ސްކޭމް މައްސަލަ ހުއްޓުވުމަށްޓަކާ މުއައްސަސާތަކަށް ވެސް ބޮޑެތި ބަދަލުތަކެއް ގެންނަން ޖެހޭ - ޒިޔާދު
20 އޯގަސްޓު 2024 | އަންގާރަ 08:15ބިލު ހުށަހަޅާފައި ވަނީ އެސްއޯއީ ކޮމިޓީގައި ފުލުހުން ދައްކާފައިވާ ވާހަކަތަކަށް ބިނާކޮށް
ވައިކަރަދޫ ދާއިރާގެ މެމްބަރު ޒިޔާދު
ސްކޭމް މައްސަލަ ހުއްޓުވުމަށްޓަކާ މުއައްސަސާތަކަށް ވެސް ބޮޑެތި ބަދަލުތަކެއް ގެންނަން ޖެހޭ ކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
ޖިނާއީ އިޖުރާއަތުގެ ޤާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން, އެ އިސްލާހަށް ޖުމްލަ ގޮތެއްގައި ތާއީދުކުރައްވާ ކަަމަށް ޒިޔާދު ވަނީ ވިދާޅުވެފައެވެ. 19 ވަނަ މަޖިލީހުގައި ވެސް ފުލުހުން ވަނީ ސްކޭމް މައްސަލަ އާއި މެދު ގިނަ ކަންބޮޑުވުންތަކެއް ފާޅުކޮށްފައި ކަމަށް ޒިޔާދު ވިދާޅުވިއެވެ. މުޅި ނިޒާމް ބަދަލުކޮށް ސްކޭމްގެ މައްސަތައް އެއްކޮށް އެ ޤާނޫނުން ނުހުއްޓުވޭނެ ކަމަށް އޭނާ ވިދާޅުވިއެވެ. މިހާރު މެމްބަރުންނަށް އޮތް ކަންބޮޑުވުމަކީ ފުލުހުންނަށް ބޮޑު ބާރެއް ދޭން ޖެހުމުން އެކަމުގެ ކަންބޮޑުވުމުގެ މައްސަލަ ކަމަށް އޭނާ ވަނީ ވިދާޅުވެފައެވެ. އެހާ ބޮޑު ބާރެއް ދޭން އިތުބާރުކުރަން އުނދަނގޫވާ ކަމަށް އޭނާ ފާހަގަކުރެއްވިއެވެ. ޤާނޫނަކުން އެކަނި އެކަން ނުކުރެވޭނެ ކަަމަށާއި އެހެންނަމަވެސް ފުލުހުންނަށް ސްކޭމް މައްސަލަތައް ހައްލުކުރުމުގައި ދިމާވާ ގޮންޖެހުންތައް މަޖިލީހުން ހައްލުކޮށްދޭން ޖެހޭ ކަމަށް އޭނާ ވަނީ ވިދާޅުވެފައެވެ. މިހާރު ޒަމާން ތަރައްޤީ ވެގެން އަންނަ އިރު ޤާނޫނު ހަދާ މަޖިލީހާއި، ނިޒާމަށް ވުރެ ކުރިއަށް ސްކޭމްތައް ހިންގާ މީހުން ވިސްނަމުންދާ ކަމަށް ޒިޔާދު ވިދާޅުވިއެވެ.
ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ، ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބްތިދާއީ ބަހުސް ފެއްޓެވީ އަންގާރަ ދުވަހުއެވެ. މި ބިލު ހުށަހަޅުއްވަމުން މެމްބަރު ވިދާޅުވެފައު ވަނީ މި ބިލުގެ ބޭނުމަކީ ސްކޭމް މައްސަލަތަކުގައި ބޭންކް އެކައުންޓްތަކުން ދައުރުވާ ފައިސާ ކޯޓު އަމުރަކާ ނުލާ ހުއްޓުވޭނެ ޤާނޫނީ ހައްލެއް ހޯދާދިނުން ކަމަށެވެ. އަދި އެއީ އެސްއޯއީ ކޮމިޓީގައި ފުލުހުން ދައްކާފައިވާ ވާހަކަތަކަށް ބިނާކޮށް ހުށަހެޅި ބިލެއް ކަމަށް ބަޔާންކޮށްފައިވެއެވެ.
