އިނގިރޭސި ޕްރިމިއާ ލީގުގައި ސައުތެމްޓަންއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑަށް ފަސޭހަ މޮޅެއް ލިބިއްޖެ އެވެ.

ސައުތެމްޓަންގެ ދަނޑުގައި ކުޅުނު މެޗު ޔުނައިޓެޑުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޔުނައިޓެޑުން ވަނީ ދެ ލަނޑު ޖަހައިފަ އެވެ. އަނެއް ލަނޑު އެ ޓީމުން ޖެހީ މެޗުގެ ފަހު ހާފުގަ އެވެ.

މެޗުގެ ފުރަތަމަ ހާފުގައި ލަނޑު ޖަހަން ސައުތެމްޓަން އަށް ލިބުނު ފުރުސަތުގައި އެ ޓީމުން ޖެހި ޕެނަލްޓީ ޔުނައިޓެޑުގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން މެޗުގެ 35 ވަނަ މިނެޓުގައި ޔުނައިޓެޑަށް ލީޑު ނަގައިދިނީ މަތައިސް ޑި ލިޓް އެވެ. ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި އޭނާ އެ ލަނޑު ޖެހީ ބޮލުންނެވެ.

ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ ދެ ވަނަ ލަނޑެއް ޖަހައިފަ އެވެ. މެޗުގެ 41 ވަނަ މިނެޓުގައި އަމަދު ޑިއާލޯ ތަނަވަސްކޮށްދިން ފުރުސަތެއްގައި ޔުނައިޓެޑުގެ ދެ ވަނަ ލަނޑު ޖެހީ މާާކަސް ރަޝްފޯޑް އެވެ. މެޗުގައި ޔުނައިޓެޑުގެ ތިން ވަނަ ލަނޑު އެ ޓީމުން ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. ޑިއޭގޯ ޑަލޮޓް ތަނަވަސްކޮށްދިން ފުރުސަތެއްގައި އެ ލަނޑު ޖަހައިދިނީ އަލެހަންދްރޯ ގަނާޗޯ އެވެ.

މޮޅާއެކު ޔުނައިޓެޑު ވަނީ ލިގު ތާވަލްގެ 10 ވަނަ އަށް ޖެހިލައިފަ އެވެ. އެއީ މިހާތަނަށް ލީގުގައި ކުޅެފައިވާ ހަތަރު މެޗުން ހަ ޕޮއިންޓު ހޯދައިގެންނެވެ. ދެ މެޗުން ޔުނައިޓެޑު މޮޅުވެފައިވާއިރު، ދެ މެޗުން ވަނީ ބަލިވެފަ އެވެ.