ޣައްޒާގެ މެދުތެރޭގެ އަޒް-ޒަވައިދާގައި ތިބި ފަލަސްތީނުގެ ރެފިއުޖީން ތަކަކަށް އިޒްރޭލުން ހޮނިހިރު ވިލޭރޭ ދިން ހަމަލާއެއްގައި މަދުވެގެން 16 މީހުން ޝަހީދުވެފައިވާ ކަމަށް ރިޕޯޓްތައް ބުނެއެވެ.

އަޒް-ޒަވާއިދާ އަށް ދިން ހަމަލާގައި އެއް އާއިލާ އަކަށް ނިސްބަތްވާ 15 މެންބަރުން ޝަހީދުވެފައިވާއިރު، އޭގެ ތެރޭގައި 9 ކުޑަކުދިން ހިމެނެއެވެ.

އިޒްރޭލުގެ ހަމަލާ އަމާޒުކުރެވުނީ ވަގުތީ ހިޔަލެއްގެ ގޮތުގައި ބޭނުން ކުރަމުން ދިޔަ ގުދަނަކަށް ކަމަށް ވަފާ ނިއުސް އޭޖެންސީން ބުނެފައިވެއެވެ. އެ ގުދަނަށް މަދުވެގެން ތިން މިސައިލު އެރި ކަމަށް ވެސް މި ޚަބަރުގައި ވެއެވެ.

އަލްޖަޒީރާއިން ރިޕޯޓުކުރި ގޮތުގައި، ފުލުފުލުގައި ގުދަނަށް މިސައިލްތައް އެރުމުގެ ސަބަބުން އަލިފާން ރޯވެ، އެތަނުގައި ހުރި ހުރިހާ އެއްޗެއް އަނދައިގެން ދިޔައިރު ކުޑަކުދިންތައް ވަނީ ކުދިކުދިވެފައެވެ.

ހަމަލާގައި އެތައް ބަޔަކު ޒަޚަމްވެ، އިތުރު ހަށިގަނޑުތައް ހޯދުމުގެ މަސައްކަތް މިހާރުވެސް ކުރިއަށްދެއެވެ.

އަނެއްކޮޅުން، އިޒްރޭލުން ޣައްޒާގެ އުތުރާއި ދެކުނުގައި ދިރިއުޅޭ ފަލަސްތީން މީހުން އެމީހުންގެ ގެދޮރުން ނުކުމެ އެ ސަރަހައްދުތައް ހުސްކުރުމަށް ވަނީ އަމުރު ނެރެފައެވެ. މީގެ ތެރޭގައި ޣައްޒާގެ ދެކުނުގައި، ކުރިން "ރައްކާތެރި ސަރަޙައްދު" ކަމަށް ކަނޑައަޅާފައިވާ ތަންތަނުން މީހުން ނުކުތުމަށް ވެސް ވަނީ އަމުރު ކޮށްފައެވެ.

އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކަން އިޒްރޭލަށް ދަތުރުކުރައްވާ ގޮތައް ވަނީ ހަމަޖެހިފައެވެ. މިއީ ޣައްޒާގެ ހަނގުރާމަ ހުއްޓުވުމަށް ކުރެވޭ ޑިޕްލޮމެޓިކް މަސައްކަތްތައް ކުރިއަށް ގެންދިއުމަށް ކަމަށް މީޑިއާ ރިޕޯޓްތައް ބުނެއެވެ. ތިން ދުވަހުގެ މުއްދަތައް ގަތަރުގައި ކުރިއަށް ދިޔަ ސުލްހައިގެ މަޝްވަރާތަކަށް ފަހު ހުކުރު ދުވަހު ޤަތަރު، މިސްރު އަދި އެމެރިކާއިން ނެރުނު ގުޅިފައިވާ ބަޔާނުގައި ބުނެފައިވަނީ އެންމެ ފަހުގެ މަޝްވަރާތައް "ސީރިއަސް އަދި ބިނާކުރަނިވި" ކަމަށެވެ.

އިޒްރޭލުން ޣައްޒާއަށް އަރާ ދެމުންދާ ހަމަލާތަކުގައި މަދުވެގެން 40,005 މީހުން މަރުވެ، 92,401 މީހުންނަށް އަނިޔާވެފައިވެއެވެ.