޮތް ކަމަށެވެ. ކަންބޮޑުވުން ފާޅުކުރައްވާ މައުރޫފް ވިދާޅުވީ އާސަންދަ ލިބުމުގައި ހުރި ގޮންޖެހުންތަކާއި އަދި އާސަންދައިގެ ހިދުމަތް ފޯރުކޮށްދިނުމުގައި ސަރުކާރުން ގެންގުޅޭ އުސޫލުތަކާއި ސިޔާސަތުތައް ރައްޔިތުންނަށް އޮޅި ރައްޔިތުން ތިބީ ވާނުވާގައި ކަމަށެވެ. މީގެ އިތުރުން ރައްޔިތުންނަށް ހިދުމަތް ލިބުމުގައި އުނދަގޫތަކާއި ކުރިމަތިލާންޖެހޭތީ ކަންބޮޑުވުން އޮވެގެން އެމްޑީޕީން ކުއްލި މައްސަލަ ހުށަހެޅީ ކަމަށެވެ.
މައުރޫފް ވިދާޅުވީ އެމްޑީޕީން ކުއްލި މައްސަލަ ހުށަހެޅި އިރު އާސަންދައަށް ބަދަލު ގެނައީ 1 ނޮވެމްބަރުގައި ކަމަށެވެ. ނަމަވެސް ރިޔާސަތުން މައްސަލަ ބޭރުކޮށްލީ ކުއްލި މައްސަލައަކަށް ވަނީ 7 ދުވަހުގެ ތެރޭގައި އުފެދިފައިވާ މައްސަލައަކަށް ވާންޖެހޭ ކަމަށް ވިދާޅުވެއެވެ.
މައުރޫފް ވިދާޅުވީ އެމްޑީޕީގެ މަގުސަދަކަށްވީ އާސަންދައިގެ ހިދުމަތް ރައްޔިތުންނަށް ލިބުމުގައި ހުރި ދަތިތަށް ކަމާއިބެހޭ ފަރާތްތަކަށް ގެނެސް އެ ކަންބޮޑުވުންތައް މަޖިލީހުގެ ތަޅުމުގައި ރެއިސްކުރުން ކަމަށެވެ. މައުރޫފް ވިދާޅުވީ އިސްރާއިލު ޕާސްޕޯޓު މައްސަލައިގައި ވެސް މަޖިލީހުން ކަންތައްކުރީ މިފަދައިން ކަމަށާއި، މި ދައުރު ފެށުނު އިރު ޕާސްޕޯޓުގެ މައްސަލަ ހުށަހެޅުނު ނަމަވެސް އެކަން ޕީއެންސީގެ ސުޕަރމެޖޯރިޓީ އޮންނަށް މަޖިލީހުން ކުރަން ނޫޅޭކަމަށް މައުރޫފް ވިދާޅުވިއެވެ.
