މިނިސްޓަރ އަމީން އިތުރުފުޅު ހައްދަވައިފި، ކަންތައް ކުރެއްވީ ދިމާ އިދިކޮޅަށް: ޑީއޭއެމް

ސަރުކާރުން ޓެކްސީ ޚިދުމަތް ދިނުމާ ބެހޭ ގޮތުން ޓްރާންސްޕޯޓް މިނިސްޓަރ މުހައްމަދު އަމީން އިތުރުފުޅު ހައްދަަވައިފި ކަމަށާއި، ކަންކުރެއްވީ މުޅިން އިދިކޮޅަށް ކަމަށް ޑްރައިވަރސް އެސޯސިއޭޝަން އޮފް މޯލްޑިވްސް (ޑީއޭއެމް) އިން ބުނެފިއެވެ.

ޑީއޭއެމްގެ ހިންގާ ކޮމިޓީގެ އިސް އޮފިޝަލަކު މި ނޫހާ ވާހަކަ ދައްކަމުން ބުނީ ސަރުކާރުން މާލޭގައި ޓެކްސީ ޚިދުމަތްދޭ ވާހަކަ އާ ގުޅިގެން މި އަހަރުގެ އޮގަސްޓު މަހުގެ 4 ވަނަ ދުވަހު މިނިސްޓަރ އަމީން އާ އެކު ބައްދަލުވުމެއް ބޭއްވި ކަމަށާއި، އެ ބައްދަލުވުމުގައި މިދާއިރާގެ ހުރިހާ ފަރާތްތަކާ މަޝްވަރާކޮށް އަދި ކޮންސަލްޓޭޓިވް ޕްރޮސެސް އެއް ގެންގޮސްފައި ނޫނީ ޓެކްސީ ޚިދުމަތް ނުފަށާނެ ކަމަށާއި، ސަރުކާރުން ޓެކްސީ ޚިދުމަތުގެ ތެރެއަށް ނުވަަންނާނެ ކަމަށް މިނިސްޓަރ ވިދާޅުވި ކަމަށެވެ.

ޑީއޭއެމްގެ އިސް ފަރާތްތަކާ އެކު ބޭއްވި ބައްދަލުވުމުގައި މިނިސްޓަރ އަމީން މިހެން ވިދާޅުވުމަށްފަހު، އަންގާރަ ދުވަހު ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވިދާޅުވީ، ކުރިއަށް އޮތް ދެ ހަފްތާއެއްހާ ދުވަހުގެ ތެރޭގައި ސަރުކާރުން ޓެކްސީ ޚިދުމަތް ފެށުމަށް ސަރުކާރު ހިއްސާވާ ކުންފުންޏަކާ ހަވާލު ކުރައްވާނެ ކަމަށާއި، ޓެކްސީ ޚިދުމަތް ފަށަން ހުރިހާ ކަމެއް ނިމިފައިވާ ކަމަށެވެ.

ޑީއޭއެމްގެ އޮފިޝަލުންނަށް ކުރިން މިނިސްޓަރ ސާފުކޮށްދެއްވި ގޮތުގައި ޓެކްސީ ކުރަން ސަރުކާރަށް ބޭރު ގައުމެއްގެ އެހީގައި ލިބޭ ކާރުތައް ބޭނުން ކުރުމަށް އޮތް އެއްގޮތަކީ އެކާރުތައް ސްކީމެއްގެ ތެރެއިން ޓެކްސީ ކުރަން ބޭނުންވާ ފަރާތްތަކަށް ދޫކުރުން ނުވަތަ ކުރީގެ ކާރުތަކަށް އެކާރުތައް ކުޑަ ފީއެއް ދައްކާގޮތަށް ބަދަލުކުރުން ކަމުގައެވެ.

