ޒުހޫރު ވިދާޅުވީ ފުޓުބޯޅަ ސީޒަން ފެށޭނެ ދުވަހެއް ނޭނގޭ ކަމަށް

ދިވެހި ރާއްޖޭގެ ފުޓުބޯޅަ ސީޒަން ނުފެށި ދިގުލައިގެން ގޮސްފައިވާއިރު، ފުޓުބޯޅަ ސީޒަން ފެށޭނެ ދުވަހެއް ނޭނގޭ ކަމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީގެ ޗެއާމަން، އަދި ކުރީގެ ވަޒީރު އަޙުމަދު ޒުހޫރު ވިދާޅުވެއްޖެ އެވެ.

ޒުހޫރު މިހެން ވިދާޅުވީ، އެފްއޭއެމްގެ ނޯމަލައިޒިން ކޮމެޓީން ކުރަމުން އަންނަ މަސައްކަތްތަކުގެ އެންމެ ފަހުގެ މައުލޫމާތު ހިއްސާ ކުރުމަށް، ބުދަ ދުވަހު ގަލޮޅު ރަސްމީ ދަނޑުގައި ބޭއްވި ނޫސްވެރިންގެ ބައްދަލުވުމުގަ އެވެ. ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރާއްޖެ ނޯމަލައިޒް ކޮށްފައިވާއިރު، މިއީ އެ ކޮމެޓީން ނޫސްވެރިންނާ ބައްދަލު ކުރި ފުރަތަމަ ފަހަރެވެ.

އެ ބައްދަލުވުމުގައި ވާހަކަ ދައްކަވަމުން ޒުހޫރު ވިދާޅުވީ، ފުޓުބޯޅަ ސީޒަން ފެށޭނެ ވަކި ތާރީޚެއް ދެންނެވެން ނެތް ކަމަށެވެ. އެކަމުގެ ސަބަބެއްގެ ގޮތުގައި ޒުހޫރު ވިދާޅުވީ، އެފްއޭއެމްގެ ނޯމަލައިޒިން މަރުޙަލާ ފެށިފައިވާ ކަމަށެވެ. އެ މަރުޙަލާ ފެށި، ފުޓުބޯޅަ ސީޒަނެއް ފަށަން ބެލި ނަމަވެސް، މިވަގުތު އެފްއޭއެމްގެ ސްޓެޓިއުޓްސް ގައި ހުރި ބައެއް ކޮމެޓީ ތަކަކީ ހުސްވެފައިވާ ކޮމެޓީތަކެއް ކަމަށް ވެސް ޒުހޫރު ވިދާޅުވި އެވެ.

އެކަން ފާހަގަ ކުރައްވައި ޒުހޫރު ވިދާޅުވީ އެ ކޮމެޓީތައް އެކުލަވާލައިގެން މެނުވީ، ފުޓުބޯޅަ ސީޒަން ފަށައިގަނެވެން ވެސް ނެތް ކަމަށެވެ. ހަމަ އެއާއެކު ފައިސާގެ ދަތިކަން އިންތިހާ އަށް އޮތް ކަމަށާއި، "ދަރާފައި" ކަމަށް ޒުހޫރު ވިދާޅުވެފައިވެ އެވެ. އެހެން ނަމަވެސް، ކުލަބުތަކަށް ދޭން ޖެހޭ ފައިސާގެ އަދަދުތަކަށް ބަލާއިރު، އެ ފައިސާ އަކީ މުސްތަޤުބަލުގައި މެނޭޖު ކުރެވޭނެ ފައިސާ ކަމަށް ވެސް ޒުހޫރު ވިދާޅުވި އެވެ.

މީގެ އިތުރުން ޒުހޫރު ވިދާޅުވީ ކުލަބުތައް ހިންގުމަށް ފައިސާ ދިނުމަކީ އެފްއޭއެމްގެ މެންޑޭޓުގައި އޮތް ކަމެއް ނޫން ކަމަށެވެ. ހަމައެއާއެކު ކުލަބުތަކަށް ކުޅުންތެރިން ގަތުމާއި، އެކަންކަމަށް ޚަރަދު ކުރުމަށް ފައިސާ ދިނުމަކީ ވެސް އެފްއޭއެމްގެ މެންޑޭޓުގައި އޮތް ކަމެއް ނޫން ކަމަށް ޒުހޫރު ވަނީ ވިދާޅުވެފަ އެވެ. އެކަމުގެ ސުވާލު ފީފާގެ އިތުރުން، ސަރަހައްދީ ފުޓުބޯޅަ އިދާރާ (އޭއެފްސީ)އާ ވެސް ކޮށްފައިވާނެ ކަން ފާހަގަ ކުރައްވައި ޒުހޫރު ވިދާޅުވީ، އެފްއޭއެމް އަކީ ކުލަބުތަކަށް ފައިސާ ދީގެން، ކުލަބުތައް ހިންގުމުގެ މެންޑޭޓު އޮތް ބައެއް ނޫން ކަމަށް ވެސް އެ ބޭފުޅުން ވިދާޅުވެފައިވާ ކަމަށެވެ.

އެހެންކަމުން ނޯމަލައިޒިން ކޮމެޓީން ކުލަބުތަކާ ވެސް ބައްދަލުކޮށްފައިވާ ކަމަށާއި، ކުރީގެ ހިންގާ ކޮމެޓީގެ ފަރާތުން ކުލަބު ތަކަށް ކޮންމެ ވެސް ވަރަކަށް ފައިސާ ލިބިފައިވާ ކަމަށް ޒުހޫރު ވިދާޅުވި އެވެ. އެހެން ނަމަވެސް، އެ ފައިސާ ކުލަބުތަކަށް ދީފައިވާ އެއްވެސް އުސޫލެއް ނޯމަލައިޒިން ކޮމެޓީ އަށް ފެންނަން ނެތް ކަމަށް ވެސް ޒުހޫރު ވިދާޅުވި އެވެ. އެއާއެކު އެކަން ބަލަމުން އަންނަ ކަމަށާއި، އެފްއޭއެމުން އެގޮތަށް ފައިސާ ދީފައިވާ ގޮތް ބައްލަވާނެ ކަމަށް ވެސް އޭނާ ވިދާޅުވި އެވެ.

ރާއްޖޭގެ ފުޓުބޯޅަ ސީޒަން ނުފެށި ދިގުލައިގެން ގޮސްފައިވާއިރު، އެކަމުގެ ކަންބޮޑުވުން ކުލަބުތަކާއި، ކުޅުންތެރިން ވެސް އަަންނަނީ ފާޅު ކުރަމުންނެވެ. އެންމެ ފަހުން ރާއްޖޭގައި ބާއްވާފައި ވަނީ ދެ ވަނަ ޑިވިޝަންގެ ފުޓުބޯޅަ މުބާރާތެވެ.