ބޯންމައުތު އަތުން ބަލިވެ އާސެނަލަށް ނުތަނަވަސްކަން

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ، ލީގު ތާވަލްގެ އެއް ވަނަ އަށް ޖެހިލަން ލިބުނު ފުރުސަތު އާސެނަލް އިން ނަގާލައިފި އެވެ.

ބޯންމައުތުގެ ދަނޑުގައި ކުޅުނު މެޗުގައި އެ ޓީމުން ވަނީ 2-0 އިން އާސެނަލްގެ މައްޗަށް ކުރި ހޯދައިފަ އެވެ. ބޯންމައުތުން މެޗުގެެ ދެ ލަނޑު ވެސް ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި އާސެނަލްގެ ވިލިއަމް ސަލީބާ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އެކަމުގެ ސަބަބުން މެޗުގެ ބާކީ ބައި 10 ކުޅުންތެރިންނާ އެކު ކުޅެމުން ދިޔަ އާސެނަލަށް އުނދަގޫތަކާ ކުރިމަތިލާން ޖެހުނެވެ.

މެޗުގެ 70 ވަނަ މިނެޓުގައި ބޯންމައުތުގެ ފުރަތަމަ ލަނޑު ޖަހައި އެ ޓީމަށް ލީޑު ނަގައިދިނީ ރަޔާން ކްރިސްޓީ އެވެ. ބޯންމައުތުގެ ދެ ވަނަ ލަނޑަކީ އާސެނަލްގެ އޭރިޔާ ތެރެއިން އެ ޓީމުގެ ގޯލު ކީޕަރު ޑޭވިޑް ރަޔާ ބޯންމައުތު ކުޅުންތެރިޔަކަށް ކުރި ފައުލަކާ ގުޅިގެން ރެފްރީ ދިން ޕެނަލްޓީ އަކުން ޖެހި ލަނޑެކެވެ. ޕެނަލްޓީ ކާމިޔާބުކޮށް އެ ޓީމުގެ ދެ ވަނަ ލަނޑު ޖެހީ ޖަސްޓިން ކްލައިވަޓް އެވެ.

ނަތީޖާ އާއެކު އާސެނަލް އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު އަށް މެޗުން 17 ޕޮއިންޓާ އެކު އެވެ. ފަސް މެޗުން އާސެނަލް މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ބޯންމައުތު އަތުން ވީ ބައްޔަކީ މި ސީޒަންގެ ލީގުގައި އާސެނަލްގެ ފުރަތަމަ ބައްޔެވެ.