އޭގެ އިތުރުން މިނިސްޓަރ ވިދާޅުވި ކަމަށް ވަނީ ޓެކްސީ ލައިނެއް ހެދުމަށްފަހު އެވްރެޖްކޮށްލީމަ ލިބޭ ވަރު ކަލްކިއުލޭޓް ކުރުމަށްފަހު، މެއިންޓެނެންސްކުރުން، ސާފުކުރުން އަދި ތެޔޮ އަޅަން ނުޖެހޭ ގޮތަށް މިހާރު ޓެކްސީ ދުއްވާ ފަރާތްތަކަށް ކާރު ދޫކުރުން ކަމަށެވެ.  

މިނިސްޓަރ އެ ބައްދަލުވުމުގައި ޓެކްސީ ކުރަނީ އާމްދަނީ ހޯދަން ކަމަށާއި، އެހެން ކަމުން ޓެކްސީ މަސައްކަތުގެ ތެރެއަށް ސަރުކާރަކުން ނުވަންނާނެ ކަމަށާއި، މިކަން ކުރާނެ ގޮތެއް މަޝްވަރާކޮށްފައި ނޫނީ ނުނިންމާނެ ކަމަށް ތަކުރާރުކޮށް ވިދާޅުވެފައިވެއެވެ.

ޓެކްސީ ލައިން ހެދީމާ ކުރިމަތިވެދާނެ ބިރުވެރިކަމެއް އެބައޮތް ކަމަށް ވިދާޅުވަމުން، މިހާރުވެސް އެބިރުވެރިކަން އެބައޮތް ކަމަށާއި، އެއީ އެހެން ވަޒީފާތަކުގައި ތިބި ހާއްޞަކޮށް ރެގިއުލޭޓްކުރަން ތިބި ފަރާތްތައް މީގެ ތެރެއަށް ވަނީމަ ނުރައްކަލަކަށް ވެދާނެކަން ފާހަގަކުރައްވަމުން ފުލުހުންނާއި ސިފައިން ޓެކްސީ ކުރާތީ މައްސަލަތަކެއް އުޅޭކަން މިނިސްޓަރ ވަނީ ފާހަގަ ކުރައްވާފައެވެ.

"އެހެންވީމާ އެއްވެސް ވަރަކަށް ހާސްވާކަށް ނުޖެހޭ، މިކަންތައް ކުރާށޭ މިއުޅެނީ ބުނީމާ، ޖެހުނީ މިސްއިންފޮމޭޝަންގެ މައްސަލައެއް، އަދި ޑިސްކަޝަން ޕްރޮސެސްއެއް މިއީ." ޑީއޭއެމްގެ އޮފިޝަލުންނާ އެކު ބޭއްވި ބައްދަލުވުމުގައި މިނިސްޓަރ ވިދާޅުވިއެވެ.

މިނިސްޓަރ އިތުރަށް އެ ބައްދަލުވުމުގައި ސާފުކޮށްދެއްވި ގޮތުގައި، އެހީގެ ގޮތުގައި ކާރުތައް ލިބެން އަންނަނީ 2025 ވަނަ އަހަރުގެ ފަހުކޮޅު ކަމަށާއި، ޑީއޭއެމް އާ މަޝްވަރާ ކޮށްފައި ނޫނީ އެއްވެސް ކަމެއް ނުނިންމާނެ ކަމަށެވެ.

ސަރުކާރުން ސެޕްޓެމްބަރު މަހު ފުރަތަމަ ދުވަހު ޓެކްސީ ޚިދުމަތާ ބެހޭ ގޮތުން މަޝްވަރާތައް ފަށަން ހަމަ ޖައްސާފައި އޮތް ކަމަށް ޑީއޭއެމް އަށް މިނިސްޓަރ މައުލޫމާތު ދެއްވި ނަމަވެސް އެ ބައްދަލުވުމުގެ ފަހުން މިކަމާބެހޭ އެއްވެސް ޚަބަރެއް މިނިސްޓްރީން ނުވާ ކަމަށްވެސް މި ނޫހާ ވާހަކަ ދެއްކި އޮފިޝަލް ހާމަކޮށްފައިވެއެވެ.