ސަތާރަ އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގައި ވާދަކުރުމަށް، ރާއްޖޭގެ ސަތާރަ އަހަރުން ދަށުގެ ޤައުމީ ޓީމު ފުރައިފި އެވެ.

މި މަހު ބޫޓާންގައި ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގައި ވާދަކުރުމަށް ރާއްޖޭގެ ޒުވާާން ޓީމު ފުރީ އަންގާރަ ދުވަހުގެ ހަވީރު އެވެ. ބޫޓާންގައި މުބާރާތް ކުރިއަށް ދާނީ ސެޕްޓެމްބަރު މަހުގެ 20 ވަނަ ދުވަހުން ފެށިގެން، 30 ވަނަ ދުވަހުގެ ނިޔަލަށެވެ.

ރާއްޖެ ހިމެނިފައި ވަނީ މުބާރާތުގެ ގްރޫޕް އޭ ގައެވެ. މި ގުރޫޕުގައި ރާއްޖޭގެ އިތުރުން ދެން ހިމެނެނީ އިންޑިއާ އާއި ބަންގްލަދޭޝް އެވެ. މުބާރާތުގެ ގްރޫޕް ބީ ގައި ހިމެނެނީ ސްރީ ލަންކާ، ޕާކިސްތާން އަދި ނޭޕާލް އެވެ. މުބާރާތުގެ ގްރޫޕް ސްޓޭޖުގެ ކުޅުން ނިމޭއިރު، އެންމެ މަތިން ޕޮއިންޓު ހޯދާ ދެ ޓީމަށް ސެމީ ފައިނަލްގެ ފުރުސަތު ލިބޭނެ އެވެ.

މުބާާރާތުގައި ދިވެހި ރާއްޖޭގެ ފުރަތަމަ މެޗުގައި ބަންގްލަދޭޝްއާ ދެކޮޅަށް ނިކުންނާނީ ސެޕްޓެމްބަރު މަހުގެ 22 ވަނަ ދުވަހު އެވެ. އަދި ގްރޫޕް ސްޓޭޖުގެ ފަހު މެޗުގައި އިންޑިއާއާ ދެކޮޅަށް ނިކުންނާނީ ސެޕްޓެމްބަރު މަހުގެ 24 ވަނަ ދުވަހު އެވެ.

ސާފް ޗެމްޕިއަންޝިޕްގައި ވާދަކުރާ ރާއްޖޭގެ ޤައުމީ ޓީމަށް އިރުޝާދު ދޭނީ މުޙައްމަދު އާދަމް އެވެ. މުޙައްމަދު އާދަމްގެ އެސިސްޓެންޓް ކޯޗެއްގެ ގޮތުގައި މަސައްކަތް ކުރާނީ އަޙުމަދު ނިމާދު އެވެ. މުބާރާތަށް ތައްޔާރުވުމުގެ ގޮތުން ޤައުމީ ޓީމުން ވަނީ ފަރިތަކުރުންތައް ވެސް ކުރިއަށް ގެންގޮސްފަ އެވެ.