އޯލަވަލްގެ އެންމެ މާއްދާއަކުން ފާސްވާ ދަރިވަރަށް ވެސް އޭލެވެލްއިން ޖާގަ ލިބޭނެކަން ހާމަކުރި ނަމަވެސް އެކަން އެގޮތަކަށް ނުހިނގާ: އިހުސާން
އެޕްލިކޭޝަން އަށް ހުޅުވާލިއިރު އޮތީ 5 މާއްދާއިން ފާސްވާންޖެހޭ ކަމަށް
ފަލަސުރުހީ ޕްރޮގްރާމްގައި އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވާހަކަދައްކަވަނީ
މި ސަރުކާރުގައި އޯލަވަލްގެ އެންމެ މާއްދާއަކުން ފާސްވާ ދަރިވަރަށް ވެސް އޭލެވެލްއިން ޖާގަ ލިބޭނެކަން ހާމަކުރި ނަމަވެސް އެކަން އެގޮތަށް ނުހިނގާ ކަމަށް އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރުކަން ވެސް ކުރައްވާފައިވާ އިހުސާން ވިދާޅުވީ އޭލެވެލްއަށް އިތުރު ދަރިވަރުން ވައްދަން ސަރުކާރުން ނިންމާފައި އުސޫލު އިއުލާނު ކުރުމާއި، އަރަބިއްޔާ ސްކޫލުގެ އައު އިމާރާތުގެ މަސައްކަތް ބައްލަވަން އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވަޑައިގެންނެވުމާއި މާބޮޑު ތަފާތެއް ނެތް ކަމަށެވެ.
އެގޮތުން އަރަބިއްޔާ ސްކޫލުގެ މަސައްކަތް ހިނގާގޮތް ބަލަން އެ ސްކޫލުގެ ސްޓާފުންނާއި ދަރިވަރުންނާއި މިނިސްޓްރީގެ ބައެއް ފަރާތްތައް ވަޑައިގެން ފޮޓޯއެއް ނަންގަވާފައި ފެބްރުއަރީ މަހު ޓްވީޓް ކުރައްވަނީ މަސައްކަތް ހިނގާނުހިނގާގޮތް ބެއްލެވި ކަމަށެވެ.
އިހުސާން ވިދާޅުވީ މިއީ ސެޕްޓެމްބަރު މަސް ކަމަށާއި، އަރަބިއްޔާ ސްކޫލް އިމާރާތްކުރުމުގެ އެއްވެސް މަސައްކަތެއް އަދި ނުހިނގާ ކަމަށެވެ. އެއީ އެދުވަހުގެ އިއުލާން ކަމަށާއި، އެންމެ މާއްދާއަކުން ފާސްވާ ކުއްޖާއަށްވެސް އޭލެވެލްއިން ޖާގަ ލިބޭނެކަމަށް މިނިސްޓަރު ވިދާޅުވި ނަމަވެސް އެޕްލިކޭޝަން އަށް ހުޅުވާލިއިރު އޮތީ 5 މާއްދާއިން ފާސްވާންޖެހޭ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ އެންމެ މާއްދާއަކުން ފާސްވާ ކުއްޖާއަށްވެސް އޭލެވެލްއިން ޖާގަ ލިބޭނެ ކަމަށް ވިދާޅުވެ އެޑިޔުކޭޝަން މިނިސްޓަރު ވާހަކަދެއްކެވީ އެއްވެސް ކަހަލަ ޕްލޭނެއް ނެތި އެކަމަށް ތައްޔާރުވެގެން ނޫން ކަމަށެވެ. އަދި ވިދާޅުވީ އޯލަވަލްއިން ފާސްނުވާ ދަރިވަރެއް އެޑެކްސެލް އޭލަވަލް ކިޔެވުމަށް އެޑެކްސެލްއިން ވެސް އެންކަރޭޖެއް ނުކުރާނެ ކަމަށެވެ.
އިހުސާން ވިދާޅުވީ އޯލަވަލްއިން ފާސްނުވެ، އަދި 18 އަހަރު ނުފެރޭ ކުދިންނަށް ސްކޫލުތަކުން ނުވަތަ މުއައްސަސާތަކުން ނުވަތަ އެނޫން ވެސް ގޮތަކުން އެކުދިންނަށް ތައުލީމު ދެވޭނެ ގޮތެއް ނުވަތަ އުފެއްދުންތެރި މަސައްކަތެއް ދަސްކޮށްދެވޭނެ ގޮތެއް އޮންނަން ޖެހޭ ކަމަށެވެ. އަދި މިމަސައްކަތް ކުރުމަށް ރަނގަޅު ޕްލޭނެއް އެކުލަވާލައި އެކަން ތަންފީޒު ކުރަންޖެހޭ ކަމަށް އޭނާ ވިދާޅުވިއެވެ.
މީގެ އިތުރުން އިހުސާން ވިދާޅުވީ އޯލަވަލްގައި އެއްވެސް މާއްދާއަކުން ފާސްނުވާ ދަރިވަރަށް ވެސް ކުރިއަށް ދިއުމުގެ ފުރުސަތު އޮންނަންޖެހޭ ކަމަށެވެ. އެގޮތުން އެފަދަ ދަރިވަރުންނަށް މަގު ދައްކައިދިނުމަށް އަދި އެދަރިވަރުންނަށް ކިޔަވައިދިނުމަށް އެކަމަށް ތަމްރީންވެފައި ތިބި މުދައްރިސުން ބޭނުންވާ ކަމަށާއި، އެދާއިރާއަށް މަސައްކަތް ކުރަންޖެހޭ ކަމަށް އިހުސާން ވިދާޅުވިއެވެ. އަދި ވިދާޅުވީ މި މަސައްކަތް ކާމިޔާބު ކަމާއެކު ކުރެވިއްޖެ ކަމަށްވާނަމަ ގައުމަށް ގިނަ ފައިދާތަކެއް ކުރާނެ ކަމަށެވެ.
