ސްޕެނިޝް ލީގުގައި ލަސް ޕަލްމާސްއާ ދެކޮޅަށް ކުޅުނު މެޗުން މޮޅުވެ، އެތުލެޓިކޯ މެޑްރިޑު ތިން ވަނަ އަށް ޖެހިލައިފި އެވެ.

އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އެތުލެޓިކޯ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 37 ވަނަ މިނެޓުގައި އެތުލެޓިކޯ އަށް ލީޑު ނަގައިިދިނީ ޖިއުލިއާނޯ ސިމިއޯން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ނަހުއެލް މޮލީނާ އެވެ. އޭގެ ފަހުން ވެސް އެތުލެޓިކޯ އިން ވަނީ މެޗުގައި ލަނޑު ޖަހަން ފުރުސަތުތަކެއް ތަނަވަސްކޮށްފަ އެވެ.

އެގޮތުން އެތުލެޓިކޯ އަށް ކުޅެމުން އަންނަ ފްރާންސްގެ އެންޓޮއިން ގްރީޒްމަން އަދި އާޖެންޓީނާގެ ހޫލިއަން އަލްވަރޭޒް އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. ނަމަވެސް އޭގެން އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ. މެޗުގެ ފަހު ދިހަ މިނެޓުގެ ތެރޭގައި އެތުލެޓިކޯގެ ދެ ވަނަ ލަނޑު ޖެހީ އެލެގްޒެންޑާ ސޯލޮތު އެވެ. އެއީ ރޮޑްރީގޯ ޑި ޕައުލް ތަނަވަސްކޮށްދިިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ސޯލޮތު ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު އެތުލެޓިކޯ ތިން ވަނައިގައި އޮތީ މިހާތަނަށް ކުޅުނު 12 މެޗުން 23 ޕޮއިންޓު ހޯދައިގެންނެވެ. މިހާތަނަށް އެ ޓީމު ހަ މެޗުން މޮޅުވެފައިވާއިރު، ފަސް މެޗު ވަނީ އެއްވަރުވެފަ އެވެ. ބަލިވެފައި ވަނީ އެއް މެޗުންނެވެ.