ކޮންޓްރެކްޓަރުންނަށް އަދަބު ދެވޭނެ ގަވައިދެއް ހަދައިފި

ދައުލަތުގެ ޓެންޑަރުތަކުގައި ބައިވެރިވާ ބިޑަރުންނާއި، ސަޕްލަޔަރުންނާއި، ކޮންޓްރެކްޓަރުންނަށް އަދަބު ދެވެނޭ އައު ގަވާއިދެއް މިނިސްޓްރީ އޮފް ފިނޭންސް އިން ތަޢާރަފުކޮށްފިއެވެ.

މި ގަވާއިދުގައި މިހާތަނަށް މާލިއްޔަތު ގަވާއިދު ނުވަތަ މާލިއްޔަތު ޤާނޫނުގައި ނުހިމެނޭ ކުށްތަކަށް އަދަބު ކަނޑައަޅާފައިވެއެވެ.

މި ގަވާއިދުގައި 16 ބާވަތެއްގެ ކުށް ހިމަނާފައިވެއެވެ. މީގެ ތެރޭގައި ދޮގު ލިޔެކިޔުންތައް ހުށަހެޅުމާއި، މުހިންމު މަޢުލޫމާތު ފޮރުވުމާއި، އެހެން ބިޑަރުންނަށް ހުރަސްއެޅުމަށް މަސައްކަތްކުރުން ފަދަ ކުށްތައް ހިމެނެއެވެ.

މި ފަދަ މައްސަލަތައް ތަޙުޤީޤުކޮށް ފިޔަވަޅު އެޅުމުގެ މަސްއޫލިއްޔަތު މި ގަވައިދުގެ ދަށުން ޕްރޮކިއުމަންޓް އެޕީލް ބޯޑާ ވަނީ ހަވާލުކޮށްފައެވެ.

ގަވައިދު ބުނާ ގޮތުން، ގަވައިދުގައި ކަނޑައަޅާފައިވާ ކުށެއް ކޮށްފިނަމަ، ބިޑުގެ ޖުމްލަ އަގުގެ 2.5 އިން ސައްތަ އަށްވުރެ ބޮޑުނޫން އަދަދަކުން ޖޫރިމަނާ ކުރެވިދާނެއެވެ. ޖޫރިމަނާގެ އަދަދު ކަނޑައަޅާނީ ކުށުގެ ކުޑަބޮޑުމިނަށް ބަލައިގެން ކަމަށް ގަވައިދުގައި ބުނެއެވެ.

ޖޫރިމަނާ ކުރުމުގެ އިތުރުން، ކުށެއް ކުރި ފަރާތަކަށް ކުރިއަށް އޮތްތަނުގައި ބިޑު ހުށަހެޅުމުގެ ފުރުސަތު ނުދިނުމަށް ނިންމިދާނެ ކަމަށް ގަވައިދުގައި ވެއެވެ. މިގޮތުން ކުށެއް ކުރީ ފުރަތަމަ ފަހަރު ނަމަ 3 މަހާއި 1 އަހަރާ ދެމެދުގެ މުއްދަތަކަށް، ދެވަނަ ފަހަރު ނަމަ 2 އަހަރާއި 3 އަހަރާ ދެމެދުގެ މުއްދަތަކަށް، އަދި އޭގެ އިތުރަށް ކުށެއް ކޮށްފިނަމަ 5 އަހަރަށް ވުރެ ދިގުނޫން މުއްދަތަކަށް ބިޑު ހުށަހެޅުމުގެ ފުރުސަތު ބަންދު ކުރެވިދާނެ ކަމަށް ގަވައިދުގައި ވެއެވެ. މީގެ އިތުރުން، ކުރީގެ ސަސްޕެންޝަނަކަށްފަހު 3 އަހަރުގެ ތެރޭގައި އައު ކުށެއް ކޮށްފިނަމަ، ސަސްޕެންޝަންގެ މުއްދަތު އިތުރުކުރެވިދާނެ ކަމަށްވެސް ގަވައިދުގައި ކަނޑައަޅާފައިވެއެވެ.

ޖޫރިމަނާ ނުވަތަ ސަސްޕެންޝަނަށް ހުށަހެޅޭ ފަރާތްތަކަށް އެކަމުގެ ސަބަބު ބަޔާންކޮށް އެންގުމާއެކު އެ ފަރާތަކަށް އެކަމަށް ޖަވާބުދާރީވުމަށް 5 ދުވަސް ދޭން ޖެހޭނެ ކަމަށް ގަވައިދު ބުނެއެވެ.