އާންމު މަސްލަޙަތު ކިތަންމެ ބޮޑުވިޔަސް ހެކި ޤަރީނާ ނެތްނަމަ ޖިނާއީ ދަޢުވާއެއް ނުކުރެވޭނެ، އެއީ ޤާނޫނު ދަންނަ ހަމަ: ޝަމީމް

ހެކި ޤަރީނާ ނުލިބޭ މައްސަލަތަކުގައި، ޢާންމު މަސްލަޙަތު ކިތަންމެ ބޮޑުވިޔަސް އެ މައްސަލައެއްގައި މީހެއްގެ މައްޗަށް ޖިނާއީ ދަޢުވާއެއް ނުކުރެވޭނެ ކަމަށާއި، އެއީ ޤާނޫނު ދަންނަ ހަމަ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ޝަމީމް އެހެން ވިދާޅުވީ އޭނާއާ ގުޅޭގޮތުން ހުށަހެޅުނު އިތުބާރު ނެތްކަމުގެ މައްސަލައާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުންނެވެ.

ޝަމީމް ވަކި ކުރަން ހުށަހެޅި ސަބަބުތަކުގެ ތެރޭގައި ވެންޓިލޭޓަރު މައްސަލައިގައި ދައުވާ ނުކުރަން ނިންމެވި ނިންމެވުމެއް ހިމެނެއެވެ.

އެކަމާ ގުޅޭގޮތުން ޝަމީމް ވިދާޅުވީ، އެ މައްސަލައިގައި ދަޢުވާ ނުކުރުމަށް ނިންމާފައިވާނީ، އެ މައްސަލައިގައި ޖިނާއީ ދަޢުވާކުރުމާމެދު ގޮތެއް ނިންމުމަށްޓަކައި ބަލަންޖެހޭ އެންމެހައި ކަންކަމަށް ބެލުމަށްފަހު ކަމަށެވެ.

އެހެންކަމުން އެ މައްސަލައިގައި ދައުވާއެއް ނުކުރެވުމަކީ، އަދި ދައުލަތުން ދޫކުރި ފައިސާގެ ބަދަލުގައި މުދާ ނުލިބުމަކީ، ޢާންމު ރައްޔިތެއްގެ ހައިސިއްޔަތުން ކަންބޮޑުވެވަޑައިގަންނަވާ ކަމެއް ނަމަވެސް، ކަންބޮޑުވުމަކަށް ބިނާކޮށް މީސްމީހުންގެ މައްޗަށް ޖިނާއީ ކުށުގެ ދަޢުވާކުރުމަކީ ޤާނޫނީ ނިޒާމު ދަންނަ ކަމެއް ނޫންކަމަށް ޝަމީް ވިދާޅުވިއެވެ.

ޝަމީމް އިތުރަށް ވިދާޅުވީ، މީހެއްގެ މައްޗަށް ޖިނާއީ ދަޢުވާއެއް ކުރެވޭނީ ޖިނާއީ ކުށް ކަނޑައަޅާފައިވާ ޤާނޫނެއްގައި ޖިނާއީ ކުށެއްކަމަށް ބަޔާންކޮށްފައިވާ ކުށެއްގެ އެންމެހައި އުންޞުރުތައް އެކަށީގެންވާ މިންވަރެއްގެ ޝައްކެއް ނެތި ސާބިތުކޮށްދެވޭ މިންވަރަށް ހެކި ޤަރީނާ ލިބުމުން ކަމަށެވެ.

ޝަމީމް ވިދާޅުވީ، ވެންޓިލޭޓަރުތަކުގެ މައްސަލައިގައި ޖިނާއީ ދަޢުވާއެއް ނުކުރެވިގެން އުޅެނީ، ތުހުމަތުކުރެވޭ އެއްވެސް މީހެއްގެ މައްޗަށް އެ މިންވަރަށް ހެކި ޤަރީނާ، ތަޙްޤީޤަށް ހޯދިފައި ނުވާތީ ކަމަށެވެ.

ޝަމީމް ވިދާޅުވީ، ދައުލަތުގެ ތެރޭގައި އަދި މުޖުތަމަޢުގައި ހިނގާ ވިޔާނުދާ ކޮންމެ ކަމަކީ އެ ކަމަކާ ގުޅިގެން ޖިނާއީ ކުށެއްގެ ދަޢުވާ ކުރެވޭނެ ކަމެއް ނޫން ކަމަށެވެ. އެގޮތުން ޖިނާއީ ދަޢުވާއެއް މީހެއްގެ މައްޗަށް ކުރުމަށްޓަކައި ހެކި ޤަރީނާ ބޭނުންވާނެކަން ފާހަގަ ކުރައްވައި ޝަމީމް ވިދާޅުވީ، އެއީ ޤާނޫނުގައި އެކަން އޮތް ގޮތް ކަމަށާއި، އޭނާ މަސައްކަތް ކުރައްވަނީ މަޖިލީހުންް ފާސްކުރެއްވި ޤާނޫނުތަކުގައި ބަޔާންކޮށްފައިވާ ހަމަތަކާ އެއްގޮތަް ކަމަށެވެ.

ޝަމީމް ވަނީ ވެންޓިލޭޓަރުތަކުގެ މައްސަލައިގައި ދަޢުވާ ނުކުރުމަށް ނިންމި ނިންމުމުގައި، އޭނާ ރިޢާޔަތްކުރަންޖެހޭ ކަންކަމުގެ ތެރެއިން ރިޢާޔަތްނުކޮށް ދޫކޮށްލީ ކޮން ކަމަކަށްކަން މަޖިލީހުން ސާފުކޮށްދިނުމަށް އޭނާ އެދޭކަންވެސް ފާހަގަ ކުރައްވާފައެވެ.