ކަރަބޯ ކަޕްގެ ކުއާޓަރ ފައިނަލް އިން އާސެނަލް ވެސް ފުރުސަތު ހޯދައިފި

ކަރަބޯ ކަޕްގެ ގަދަ 16 ވަނަ ބުރުގައި ޕްރެސްޓަން ނޯތު އެންޑާ ދެކޮޅަށް ކުޅުނު މެޗުން މޮޅުވެ، އާސެނަލް ވެސް މުބާރާތުގެ ކުއާޓަރ ފައިނަލް އިން ފުރުސަތު ހޯދައިފި އެވެ.

ޕްރެސްޓަން ނޯތު އެންޑުގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ވެސް އާސެނަލް އިން ވަނީ ދެ ލަނޑު ޖަހައި ލީޑު ނަގައިފަ އެވެ. އަދި މެޗުގައި އާސެނަލްގެ ތިން ވަނަ ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަަމަ ހާފުގެ 24 ވަނަ މިނެޓުގައި އާސެނަލަށް ލީޑު ނަގައިދިނީ ގަބްރިއެލް ޖީސޫސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށް ދިނީ ޑިފެންޑަރު ޖަކުބް ކިވިއޯ އެވެ. އޭގެ ނުވަ މިނެޓު ފަހުން އާސެނަލްގެ ދެ ވަނަ ލަނޑު ޖެހީ އީތަން އެންވަނޭރީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށް ދިނީ ޖީސޫސް އެވެ. މެޗުގައި އާސެނަލްގެ ތިން ވަނަ ލަނޑު، ދެ ވަނަ ހާފު ފަށައިގެން 12 ވަނަ މިނެޓުގައި ޖެހީ ކައި ހަވާޓްޒް އެވެ. އެއީ ކިވިއޯ ތަނަވަސްކޮށް ދިން ފުރުސަތެއްގައި ހަވާޓްޒް ޖެހި ލަނޑެކެވެ.

މުބާރާތުގެ ކުއާޓަރ ފައިނަލްގައި އާސެނަލް ނިކުންނާނީ ކްރިސްޓަލް ޕެލެސްއާ ދެކޮޅަށެވެ. ޕެލެސް އިން ވަނީ ގަދަ 16 ވަަނަ ބުރުގައި އެސްޓަން ވިލާ އާއި ދެކޮޅަަށް ކުޅުނު މެޗުން މޮޅުވެފަ އެވެ.