ރަހީނު ކުރި އަންހެން މީހާގެ މައްސަލައިގައި ހައްޔަރުކުރި ފިރިހެން މީހާ އަމިއްލަ އަށް މަރުވާން މަސައްކަތް ކޮށްފި އެވެ.
މާލޭގައި އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލައިގައި، އުމުރުން 32 އަހަރުގެ އާދަމް އަތުހަތު ހައްޔަރު ކޮށްފައި ވަނީ ހާދިސާ ހިނގި ސަރަހައްދުން 2024 އޯގަސްޓު 29 ވީ ބުރާސްފަތި ދުވަހުގެ ރޭގެ ވަގުތެއްގަ އެވެ. ރަހީނު ކުރި އަންހެން މީހާ ސަލާމަތް ކުރުމަށް ފުލުހުން ކުރި މަސައްކަތުން އަތުހަރަށް ވަރަށް ބޮޑަށް އަނިޔާވެ، އައިޖީއެމްއެޗުގައި ފަރުވާ ދީފައިވެ އެވެ.
އަތުހަރަށް އައިޖީއެމްއެޗުގައި ފަރުވާ ދިނުމަށްފަހު، ހުކުރު ދުވަހުގެ ހެނދުނު ވަނީ ކަސްޓޯޑިއަލް ޖަލަށް ގެންގޮސްފަ އެވެ. ނަމަވެސް، އެ ދުވަހުގެ ހަވީރު ޙާލު ސީރިއަސް ވުމާއެކު، އައިޖީއެމްއެޗުގައި އަނެއްކާ ވެސް އޭނާ އެޑްމިޓު ކުރި އެވެ. އަދި ހޮނިހިރު ދުވަހުގެ ހެނދުނު އޭނާ ސްޓޭބަލް ވުމާ އެކީ، ފުލުހުންގެ ބެލުމުގެ ދަށަށް އަނެއްކާ ވެސް ގެންދިޔަ އެވެ.
އާދިއްތަ ދުވަހު ފުލުހުން ބުނީ އޭނާ އަމިއްލަ އަށް މަރުވުމަށް މަސައްކަތް ކޮށްފައިވާ ކަމަށެވެ. ބައެއް މީޑިއާ ތަކުގައި އަތުހަރު މަރުވި ކަމަށް ރިޕޯޓުކޮށްފައިވީ ނަމަވެސް، އޭނާ މަރު ނުވާ ކަމަށް ވެސް ފުލުހުން ވަނީ ބުނެފަ އެވެ. އައިޖީއެމްއެޗުގައި އަތުހަރަށް ފަރުވާ ދެމުންދާއިރު، އޭނާގެ ޙާލަތާ ގުޅޭ ގޮތުން ފުލުހުން މާބޮޑު ތަފުސީލެއް ހާމަކޮށްފައެއް ނުވެ އެވެ.
މިހާދިސާއާ ގުޅިގެން ފުލުހުން އަމަލުކުރި ގޮތަށް ގިނަ ބަޔަކު ދަނީ ތައުރީފް ކުރަމުންނެވެ. ހޯމް މިނިސްޓަރު އަލީ އިހުސާން ވިދާޅުވީ ފުލުހުން ކުރީ ހިތްވަރުގަދަ މަސައްކަތެއް ކަމަށާއި، ފުލުހުންގެ މަސައްކަތުން ރަހީނުކޮށްފައިވާ އަންހެނެއް ސަލާމަތް ކުރެވުނު ކަމަށެވެ. އަދި ވިދާޅުވީ އެކަމަށްޓަކައި ފުލުހުންނަށް ސާބަސް ދަންނަވާ ކަމަށެވެ. މީގެ އިތުރުން ރަހީނުކުރި ހާދިސާގައި ހަރަކާތްތެރިވި ފުލުހުންނާއެކު ކޮމިޝަނަރ އޮފް ޕޮލިސް އަލީ ޝުޖާއު ވެސް ވަނީ ބައްދަލުކުރައްވައި އެ ފުލުހުންގެ މަސައްކަތަށް ތައުރީފު ކުރައްވާފަ އެވެ.
