ޑެޕިއުޓީ ޕްރޮސެކިއުޓާ ޖެނެރަލް އަލީ ސަމީރު އެ މަގާމުން ހޯމަ ދުވަހު އިސްތިއުފާ ދެއްވައިފި އެވެ.
މަގާމުން އިސްތިއުފާ ދެއްވިކަން އޭނާގެ އަމިއްލަ ފޭސްބުކް ޕޭޖުގައި ކުރެއްވި ޕޯސްޓެއްގައި ވަނީ ހާމަކުރައްވާފައެވެ.
ހައި ކޯޓުގެ ފަނޑިޔާރުކަންވެސް ކުރިން ކުރެއްވި ސަމީރަކީ، ކުރީގެ ޕްރޮސެކިއުޓާ ޖެނެރަލް ހުސެއިން ޝަމީމްއާ އެކު މިސްރުގެ އަޒްހަރު ޔުނިވާސިޓީން ތައުލީމު ހާސިލުކުރެއްވި ބޭފުޅެކެވެ.
ސަމީރު ވަނީ މެލޭޝިޔާގެ އިންޓަނޭޝަނަލް އިސްލާމިކް ޔުނިވާސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ވެސް ހާސިލުކުރައްވާފައެވެ.
ސަމީރު އަދާކުރައްވާފައިވާ މަގާމުތަކުގެ ތެރޭގައި ޖިނާއީ ކޯޓުގެ ސެކްރެޓަރީކަމާއި، މަދަނީ ކޯޓުގެ ސީނިއާ އެޑްމިން އޮފިސަރުކަމާއި، މަދަނީ ކޯޓުގެ ގާޒީކަމާއި، މަދަނީ ކޯޓުގެ އިސް ގާޒީކަމާއި، އަދި ސިވިލް ކޯޓުގެ އިސް ގާޒީކަން ހިމެނެއެވެ.
މިދިޔަ އަހަރުގެ އޮގަސްޓް 22 ވަނަ ދުވަހު، ރައްޔިތުންގެ މަޖިލީހުގެ ޖަލްސާއެއްގައި ޕްރޮސެކިއުޓާ ޖެނެރަލް ހުސެއިން ޝަމީމް މަގާމުން ވަކިކުރުމަށް ވޯޓު ނެގުމުގެ ކުރިން، ޝަމީމް ވަނީ އިސްތިއުފާ ދެއްވާފައެވެ. ނަމަވެސް، މަޖިލީހުން ވަނީ އޭނާ މަގާމުން ވަކިކުރުމަށް ވޯޓުލައި ފާސްކޮށްފައެވެ.
ޝަމީމްގެ އިސްތިއުފާއާ ގުޅިގެން ހުސްވި ޕްރޮސެކިއުޓާ ޖެނެރަލްގެ މަގާމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަނުކުރެއްވީ އޭރު އެމަނިކުފާނުގެ ލީގަލް ސެކްރެޓަރީގެ މަގާމުގައި ހުންނެވި އައްބާސް ޝަރީފެވެ.
