ޔުވެންޓަސް ބަލިކޮށް އިޓާލިއަން ސުޕަރ ކަޕް ލާޒިޔޯ އިން ކާމިޔާބުކޮށްފި

ޗެމްޕިއަން ޔުވެންޓަސް ބަލިކުރުމަށް ފަހު އިޓާލިއަން ސުޕަރ ކަޕް ލާޒިޔޯއިން ކާމިޔާބު ކޮށްފިއެވެ.

ލާޒިއޯއިން ޔުވެންޓަސް ބަލިކޮށްފައި ވަނީ 2-3 ގެ ނަތީޖާއިންނެވެ.

މި މެޗުގައި ލާޒިޔޯއިން ރަނގަޅު ކުޅުމެއް ދެއްކިއިރު މެޗުގެ ފުރަތަމަ ލަނޑުޖަހާ މެޗުގެ ލީޑުނެގީ ވެސް ލާޒިއޯއިންނެވެ. މެޗުގެ 32 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބު ކޮށްދިނީ ރޭގެ މެޗުގައި މޮޅު ކުޅުމެއް ދެއްކި ސިރޯ އިމޯބިލޭއެވެ.

ލާޒިއޯ ލީޑުގައި އޮވެ މެޗުގެ ފުރަތަމަ ހާފް ނިމުނުއިރު، ދެވަނަ ހާފްގެ ވަރަށް ކުރީކޮޅު އިމޯބައިލް ވަނީ ލާޒިޔޯގެ ދެވަނަ ލަނޑު ކާމިޔާބު ކޮށްދީ މެޗުގެ ލީޑު ފުޅާ ކޮށްދީފައެވެ..

ދެ ލަނޑުގެ ލީޑެއްގައި އޮވެ ލާޒިޔޯއިން ކުޅެމުންދަނިކޮށް މެޗުގެ 85 ވަނަ މިނެޓްގައި ޔުވެންޓަސްއިން ވަނީ އެޓީމުގެ ފުރަތަމަ ލަނޑު ޖަހާ މެޗުގެ ނަތީޖާގެ ފަރަގު ކުޑަކޮށްފައެވެ. މި ލަނޑު ޔުވެންޓަސްއަށް ކާމިޔާބު ކޮށްދިނީ ޒުވާން ފޯވާޑް ޕައުލޯ ޑިބާލާއެވެ. ޔުވެންޓަސްއިން އެޓީމުގެ ދެވަނަ ލަނޑުޖަހާ ނަތީޖާ އެއްވަރުކުރީ މެޗު ނިމެންދަނިކޮށް ލިބުނު ޕެނަލްޓީއަކުން ޑިބާލާއެވެ.

ޑިބާލާގެ ދެގޯލުން ނަތީޖާ އެއްވަރުވި ނަމަވެސް މެޗުގެ އެންމެ ފަހު މިނެޓްގައި އެލެސަންދްރޯ މުރްޖާ ވަނީ ލާޒިޔޯގެ ތިންވަނަ ގޯލު ކާމިޔާބު ކޮށްދީ އިޓާލިއަން ސުޕަރ ކަޕް އެޓީމަށް ކަށަވަރު ކޮށްދީފައެވެ.

މީ 2009 ވަނަ އަހަރަށް ފަހު ލާޒިއޯއިން އިޓާލިއަން ސްޕަކަޕް ކާމިޔާބު ކުރި ފުރަތަމަ ފަހަރެވެ.

މިއީ ލާޒިޔޯ އިޓާލިއަން ސުޕަރ ކަޕް ކާމިޔާބު ކުރި ހަތަރުވަނަ ފަހަރުކަން ފާހަގަ ކޮށްލެވެއެވެެ. ޔުވެންޓަސް މިދިޔަ އަހަރު ވެސް ވަނީ ފައިނަލްގައި ވާދަ ކޮށްފައެވެ. އެހެން ނަމަވެސް އޭސީ މިލާނާ ވާދަކޮށް ޔުވެންޓަސް ބަލިވީ ޕެނަލްޓީ ޖަހައިގެންނެވެ .

މި ދެޓީމް ވަނީ 2015 ވަނަ އަހަރުގައި ވެސް އިޓާލިއަން ސްޕަކަޕްގެ ފައިނަލްގައި ވާދަ ކޮށްފައެވެ. އެފަހަރު ލާޒިއޯ 0-2 އިން ބަލިކޮށް ސުޕަކަޕް ކާމިޔާބު ކުރީ ޔުވެންޓަސްއިންނެވެ.