ހުޅުމާލެ ސެންޓަރަލް ޕާކު ކައިރިން ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރި މުހައްމަދު ވިސާމް ސިދުގީ ޝަރީއަތް ނިމެންދެން ބަންދުކޮށްފިއެވެ.
ފުލުހުން ބުނީ މި އެކްސިޑެންޓާއި ގުޅިގެން ކާރު ދުއްވަން އިން ވައިލެޓްފެހި، ސ.ހިތަދޫ 26 އަހަރުގެ މުހައްމަދު ވިސާމް ސިދުގީގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް ގާޒީ އަމުރުކުރައްވާފައިވާ ކަމަށެވެ.
މިއެކްސިޑެންޓުގެ ރިޕޯޓުކޮށްފައިވަނީ ބުރާސްފަތި ދުވަހުގެ ރޭ ދަންވަރު 2:48 ގައެވެ. މިއެކްސިޑެންޓު ހިނގާފައިވަނީ ބާރު ސްޕީޑްގައި ދުއްވާފައި ދިޔަ ރޭސިން ކާރަކުން ސައިކަލުގައި ޖެހުމުންނެވެ. ސައިކަލު ދުއްވަން އިން 23 އަހަރުގެ ހަސަން ސަމާހު ވަނީ ހުޅުމާލެ ހޮސްޕިޓަލުގައި ފަރުވާ ދެމުންދަނިކޮށް ނިޔާވެފައެވެ. އޭނާގެ މޫނަށާއި، ބޮލަށް ވަރަށް ބޮޑަށް އަނިޔާވެފައިވާ ކަމަށް މައުލޫމާތު ލިބެއެވެ.
