އަންނަ ހަފްތާ ހޮނިހިރު ހިސާބުގައި ފިޔާގެ އަގު ތިރިވެ، މައްސަލަ ހައްލުވާނެ: ސަރުކާރު
ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ އިންޑިއާއިން ފިޔާ އެކްސްޕޯޓު ކުރާ އަދަދު މަދުވެފައިވާ ކަމަށެވެ. އަދި އެސްޓީއޯއިން ފިޔާ ގެނައުމުގެ މަސައްކަތް ކުރަމުންދާ ކަމަށެވެ.
އިންޑިއާއިން ފިޔާ އެކްސްޕޯޓު ކުރާ އަދަދު ވަނީ މަދުވެފައި
ބާޒާރުމަތީގައި ފިޔާ ވިއްކުމުގެ މަސައްކަތް ކުރަނީ
ބާޒާރުގައި ފިލާ ލިބުން ދަތިވެ އަގު މައްޗަށް ގޮސްފައިވާއިރު، އަންނަ ހަފްތާގެ ހޮނިހިރު ހިސާބުގައި އަގު ދައްވެ މައްސަލައަށް ހައްލު ލިބޭނެ ކަމަށް ސަރުކާރުން ބުނެފިއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ބާޒާރުގައި ފިޔާ ލިބުން ދަތިވެ އަގު ވެސް މަތިވަމުންދާކަން ފާހަގަކުރެވިފައިވާ ކަމަށެވެ.
ފިޔާ ލިބުން ދަތިވި ސަބަބަށް އިޝާރާތް ކުރައްވައި ހީނާ ވިދާޅުވީ ފިޔާ ރާއްޖެއަށް އެތެރެ ކުރެވޭ މިންވަރު މަދުވެފައިވާ ކަމަށާއި، އިންޑިއާއިން އެކްސްޕޯޓު ކުރާ އަދަދު މަދުވެފައިވާ ކަމަށެވެ. މި މައްސަލަ ހައްލު ކުރުމުގެ މަސައްކަތް ސަރުކާރުން ކުރަމުންދާ ކަމަށް އޭނާ ވިދާޅުވިއެވެ.
ހީނާ ވިދާޅުވީ އެސްޓީއޯ މެދުވެރިކޮށް ފިޔާ ގެނައުމުގެ މަސައްކަތްތައް ކުރަމުންދާ ކަމަށާއި، އަންނަ ހަފްތާގެ ހޮނިހިރު ނުވަތަ އާދިއްތަ ދުވަހު ފިޔާ ލިބޭނެ ކަމަށެވެ. އެއާއެކު މައްސަލައަށް ހައްލު ލިބޭނެ ކަމަށް ހީނާ ވިދާޅުވިއެވެ.
ބާޒާރުގައި ހުރިހާ ބާވަތެއްގެ އަގު އުފުލެމުންދާއިރު، ފިޔާ ކިލޯއެއްގެ އަގުވަނީ 40 ރުފިޔާއަށްވުރެ މައްޗަށް އަރާފައެވެ. އަދި ފިޔާ ބަސްތާއެއްގެ އަގު ވަނީ 900 ރުފިޔާއަށް އަރާފައެވެ.
