ޕީއެސްއެމް ހިޔާނާތުގެ މައްސަލަ ޖުލައި މަހުން ފެށިގެން ދަނީ ތަހުގީގު ކުރަމުން: އޭސީސީ

ޕަބްލިކް ސަރވިސް މީޑިއާ (ޕީއެސްއެމް) ހިޔާނާތުގެ މައްސަލަ ޖުލައި މަހުން ފެށިގެން ތަހުގީގު ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.

އާދިއްތަ ދުވަހު އޭސީސީން ބުނީ ޕީއެސްއެމްއިން ޑޮލަރު ގަތުމަށް ނެގި ފައިސާ އާއި އާމްދަނީގެ ގޮތުގައި ބަލައިގަނެފައިވާ ފައިސާއާގުޅޭ މައްސަލަ އެ ކޮމިޝަނުން ތަހުގީގު ކުރަމުންދާ ކަމަށެވެ.

އޭސީސީން ބުނީ މި މައްސަލައިގެ ''ޕްލިމިނަރި ތަހުގީގު'' ނިންމައި އިތުރަށް ތަހުގީގު ކުރަންޖެހޭ ކަންކަން ހުރުމާއެކު މި މައްސަލަ އިތުރަށް ތަހުގީގު ކުރަމުންދާ ކަމަށެވެ.

މީގެ އިތުރުން އެކޮމިޝަނުން ބުނީ މި މައްސަލައާއި ގުޅުންހުރި ޕީއެސްއެމްގެ ޚާއްސަ އޮޑިޓް ކުރިއަށް ދިޔައިރު އޮޑިޓަރ ޖެނެރަލް އޮފީހުން މި ކޮމިޝަނާ މަޝްވަރާކޮށް، މައްސަލައާއި ގުޅުންހުރި ހެއްކާއި ގަރީނާއަށް އަސަރު ނުކުރާނެ ގޮތަށް ދެ މުއައްސަސާއިން އެކުގައި މަސައްކަތް ކޮށްފައިވާ ކަމަށެވެ.

އޭސީސީން ބުނީ ސެޕްޓެންބަރު މަހުގެ ތެރޭގައި ދިވެހި ފުލުހުންގެ ޚިދުމަތުން ވެސް މިމައްސަލަ އޭސީސީއަށް ހުށަހަޅާފައިވާ ކަމަށެވެ.

މިމައްސަލައާ ގުޅޭގޮތުން ރާއްޖެއެމްވީއަށް އޭސީސީގެ އޮފިޝަލް ވިދާޅުވީ މި މައްސަލައަކީ ޕީއެސްއެމްއިން އެ ކޮމިޝަނަށް ހުށަހަޅައިގެން ޖުލައި މަހުން ފެށިގެން ތަހުގީގު ކުރަމުން އަންނަ މައްސަލައެއް ކަމަށެވެ. އަދި ތަހުގީގު ކުރިއަށްދާތީ އިތުރު މައުލޫމާތު ހާމަކުރެވެން ނެތް ކަމަށާއި، ތަހުގީގު ކުރިއަށްދާވަރަކުން މައުލޫމާތު ހިއްސާކުރަމުންދާނެ ކަމަށް އޮފިޝަލް ވިދާޅުވިއެވެ.

ޕީއެސްއެމްގެ އޮޑިޓް ރިޕޯޓްބުނާ ގޮތުގައި ޕީއެސްއެމްއަށް ޑޮލަރު ގަންނަން ކަމަށް ބުނެ ނެގި ފައިސާއިން ނުވަ މިލިއަން ރުފިޔާ މަދުވާކަން ފާހަގަކުރެވެއެވެ. އަދި ޑޮލަރު ގަތުމުގެ މުއާމަލާތްތަކުގެ ތެރެއިން ޕީއެސްއެމްގެ ކުރީގެ ފައިނޭންސް ޑިރެކްޓަރު، އަހުމަދު ހަނީފު އާއި އޭނާގެ ދަރިއެއްގެ އެކައުންޓަށް ފައިސާ ޖަމާކުރިކަން އޮޑިޓް ރިޕޯޓުން ހާމަވެއެވެ.

އޮޑިޓް ރިޕޯޓުގެ މައުލޫމާތަށް ބަލާއިރު، ޑޮލަރު ގަތުމުގެ ނަމުގައި އެ ކުންފުނީގެ ބޭންކު އެކައުންޓުން 4،583،701ރ. ވަނީ ގެއްލިފައެވެ. އަދި 2017 އިން 2024 ގެ ނިޔަލަށް ޕީއެސްއެމްއަށް އާމްދަނީ އަދި އެހެނިހެން ގޮތް ގޮތުން ލިބިފައިވާ 4،260،295ރ. ގެއްލިފައިވާކަން އެ ރިޕޯޓުން އެނގެއެވެ. މީގެ އިތުރުން ތިޖޫރީން 190،087ރ. ގެއްލިފައިވާ ކަމަށް ވެސް އެ ރިޕޯޓުން ހާމަވެއެވެ.