އެކުއެޑޯ އަތުން ބްރެޒިލް އަށް އުނދަގޫ މޮޅެއް

ފީފާ ވޯލްޑް ކަޕް ކޮލިފިކޭޝަންގައި އެކުއެޑޯއާ ދެކޮޅަށް ކުޅުނު މެޗުން ބްރެޒިލް އަށް އުނދަގޫ މޮޅެއް ލިބިއްޖެ އެވެ.

ކޯޓޯ ޕެރެއިރާގައި ކުޅުނު މެޗު ބްރެޒިލް އިން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަމަ ހާފުގައި ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ބްރެޒިލް އަށް ލީޑު ނަގައިދިނީ ރޮޑްރީގޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލޫކަސް ޕަކޭޓާ އެވެ. މެޗުގައި އެކުއެޑޯ އަށް ވަނީ ލަނޑު ޖަހައި، ނަތީޖާ ހަމަހަމަ ކުރާނެ ފުރުސަތު ލިބިފަ އެވެ. ބްރެޒިލަށް ލީޑު ފުޅާ ކުރުމަށް ފުރުސަތު ލިބުނުއިރު، ފުރުސަތުގެ ބޭނުމެއް ނުކުރެވުނެވެ.

ދެކުނު އެމެރިކާ ސަރަހައްދުގެ ކޮލިފިކޭޝަންގެ އެހެން މެޗުތަަކަށް ބަލާއިރު، އުރުގުއޭ އާއި ޕެރަގުއޭ ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. ޕެރޫ އާއި ކޮލަމްބިއާ ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ.

މި ސަރަހައްދުގެ ކޮލިފިކޭޝަންގެ އެއް ވަނައިގައި އެންމެ ފަހުގެ ޗެމްޕިއަން އާޖެންޓީނާ އޮތްއިރު، ދެ ވަނައިގައި އޮތީ އުރުގުއޭ އެވެ. ބްރެޒިލް އޮތީ ހަތަރު ވަނައިގަ އެވެ.