ސަރުކާރުން ބަޖެޓް ޚަރަދު ކުރި ގޮތް ރައްޔިތުންނަށް ސިއްރު ކުރަން ފާސްކޮށްފި

2024 ވަނަ އަހަރަށް ފާސްކުރި ބަޖެޓު މިހާތަނަށް ޚަރަދު ކުރި ގޮތް ރައްޔިތުންނަށް ސިއްރުކުރަން ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީގައި ހިމެނޭ ސަރުކާރު މެމްބަރުން ވޯޓު ދީގެން ފާސްކޮށްފިއެވެ.

19 ވަނަ ރައްޔިތުންގެ މަޖިލީހުން ފާސްކުރި 2024 ވަނަ އަހަރުގެ 49 ބިލިއަން ރުފިޔާގެ ބަޖެޓުގެ އިތުރަށް ސަރުކާރުން ސަޕްލިމެންޓަރީ ބަޖެޓެއް މަޖިލީހަށް ހުށަހެޅުމުން، އެ ބަޖެޓް ދިރާސާ ކުރުމަށް ނެގި މަޖިލީހުގެ ކޮމިޓީގެ އާދިއްތަ ދުވަހުގެ ބައްދަލުވުމުގައި، ބަޖެޓުން މިއަދާ ހަމައަށް ހަރަދުކުރި ގޮތުގެ ތަފުސީލު ހާމަ ކުރުމަށް ހަނިމާދޫ ދާއިރާގެ އެމްޑީޕީ އަށް ނިސްބަތްވާ މެމްބަރ އަބްދުލް ޣަފޫރު މޫސާ ހުށަހަޅުއްވާ، ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ތާއީދު ކުރެއްވުމުން އެ ހުށަހެޅުން، ސަރުކާރަށް ނިސްބަތްވާ ޕީއެންސީގެ މެމްބަރުންނާއި ޖުމްހޫރީޕާޓީގެ ލީޑަރުގެ ވޯޓުން ވަނީ ފެއިލު ކޮށްލާފައެވެ.

މެމްބަރު ޣަފޫރުގެ ހުށަހެޅުއްވުމަށް ތާއީދު ކުރައްވާ އެމްޑީޕީ އަށް ނިސްބަތްވާ 3 މެމްބަރުންނާއި އެމްޑީއޭ އަށް ނިސްބަތްވާ މެމްބަރު މުހައްމަދު އައްބާސް ވޯޓު ދެއްވި އިރު، އެ ހުށަހެޅުން ފާސްކުރަން ނުފެންނަ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި ޕީއެންސީ އަށް ނިސްބަތްވާ 14 މެމްބަރުން ވަނީ ވޯޓު ދީފައެވެ.

މި އަހަރުގެ ބާކީ ބަޔަށް ބޭނުންވާ ހަރަދުތައް ހަމަޖެއްސުމަށް ކަމަށް ބުނެ ސަރުކާރުން ވަނީ 5.1 ބިލިއަން ރުފިޔާގެ ބަޖެޓެއް މަޖިލީހަށް ހުސްވި ހަފްތާގައި ހުށަހަޅާފައެވެ.

ސަރުކާރުން އިތުރަށް މިއަހަރަށް 5.1 ބިލިއަން ރުފިޔާގެ ބަޖެޓެއް ހުށަހެޅުމުން، މަޖިލީހުގައި ހިމެނޭ އެމްޑީޕީގެ މެމްބަރުން ވަނީ ވަރަށް ބޮޑަށް އެކަމަށް ފާޑުކިޔާފައެވެ. އިދިކޮޅު މެމްބަރުން ވިދާޅުވީ، 49 ބިލިއަން ރުފިޔާގެ ބަޖެޓުން މިހާ ހިސާބަށް އައިއިރު ހަރަދު ކުރެވިފައިވާ ކަމަށް އޮތީ އެންމެ 18 ބިލިއަން ރުފިޔާ ކަމަށާއި، ބާކީ 31 ބިލިއަން ރުފިޔާއަށް ވީ ގޮތެއް ނޭނގޭ ކަމުގައެވެ. އިދިކޮޅު މެމްބަރުންގެ ކަންބޮޑުވުމަކީ، 31 ބިލިއަނަށް ވީ ގޮތެއް ހާމަނުކޮށް އިތުރު ފަސް ބިލިއަން ރުފިޔާ ހޯދުމަށް ސަރުކާރުން ހުށަހެޅުމެވެ.

ސަޕްލިމެންޓަރީ ބަޖެޓަށް ވާހަކަފުޅު ދައްކަވަމުން ހުސްވި ހަފްތާގައި ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވީ ސަރުކާރުން އިތުރު ބަޖެޓެއް ހޯދުމަށް ހުށަހަޅާފައިވާއިރު، އެއްވެސް ޕްރޮޖެކްޓެއް ހިނގާ މަންޒަރެއް ނުފެންނަ ކަމަށާއި އެހެން ނަމަވެސް ރާއްޖޭގެ ތާރީޚުގައި ދުވަހަކުވެސް ޚަރަދު ނުކުރާ ވަރަށް މި ސަރުކާރުން ޚަރަދު ކޮށްފި ކަމުގައެވެ.

"އެއްވެސް ޕްރޮޖެކްޓެއް ހިނގާ މަންޒަރެއް ނުފެނޭ. ހަރަދު ވެއްޖެ ދުވަހަކު ވެސް ހަރަދު ނުވާ ވަރަށް. އެ ހަރަދު ހިނގި ގޮތެއް ފެންނާކަށް ނެތް،" މައުރޫފް ވިދާޅުވިއެވެ.

ބަޖެޓު ދިރާސާ ކުރާ ކޮމިޓީއަށް ފިނޭންސް މިނިސްޓަރު މޫސާ ޒަމީރު ހޯމަ ދުވަހު ހާޒިރުވުމަށް ވަނީ ހަމަޖެހިފައިވާއިރު، ސަޕްލިމެންޓަރީ ބަޖެޓު ހުށަހަޅުއްވަމުން ފިނޭންސް މިނިސްޓަރ ވިދާޅުވީ، މިހާތަނަށް ޚަރަދުވެފައިވަނީ 37 ބިލިއަން ރުފިޔާ ކަމުގައެވެ. އެހެން ނަމަވެސް އެ ޚަރަދުތަކުގެ ތަފްސީލު މިނިސްޓަރ ހާމަކުރައްވާއެއް ނުވެއެވެ.

ކޮންމެ މަހަކު އެއްފަހަރު ދައުލަތުގެ ޚަރަދާއި އާމްދަނީގެ ހިސާބުތައް އާންމު ކުރަން ގާނޫނު ލާޒިމު ކުރި ނަމަވެސް ޑރ. މުއިއްޒުގެ ސަރުކާރުން ޖޫން މަހުގެ 20 ވަނަ ދުވަހުން ފެށިގެން ދައުލަތުގެ މާލީ ހިސާބުތައް އާންމު ކޮށްފައެއް ނުވެއެވެ.

ދައުލަތުގެ މާލީ ހިސާބުތައް އާންމު ނުކުރާތީ އާންމުންގެ ފާޑުކިޔުން ސަރުކާރަށް އަމާޒުވެފައިވާއިރު، ވޯލްޑް ބޭންކުންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ.