މުސްތަޤުބަލާ މެދު އެއްޗެއް ބުނަން އުނދަގޫ: މޮޑްރިޗް

މުސްތަޤުބަލާ މެދު އެއްޗެއް ބުނަން އުނދަގޫ ކަމަށް، ކްރޮއޭޝިއާ ޤައުމީ ޓީމަށް ކުޅެމުން އަންނަ އެ ޓީމުގެ ކެޕްޓަން ލޫކާ މޮޑްރިޗް ބުނެފި އެވެ.

އުމުރުން މިހާރު 39 އަހަރުވެފައިވާ މޮޑްރިޗް މިހެން ބުނީ، ޔުއެފާ ނޭޝަންސް ލީގުގައި ކްރޮއޭޝިއާ އިން ޕޮލެންޑާ ދެކޮޅަށް ކުޅުނު މެޗަށްފަހު ނޫސްވެރިޔަކު ކުރި ސުވާލަށް ޖަވާބު ދެމުންނެވެ. އެ މެޗުން ކްރޮއޭޝިއާ މޮޅުވެފައި ވަނީ ވެސް ދެ ވަނަ ހާފުގައި މޮޑްރިޗް ޖެހި ލަނޑުންނެވެ.

ޤައުމީ ޓީމުން ރިޓަޔާވުމާ ގުޅޭ ގޮތުން ކުރި ސުވާލަށް ޖަވާބު ދެމުން މޮޑްރިޗް ބުނީ، އޭނާގެ މުސްތަޤުބަލާ މެދު ވާނެ ގޮތެއް ނޭނގޭ ކަމަށެވެ. ޤައުމީ ޓީމުން ރިޓަޔާވުމާ މެދު ގޮތެއް ނިންމަން ޖެހޭނީ މެޗަކަށްފަހު މެޗެއް ބެލުމަށްފަހު ކަމަށް ވެސް މޮޑްރިޗް ވަނީ ބުނެފަ އެވެ.

މީގެ އިތުރުން މޮޑްރިޗް ބުނީ، މިވަގުތު މުސްތަޤުބަލާ މެދު ނުވިސްނާ ކަމަށެވެ. މޮޑްރިޗް ބުނީ އޭނާގެ ހަށިގަނޑުގައި މިހާރު ހުރި ހަކަތަ، އިތުރަށް ނެތްކަން އިޙުސާސްވުމުން ރިޓަޔާވާނެ ކަމަށެވެ. އެކަމުގެ އިޙުސާސްކޮށް، ގޮތެއް ނިންމާނީ އޭނާކަން ފާހަގަކޮށް މޮޑްރިޗް ބުނީ، މިވަގުތު އޭނާ ހުރީ ވަރަށް ހަމަޖެހިގެން ކަމަށެވެ.

އިތުރަށް ވާހަކަ ދައްކަމުން މޮޑްރިޗް ބުނީ ޤައުމީ ޓީމުގައި ކުޅުމަކީ އަބަދު ވެސް އޭނާ ފަޚުރުވެރިވާ ކަމެއް ކަމަށެވެ. އަދި ވަކިން ޚާއްސަކޮށް ޓީމުގެ ކޯޗު އޭނާ އަށް އިތުބާރުކޮށް، އޭނާ އާމެދު ޔަގީންކަން އޮންނަކަން އިނގޭއިރު، އެ ފުރުސަތުގެ ބޭނުން އަބަދު ވެސް ހިފަން ބޭނުންވާ ކަމަށް މޮޑްރިޗް ބުންޏެވެ.

އެންމެ ފުރަތަމަ މޮޑްރިޗް ކްރޮއޭޝިއާ ޤައުމީ ޓީމަށް ކުޅެން ފެށީ 2006 ވަނަ އަހަރު އެވެ. އޭގެ ފަހުން މިހާތަނަށް އޭނާ ވަނީ ޤައުމީ ޓީމަށް ކުޅެދިން 180 މެޗުގައި 27 ލަނޑު ޖަހައިފަ އެވެ. ކްރޮއޭޝިއާ އާއެކު މޮޑްރިޗް ވަނީ 2018 ވަނަ އަހަރު އޮތް ފީފާ ވޯލްޑް ކަޕްގެ ފައިނަލްގައި ކުޅެ ދެ ވަނަ ހޯދައިފަ އެވެ. އޭގެ ފަހުން 2022 ވަނަ އަހަރު އޮތް ވޯލްޑް ކަޕްގެ ތިން ވަނަ ވަނީ ހޯދައިފަ އެވެ. މީގެ އިތުރުން ޔުއެފާ ނޭޝަންސް ލީގުގެ ފައިނަލެއްގައި ވެސް ވަނީ ކުޅެފަ އެވެ.