"ތަޢުލީމަށް ދައުލަތުން ބޮޑު ހޭދައެއް ކުރާއިރު އޯލެވެލް އިމްތިހާނުން ފާސްވާ އިންސައްތަ އަދިވެސް 50% ހުރަސްނުކުރުމަކީ ކަންބޮޑުވާން ޖެހޭ ކަމެއް"
ރާއްޖެއަކީ ސާނަވީ މަރުހަލާ އަށް ކިޔަވާ ކުދިންގެ އަދަދު ނިސްބަތުން އެންމެ ބޮޑު ޤައުމު
"ތަޢުލީމަށް އިންގިލާބީ ބަދަލު" އިފްތިތާޙްކުރުމުގެ ރަސްމިއްޔާތުގެ ތެރެއިން
ތަޢުލީމަށް ދައުލަތުން ބޮޑު ހޭދައެއް ކުރާއިރު އޯލެވެލް އިމްތިހާނުން ފާސްވާ އިންސައްތަ އަދިވެސް 50% ހުރަސްނުކުރުމަކީ ކަންބޮޑުވާން ޖެހޭ ކަމެއް ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ "ތަޢުލީމަށް އިންގިލާބީ ބަދަލު" އިފްތިތާޙްކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރ ވަނީ ފާއިތުވި 10 އަހަރު އޯލެވެލް އިން ފާސްވާ ދަރިވަރުންގެ އިންސައްތަ 50 އިންސައްތައަށްވުރެ މައްޗަށް ނާރާކަމަށް ފާހަގަކުރައްވާފައެވެ. 2000ގެ ކުރީގެ އަހަރުތަކުގެ ތެރޭގައި ރާއްޖެއިން ވަނީ ޔުނިވަރސަލް ގޯލް އޮފް ޕްރައިމަރީ އެޑިއުކޭޝަން 100% ހާސިލްކޮށްފައި ކަމަށް މިނިސްޓަރ ވިދާޅުވިއެވެ. ހަމައެހެންމެ ރާއްޖެ އަކީ މި ސަރަަހައްދުގައި ސާނަވީ މަރުހަލާ އަށް ކިޔަވާ ކުދިންގެ އަދަދު ނިސްބަތުން އެންމެ ބޮޑު ޤައުމު ކަމަށް ފާހަގަކުރައްވާ މިނިސްޓަރ ވަނީ އެއީ ދިވެހިންނަށް އޮތް ފަޚުރެއް ކަަމަށް ފާހަގަކުރައްވާފައެވެ.
ނަމަވެސް އޯލެވެލްގެ ފާސްވާ އިންސައްތަ ދަށްވުމަކީ ބެލެނިވެރިންނާއި ތައުލީމީ ދާއިރާގައި މަސައްކަތް ކުރާ މީހުން ކަންބޮޑުވާން ޖެހޭ ކަމެއްކަމަށް އެ މަނިކުފާނު ވިދާޅުވިއެވެ. އެ ދާއިރާ އަށް އެތައް އިންވެސްޓްމެންޓްތަކެއް ކޮށް ބޭރުގެ އެޖެންސީތަކުން ބޮޑެތި އެހީތަކެއް ވަމުން ދާ އިރު ސާނަވީ މަރުހަލާ ފުރިހަމަ ކުރާ ކުދިންގެ އަދަދު ދަށްވުމަކީ އަޅާ ނުލާ ދޫކޮށްލެވެން ނެތް ކަމެއް ކަމަށް އެ މަނިކުފާނު ވިދާޅުވިއެވެ. އެ ދަރިވަރުންގެ ނަތީޖާ ރަނގަޅު ނުވުމުން އެކަމާއި މެދު ކަންބޮޑުވެވަޑައިގަންނަވާ ކަމަށް މިނިސްޓަރ ވިދާޅުވިއެވެ. ސާނަވީ މަރުހަލާ ނިންމާ އަދަދު 2023 އަދި 2024ގައި 50%ގައި ހުރުމަކީ ބަލައިގަނެވޭ ކަމެއް ނޫން ކަމަށް ވަޒީރު ވިދާޅުވިއެވެ.
މިނިސްޓަރ ވަނީ އެކަން އެގޮތަށް ވާ ސަބަބަށް ވެސް އަލިއަޅުވާލައްވާފައެވެ. އެގޮތުން އެ މައްސަލަ ހައްލުކުރެވޭނީ މުދައްރިސުންގެ ފެންވަރު މަތިކޮށްގެން ކަމަށް ވަނީ ފާހަގަކުރައްވާފައެވެ. އަދި ޕްރައިމަރީގައި ކިޔަވާދިނުމުގެ ފެންވަރު ރަނގަޅުކުރަން ޖެހޭ ކަމަށް ވިދާޅުވިއެވެ. މިހާރު ދިމާވެފައިވަ ޕްރައިމަރީ ޓީޗަރުން ބޭނުންވާ މިންވަރަށް ނުލިބުމުގެ މައްސަލަ ހައްލުކުރަން ޖެހޭ ކަމަށް ވަޒީރު ވަނީ ވިދާޅުވެފައެވެ.
އޭލެވެލްގެ ފާސް އިންސައްތަ ވެސް ދަށް ކަަމަށާއި އެޑެކްސެލް 2 މާއްދާއިން ފާސްވާ ކުދިންގެ އަދަދު ވެސް 50% އަށް ވުރެ ދަށް ކަމަށް ވަޒީރު ވިދާޅުވިއެވެ. އެކަމުން އެނގެނީ 7000 ދަރިވަރުންނާއި އެކު ފަށާ ތައުލީމީ ދަތުރުގެ ތެރެއިން 1500 އެއްހާ ކުދިންނަށް ވެސް މަތީ ތައުލީމާއި ހަމައަށް ވާސިލް ނުވެވޭކަން ކަމަށް އެ މަނިކުފާނު ވިދާޅުވިއެވެ. އަދި ރަނގަޅު ފެންވަރުގެ ކޮލެޖްތަކަށް ދަރިވަރުންނަށް ދެވޭ މިންވަރު މަދު ކަމަށް ވެސް ވަޒީރު ވިދާޅުވިއެވެ.
