ޣައްޒާގެ ޖަބާލިޔާ ކޭމްޕަށް އިޒްރޭލުން ހަމަލާދީ 33 މީހުން ޝަހީދުކޮށްލައިފި
ޒަޚަމްވި މީހުންގެ އަދަދު ގިނަ ކަމާއެކު އެއެންމެންނަށް ފަރުވާދޭނެ ވަސީލަތްތައް ހޮސްޕިޓަލުގައި ނެތް ކަމަށް އަލް-އަވްދާ ހޮސްޕިޓަލުން ވަނީ ބުނެފައި
ޣައްޒާގެ އެކި ސަރަހައްދުތަަކަށް އިޒްރޭލުން ދިން ހަމަލާތަކުގެ ސަބަބުން ބޯ ދުން އަރަނީ، އޮކްޓޯބަރ 17، 2024
އިޒްރޭލުން ޣައްޒާގެ އުތުރުގައިވާ ޖަބާލިޔާ ކޭމްޕަށް ދިން ހަމަލާއެއްގައި މަދުވެގެން 33 ފަލަސްތީނު މީހުން ޝަހީދުވެ، 80 އަށްވުރެ ގިނަ މީހުންނަށް އެކިވަރުގެ ޒަޚަމްތައް ލިބިއްޖެއެވެ.
މި ކޭމްޕަށް ޔަހޫދީ ސިފައިން ހަމަލާ ދިން އިރު، އެ ސަރަހައްދު ހިސޯރުކޮށް، ކޭމްޕްގައި ދިރިއުޅޭ ފަލަސްތީނުގެ ރައްޔިތުންނަށް ދަތިތައް ކުރިމަތި ކުރަމުންދާތާ ދެ ހަފްތާއަށްވުރެ ގިނަ ދުވަސް ފާއިވެފައިވާކަން ފާހަގަ ކުރެވެއެވެ.
އެ ސަރަހައްދުގައި ދިިރިއުޅޭ މީހުން ބުނާ ގޮތުގައި އިޒްރޭލު ސިފައިން ކޮންމެ ދުވަހަކު ގެންދަނީ އެ ކޭމްޕްގެ ގިނަ އަދަދެއްގެ ގެތަކަށް ހަމަލާދީ ހަލާކުކުރަމުންނެވެ. މިކަން ކުރަނީ ވައިގެ މަގުންނާއި، އެއްގަމު މަގުން ހަމަލާދީ، އަދި އިމާރާތްތަކުގައި ބޮން ހަރުކޮށް ދުރުގައި ތިބެގެން ގޮއްވާލައިގެންނެވެ.
އަލް-އަވްދާ ހޮސްޕިޓަލުގެ އެކްޓިންގ ޑިރެކްޓަރ ޑރ. މުޙައްމަދު ސަލްޙާ އަލް-ޖަޒީރާ އަށް މައުލޫމާތު ދެމެން ބުނެފައިވަނީ ޖަބާލިޔާއަށް އިޒްރޭލުން މި ދިން އެންމެ ފަހުގެ މަރުގެ ހަމަލާގައި އަނިޔާވި 70 އެއްހާ މީހުންނަށް ފަރުވާ ދިނުމަށް ބޭނުންވާ ވަސީލަތްތަކެއް އެ ހޮސްޕިޓަލަކު ނެތެވެ. ޒަޚަމްވި މީހުންގެ ތެރޭގައި ގިނައީ އަންހެނުންނާއި ކުޑަކުދިން ކަން އޭނާ ފާހަގަ ކުރިއެވެ.
ޙަމާސްގެ ލީޑަރު ޔަޙްޔާ ސިންވާރު ޝަހީދު ކޮށްލުމަށްފަހުވެސް ހަމާސް ބުނެފައިވަނީ އިޒްރޭލަށް އަމާން ނުދޭނެ ކަމުގައެވެ. އެ ޖަމާޢަތުން ބުނާ ގޮތުގައި "ޣައްޒާއަށް ދެމުންދާ އަނިޔާވެރި ހަމަލާތައް ހުއްޓާ، އިޒްރޭލުގެ ސިފައިން އެއްކޮށް ފަހަތަށް ޖެހި، އިޒްރޭލުގައި ހައްޔަރުކޮށްފައި ތިބި ފަލަސްތީނު މީހުން ދޫކޮށްނުލާހާ ހިނދަކު،" އެ ޖަމާއަތުގެ އަތްދަށުގައި ތިބި އިޒްރޭލުގެ ރަހީނުން ދޫކޮށް ނުލާނެއެވެ.
2023 އޮކްޓޯބަރު 7 އިން ފެށިގެން އިޒްރޭލުން ޣައްޒާއަށް ދިން ހަމަލާތަކުގައި މަދުވެގެން 42،500 މީހުން މަރުވެ، 99،546 މީހުންނަށް އަނިޔާވެފައިވެއެވެ.
