ރެސްޓޯރެންޓުތަކާއި ކެފޭތަކުން ރޭގަނޑު 11:30 އާހަމައަށް ޑައިނިންގގެ ޚިދުމަތް ދެވޭނެ
މިހާރު ވެސް އަމަލުކުރަމުންދާ ގޮތަށް 24 ގަޑިއިރު ޑެލިވަރީގެ ޚިދުމަތް ދެވޭނެ
މިނޫޝިއާ ރެސްޓޯރެންޓް
ރެސްޓޯރެންޓުތަކާއި ކެފޭތަކުން ރޭގަނޑު 11:30 އާހަމައަށް ޑައިނިންގ ގެ ޚިދުމަތް ދެވޭނެ ކަމަށް ސަރުކާރުން ހާމަކޮށްފިއެވެ.
ކޮވިޑުގެ ކޭސްތައް އިތުރުވުމާ ގުޅިގެން ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ. އަދި މި މަހުގެ އެއްވަނަ ދުވަހު ލުއިތައް ދީފައިވާއިރު ސަރުކާރުން މިވަނީ އަނެއްކާވެސް ކުރިން އަޅާފައިވާ ފިޔަވަޅުތަކަށް ލުއިތައް ދީފައެވެ. އެގޮތުން ޖުލައި މަހުގެ 7 ވަނަ ދުވަހުން ފެށިގެން ރެސްޓޯރެންޓުތަކާއި ކެފޭތަކުން ރޭގަނޑު 11:30 އާހަމައަށް ޑައިނިންގގެ ޚިދުމަތް ދިނުމުގެ ހުއްދަ ވަނީ ދީފައެވެ. އަދި މިހާރު ވެސް އަމަލުކުރަމުންދާ ގޮތަށް 24 ގަޑިއިރު ޑެލިވަރީގެ ޚިދުމަތް ދެވޭނެ ކަމަށާއި ކަނޑައެޅިފައިވާ މިންގަނޑުތައް ތަންފީޒުކުރުމާއި މޮނިޓަރ ކުރުން ހަރުދަނާ ކުރާނެ ކަމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސްގެ ތަރުޖަމާން މަބްރޫކް އަޒީޒް ވަނީ ވިދާޅުވެފައެވެ.
ކުރިން ކާބޯތަކެތީގެ ޚިދުމަތް ފޯރުކޮށްދޭ ތަންތަނަށް ދިން ލުއިތަކުގެ ތެރޭގައި ރޭގަނޑު އަށެއް ޖެހުމާ ހަމައަށް ޑައިނިންގގެ ޚިދުމަތް ދެވޭ ގޮތަށް ވަނީ ކަނޑައަޅާފައެވެ. ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ތަންތަނުން، ހެލްތް ޕްރޮޓެކްޝަން އެޖެންސީން ކަނޑައަޅާ އުސޫލުތަކާ އެއްގޮތަށް އަމަލުކުރުމަށް ވަނީ އިލްތިމާސްކޮށްފައެވެ. މީގެ އިތުރުން ސިނަމާތައް ގައިޑްލައިނާ އެއްގޮތަށް ޚިދުމަތް ދިނުމަށް ހުޅުވާލާފައިވާއިރު ރީޓެއިލް ޚިދުމަތް ދޭ ތަންތަނަށް ކާފިއު ގަޑި ބަދަލުވުމާ ގުޅިގެން ޚިދުމަތްދޭ ތަންތަން ބަންދުކުރާ ގަޑިތައް މި ވަނީ އިތުރުކޮށްފައެވެ.
ކާބޯތަކެތީގެ ޚިދުމަތް ފޯރުކޮށްދޭ ތަންތަނުންނާއި އަމިއްލަ ޖިމް، ސެލޫން ވިޔަފާރި ހިންގާ ފަރާތްތަކުން ވަނީ އެތަންތަން ބަންދުކުރުމާ ގުޅިގެން މީގެ ކުރިން ކަންބޮޑުވުން ފާޅުކޮށްފައެވެ. އެގޮތުން ކާބޯތަކެތީގެ ޚިދުމަތް ފޯރުކޮށްދޭ ފަރާތްތަކުން ވަނީ ފިޔަވަޅުތައް ހަރުކަށިކޮށް ކެފޭ/ރެސްޓޯރެންޓުތަކުން ޑައިން އިން ގެ ޚިދުމަތް ފޯރުކޮށްނުދެވޭތީ އެމީހުންގެ ވިޔަފާރިތަކަށް ގެއްލުންވަމުންދާކަމަށް ބުނެފައެވެ. ސަރުކާރުން ވަނީ ވިޔަފާރިތަކަށް ގެއްލުންވާތީވެ މާލީ ގޮތުން އެހީތެރިކަން ފޯރުކޮށްދިނުމަށްޓަކައި ވަކި ޕްލޭންތަކެއް ވެސް ތައާރަފުކޮށްފައެވެ.
