އާސަންދަ ހަމަޖައްސައިދޭނެކަމަށް ބުނެ ގެންގޮސް، ދިމާކޮށްލީ ފޭރެން
12 ސެޕްޓެމްބަރު 2024 | ބުރާސްފަތި 08:07އޭނާއަކީ ފޭރުމާއި، އެހެނިހެން ކުށްތަކުގެ ރެކޯޑު އޮންނަ މީހެއް
ކްރިމިނަލް ކޯޓު
އާސަންދަ ހަމަޖައްސައިދޭނެކަމަށް ބުނެ ފޭރެން އުޅުނު މައްސަލައެއްގައި މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރު ކޮށްފައިވަނީ އުމުރުން 41 އަހަރުގެ ދިވެހި ފިރިހެނެކެވެ. އޭނާގެ މައްޗަށް ކޮށްފައިވަނީ ފޭރުމާއި މާރާމާރީ ހިންގުމުގެ ކުށުގެ ތުހުމަތެވެ.
މި މައްސަލައާ ގުޅޭ ޙާދިސާ ރިޕޯޓާއި، އަނިޔާލިބުނު ފަރާތުގެ ބަޔާން ހެކީގެ ގޮތުގައި ހުށަހަޅާފައިވާއިރު، އޭނާ ބަންދު ކުރުމަށް ކްރިމިނަލް ކޯޓުން އަމުރުކުރީ މުޖުތަމައުގެ ސަލާމަތާއި ރައްކާތެރިކަމަށް ބަލާފައެވެ.
އޭނާއަކީ ފޭރުމާއި، އެހެނިހެން ކުށްތަކުގެ ރެކޯޑު އޮންނަ މީހެކެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، މި މައްސަލަ ހުށަހެޅި ފަރާތް ތުހުމަތުވާ މީހާއާ ދިމާވެފައިވަނީ ޖުމްހޫރީ މައިދާން ކައިރިންނެވެ. ދިމާވުމުން އާސަންދަ ހަމަޖައްސައިދޭނެކަމަށް ބުނެ އޭނާ ވަނީ އޮޅުވާލައިގެން ގެންގޮސް ފޭރެެން މަސައްކަތް ކޮށްފައެވެ. އަދި އޭނާގެ ކަރުގައި ގަލަމަކުން ޖައްސައި ބިރު ދެއްކުމަށްވެސް މަސައްކަތް ކޮށްފައިވެއެވެ.
އެހެންކަމުން ތުހުމަތުވާ މީހާ 15 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ ހުސައިން ފާއިޒް ރަޝާދެވެ.
