ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވަނީ އެމަނިކުފާނުގެ ދޮންމަންމަ އާ ގުޅުވައިގެން ދައްކާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ. މި ވާހަކަތަކަކީ ސިޔާސީ ވިސްނުމެއްގައި އެމަނިކުފާނުގެ އަގުވައްޓާލުމަށް ދައްކާ ވާހަކަތަކެއް ކަމަށްވެސް ރައީސް ވިދާޅުވިއެވެ.
ދައުލަތުގެ މީޑިއާ ޕީއެސްއެމް އަށް ދެއްވި އިންޓަރވިއުއެއްގައި މިހެން ރައީސް ވިދާޅުވިއިރު، ރައީސް މުއިއްޒުގެ ދޮންމަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން ރާއްޖޭން ޑީޕޯޓު ކޮށްލުމާއި އޭނާ އާ މެދު ޑރ. މުއިއްޒު ކަންތައް ކުރެއްވީ އިހާނެތިކޮށް ކަމަށް ބުނެ އޭނާގެ އަމިއްލަ ތަޖުރިބާ ތަކުގެ މައްޗަށް ތައްޔާރު ކުރި ޑޮކިއުމެންޓްރީ އަކަށް މޯލްޑިވްސް މީޑިއާ ކައުންސިލުން ތަހުގީގީ ދާއިރާ އިން ދޭ އެވޯޑު ލިބުނު މައްސަލަ ގޯސްވެ ސަރުކާރުން އަންގައިގެން އޭސީސީން މީޑިއާ ކައުންސިލަށް ވަދެ، އެ ޑޮކިއުމެންޓަރީ އަށް އެވޯޑު ލިބިފައިވަނީ އިންސާފުން ނޫން ކަމަށް ތުހުމަތުކޮށް ވަނީ ތަހުގީގެއް ފަށާފައެވެ.
މުއިއްޒު ވިދާޅުވީ، އެމަނިކުފާނުގެ ދޮންމަންމަ އަށް ބައްޕާފުޅުގެ ވާރުތަ މުދަލުން އެއްވެސް އެއްޗެއް ނުދޭ ކަމަށް ބުނެ ދައްކަމުންދާ ވާހަކަތަކަކީ ދޮގު ވާހަކަތަކެއް ކަމުގައެވެ. ރައީސް ވިދާޅުވީ އެމަނިކުފާނަކީ އެއްވެސް އިރެއްގައި މީހެއްގެ ޒާތީ ވާހަކަތައް ދައްކާ ބޭފުޅެއް ނޫން ކަމަށާއި، ޚާއްޞަކޮށް ޢާއިލީ ޒާތީ ކަންކަމުގެ ތަފްސީލު ވާހަކަތައް ހިއްސާކުރަން ވަރަށް ދަތިކަމަށެވެ.
ރައީސް ވިދާޅުވި ގޮތުގައި، ބައްޕާފުޅު އަވަހާރަވުމުން ތަރިކަ ބެހުމުގެ ކަންކަން ކުރިއަށް ގެންދިޔައީ އެކަން އޮންނަ އުސޫލުން ކޯޓު މަރުހަލާއިންނެވެ.
ބައްޕާފުޅުގެ ސްރީލަންކާގައި އޮތް ތިން ބިމާއި، އެ ބިންތަކުގައި ޢިމާރާތްކޮށްފައިވާ ޢިމާރާތްތަކާއި ވިޔަފާރިތަކާއި، ލަންކާގައި ބައްޕާފުޅުގެ އެކައުންޓުގައި ހުރި ހުރިހާ ފައިސާއެއް ހިމެނޭ ގޮތަށް ހުރިހާ އެއްޗެއް ދޮންމަންމަ އަށް ހިލޭ، އެއްވެސް ބަދަލަކާ ނުލައި ދީފައިވާނެ ކަމަށެވެ.
މީގެ އިތުރުން، ރައީސް ވިދާޅުވީ ބައްޕާފުޅުގެ ހުވަފަތް އަނބިކަނބަލެއްގެ ގޮތުން މާލެއިން ލިބިވަޑައިގަންނަވާ ބައްޕާފުޅުގެ ތަރިކަ މުދަލުގެ ބައިކުޅަބައި އެއްކޮށް އެމަނިކުފާނަށް ދޫކޮށްލި ކަމަށް ދޮންމަންމަ ބުނެފައިވާ ކަމަށެވެ.
ރައީސް އިތުރަށް ވިދާޅުވީ މިކަން އޮޅުވާލައި ދައްކާ ވާހަކަތަކަކީ ސިޔާސީ ބޭނުމެއްގައި އެމަނިކުފާނުގެ އިސްތަށިފުޅުގައި އަޅުވާ ދޮގު ވާހަކަތަކެއް ކަމަށާއި، މިއާ ޚިލާފަށް އެމަނިކުފާނު ކޮށްފައިވާ އެއްވެސް ކަމެއް ނޯންނާނެ ކަމަށެވެ.
ރައީސް މުއިއްޒުގެ ދޮންމަ އަށް ނިސްބަތްވާ ޑޮކިއުމެންޓްރީ "ސްކީލާން" ގެ ވީޑިއޯކޮޅެއް ޕީއެސްއެމް އިން ދެއްކި މައްސަލަ ހޫނުވެ، ޕީއެސްއެމްގެ އެޑިޓޯރިއަލް ކޮންޓެންޓާ ޚިލާފު އަދިނޫސްވެރި ކަމުގެ މިންގަނޑުތަކާ ޚިލާފު ވީޑިއޯއެއް މޯލްޑިވްސް މީޑިއާ ކައުންސިލުން "ގަސްދުގައި" ދެއްކި ކަމަށް ބުނެ ޕީއެސްއެމް އިން ވަނީ ނޫސްބަޔާނެއްވެސް ނެރެފައެވެ. އަދި މޯލްޑިވްސް މީޑިއާ ކައުންސިލްގެ ރައީސްކަން ކުރައްވަމުން ގެންދަވާ އަހްމަދު މުސްތަފާ ޕީއެސްއެމް ގައި އަދާކުރައްވަމުން ގެންދަވާ ވަޒީފާއިން އެތާނގެ ބޯޑުން ނިންމައިގެން ކުއްލި ގޮތަކަށް ވަކި ކުރުމަށް ފަހު އަލުން ވަޒީފާ ވަނީ އިއާދަކޮށްފައިވެއެވެ.
މޯލްޑިވްސް މީޑިއާ ކައުންސިލުން ބުނެފައިވަނީ އެ ޑޮކިއުމެންޓަރީ އަށް އެވޯޑް ލިބިފައިވަނީ، ފަނޑިޔާރުންގެ ޕެނެލުން ދިން މާކްސް އިން އެވޯޑް ލިބޭ މިންވަރަށް މާކްސް ލިބިގެން އިންސާފުވެރި ކަމާއެކު ކަމަށެވެ.
