މަރަދޫފޭދޫ ފެނަކައިން 24 މުވައްޒަފަކު ކުއްލި ގޮތަކަށް ވަޒީފާއިން ވަކިކޮށްފި
18 ސެޕްޓެމްބަރު 2024 | ބުދަ 06:18މަޝްރޫއުތަކަށް ނަގާފައިވާ މުވައްޒަފުންވެސް ބިކަކޮށް ނުލައްވާނެކަމަށް ރައީސް ވަނީ ވިދާޅުވެފައި
އެ މީހުން ވަޒީފާއިން ވަކި ކޮށްފައިވާއިރު، އެއްވެސް ލިއުމެއްވެސް ދީފައިނުވޭ
އައްޑޫ ސިޓީ މަރަދޫފޭދޫ ފެނަކަ ޕްރޮޖެކްޓުގައި ތިބި 24 މުވައްޒަފަކު ކުއްލި ގޮތަކަށް ވަޒީފާއިން ވަކިކޮށްފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެ މުވައްޒަފުން ޑިއުޓީއަށް ނުކުތުމުން މެނޭޖްމަންޓުން ވަނީ އެމީހުން މާދަމާއިން ފެށިގެން (ބުރާސްފަތި ދުވަހުން ފެށިގެން) ވަޒީފާއިން ވަކިކޮށްފައިވާ ކަމަށް އަންގާފައެވެ.
އެއީ މިދިޔަ ސަރުކާރުގައި ވަޒީފާއަށް ނަގާފައިވާ މުވައްޒަފުން ތަކެކެވެ.
އެ މުވައްޒަފުން ވަކިކޮށްފައިވަނީ ފެނަކަ މާލޭ ބްރާންޗުން އީމެއިލްގެ ޒަރިއްޔާއިން އެންގި އެންގުމެއްގެ މައްޗަށްކަމަށް ވަނީ މައުލޫމާތު ލިބިފައެވެ.
އެހެންކަމުން ދުރާލާ އެންގުމެއް ނެތި ކުއްލި ގޮތަކަށް ވަޒީފާއިން ވަކިކޮށްލުމުން މުވައްޒަފުން ތިބީ ނުހަނު ބޮޑު ކަންބޮޑުވުމެއްގައެވެ.
މުވައްޒަފުން ބުނާ ގޮތުގައި އެމީހުންނަކީ ވަކި ޕްރޮޖެކްޓަކަށް ނަގާފައި ތިބި ބަޔަކަށްވާއިރު، އަދި އެ ޕްރޮޖެކްޓުވެސް ނިމިފައިނުވާއިރު، ކުއްލި ގޮތަކަށް ދިވެހި އާއިލާތަކެއް ބިކަ ކޮށްލުމަކީ އެތައް ތަކުލީފެއް އޭގެ ސަބަބުން އެމީހުންނަށް ކުރިމަތިވާނެ ކަމެކެވެ.
އެއީ މަރަދޫ ފޭދޫ ފެނަކަ އޮފީސް އިމާރާތުގެ މަސައްކަތާ ގުޅޭ ޕްރޮޖެކްޓަށް ނަގާފައިވާ ވަގުތީ މުވައްޒަފުންނެވެ. އެހެންނަމަވެސް އެ އޮފީސް އިމާރާތުގެ މަސައްކަތްވެސް ނިމިފައިނުވާއިރު، މަސައްކަތް އޮތީވެސް މި ސަރުކާރު އައުމަށްފަހު މަޑުޖައްސާލާފައެވެ.
އޭގެ އިތުރުން، އެ މީހުން ވަޒީފާއިން ވަކި ކޮށްފައިވާއިރު، އެއްވެސް ލިއުމެއްވެސް ދީފައިނުވާ ކަމަށާއި، އެކަން އެންގީ އަނގަބަހުން ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
ހުރިހާ ރަށަކުން ވެސް ކޮންޓްރެކްޓަށް ނަގާފައި ތިބި މުވައްޒަފުން ދޫކޮށްލަން ނިންމާފައިވާ ކަމަށާއި، އެގޮތުން 731 މުވައްޒަފުން ފެނަކައިން ވަކި ކުރައްވާނެކަމަށް އެ ކުންފުނީގެ މެނޭޖިންގ ޑިރެކްޓަރު މުއާޒް މުހައްމަދު ރަޝީދު ދާދި ފަހުން ވަނީ ވިދާޅުވެފައެވެ. އެގޮތުގެ މަތިން އެކި މުވައްޒަފުން ދަނީ ވަކި ކުރަމުންނެވެ.
އެހެންނަމަވެސް، ރިޔާސީ އިންތިޚާބުގެ ތެރޭގައި ލ ކުނަހަންދޫގައި ވާހަކަ ދައްކަވަމުން ރައީސް ވަނީ ކުންފުނިތަކާއި އެކި ގޮތްގޮތުން އާންމު ރައްޔިތުންނަށް ހަމަޖައްސާދީފައިވާ ވަޒީފާތަކުން ވަކި ނުކުރައްވާނެކަމުގެ ޔަޤީންކަން ދެއްވާފައެވެ. ވަކިން ޚާއްސަކޮށް މަޝްރޫއުތަކަށް ނަގާފައިވާ މުވައްޒަފުންވެސް ބިކަކޮށް ނުލައްވާނެކަމަށް ރައީސް އެ ދުވަހު ވަނީ ވިދާޅުވެފައެވެ.
އެ ދުވަހު ރައީސް ވިދާޅުވީ، ސިޔާސީ މަގާމުތައް ފިޔަވައި ދެން ހުރި ވަޒީފާތަކެއްގައި އެރަށެއްގައި ތިބި ވަޒީފާގައި ތިބެވޭނެ ކަމަށެވެ.
