ފަރަންސޭސިވިލާތާއި، ޖަރުމަނުވިލާތާއި އިނގިރޭސިވިލާތުން އީރާނާއި އީރާނުގެ އެކުވެރިން އިޒްރޭލަށް ދޭން އުޅޭ ހަމަލާ ނުދިނުމަށް އެދިއްޖެ

ޔޫރަޕްގެ އިއްތިހާދުގައި ހިމެނޭ ފަރަންސޭސިވިލާތާއި، ޖަރުމަނުވިލާތާއި އަދި އިނގިރޭސިވިލާތުން، އީރާނާއި އިރާނުގެ ބައިވެރިން އިޒްރޭލަށް ދޭން ބުނާ ހަމަލާ ނުދިނުމަށް ގޮވާލައިފިއެވެ.

ހަމާސްއާއި ހިޒްބުﷲގެ އިސްވެރިންތަކެއް އަވަހާރަ ކޮށްލުމާ ގުޅިގެން އީރާން އާއި ހިޒްބުﷲ އިން އިޒްރޭލަށް ބަދަލު ހިފުމުގެ ގޮތުން ހަމަލާ ދިނުމަށް ތައްޔާރުވަމުންދާ ކަމަށް ބުނެފައި ވުމާއެކު މުޅި މެދުއިރުމަތީގައި ފުރިހަމަ ހަނގުރާމައެއް ފެށިދާނެ ކަމުގެ ނުތަނަވަސްކަން ވަނީ ވަރަށް ބޮޑު ވެފައެވެ.

ވިލާތުގެ ތިން ގައުމުގެ ވެރިން ހޯމަ ދުވަހު ނެރުއްވި ގުޅިފައިވާ ބަޔާނުގައި ސަރަހައްދުގައި ހަމަޖެހުން ގާއިމް ކުރުމަށާއި، މަސްރަހް ފިނިކުރުމަށް ގޮވާލުމުގެ އިތުރުން، ގަޒާ ގައި ހިނގަމުންދާ ހަނގުރާމަ ވަގުތުން ހުއްޓާލުމަށް ވެސް ގޮވާލައްވާފައިވެއެވެ.

އީރާނުންނާ ހިޒްބުﷲ އިން އިޒްރޭލަށް ހަމަލާއެއް ދީފިނަމަ މުޅި ސަރަހައްދު ހަމަ ނުޖެހުމުގެ ތެރެއަށް ވެއްޓިދާނެ ކަމަށް ބުނެ ދުނިޔޭގެ ބާރުގަދަ ގައުމުތަކުން މެދު އިރުމަތީގެ ހަމަޖެހުމަށް ގޮވާލަމުން ދާއިރު، އިޒްރޭލުން ޣައްޒާއަށް ދެމުންގެންދާ ހަމަލާތައް ހުއްޓުމެއްނެތި ކުރިއަށްދެއެވެ.

"އަޅުގަނޑުމެން އީރާނާއި އީރާނުގެ އެކުވެރިންނަށް ގޮވާލަނީ ސަރަޙައްދުގެ ކަންކަން އިތުރަށް ގޯސްވެ، ހަނގުރާމަ ހުއްޓާލުމާއި ރަހީނުން ދޫކޮށްލުމުގެ ފުރުސަތު ގެއްލިދާފަދަ ކަމަކަށް މަގުފަހިވެދާނެ އެއްވެސް ހަމަލާއެއް ނުދިނުމަށެވެ،" ފަރަންސޭސިވިލާތުގެ ރައީސް އެމެނުއެލް މެކްރޯނާއި، ޖަރުމަނުވިލާތުގެ ޗާންސެލަރ އޯލަފް ޝޯލްޒާއި އަދި އިނގިރޭސިވިލާތުގެ ބޮޑުވަޒީރު ކީ ސްޓާމަރ ސޮއި ކުރައްވާފައިވާ ބަޔާނުގައިވެއެވެ.

އެމެރިކާއާއި، ޤަޠަރާއި އަދި މިސްރު ގުޅިގެން އިޒްރޭލުން ގާޒާ ގައި ހިންގަމުންދާ 10 މަސްދުވަސްވެފައިވާ ހަނގުރާމަ ނިންމުމަކަށް ގެނައުމަށް ކުރަމުންދާ މަސައްކަތަށް ތާއީދު ކުރައްވާ ކަމަށް ތިން ވެރިންގެ ބަޔާނުގައި ވެއެވެ.

"މިހާރުން މިހާރަށް ހަނގުރާމަ ހުއްޓަންޖެހެއެވެ. އަދި ހަމާސްއިން ހިފަހައްޓާފައި ތިބި ހުރިހާ ރަހީނުން ދޫކޮށްލަންޖެހެއެވެ،" ބަޔާނުގައި ވެއެވެ.

ޣައްޒާގެ ރައްޔިތުންނަށް ބޭނުންވާ އެހީ އެއްވެސް ހުރަހެއްނެތި އަވަހަށް ފޯރުކޮށްދީ އެހީ ބެހުމުގެ ކަންކަން ހަމަ ޖެއްސުމަށްވެސް ބަޔާނުގައި ވެއެވެ.

މަސްރަހް ހޫނުވަމުންދާއިރު އެމެރިކާގެ ދިފާއީ ވަޒީރު އިސްރާއީލުގެ ދިފާއީ ވަޒީރާ ކުރެއްވި މަޝްވަރާ ތަކަށް ފަހު ޕެންޓަގަނުން ނެރުނު ބަޔާނެއްގައި ބުނެފައިވަނީ، މަތިންދާބޯޓު އުފުލާ މަނަވަރު ޔޫއެސްއެސް އަބްރަހަމް ލިންކަން މެދުއިރުމައްޗަށް ފޮނުވުން އަވަސް ކުރުމަށް ޕެންޓަގަން އަށް އެމެރިކާގެ ދިފާއީ ވަޒީރު އަންގަވާފައި ވާކަމަށެވެ.

އަނެއްކޮޅުން ގައިޑެޑް މިސައިލް ސަބްމެރިން މެދުއިރުމައްޗަށް ފޮނުވުމަށް އާދިއްތަ ދުވަހު އެމެރިކާ އިން ނިންމި ކަން ވަނީ ހާމަ ކޮށްފައެވެ.

ދިފާއީ ވަޒީރު އޮސްޓިން ވަނީ އިސްރާއީލް ދިފާއު ކުރުމަށް ކުރެވެން ހުރި ހުރިހާ ކަމެއް ކުރުމަށް އެމެރިކާ އިން ތައްޔާރަށް އޮތް ކަމަށް ވިދާޅުވެފައި ކަމަށް ޕެންޓަގަންގެ ބަޔާނުގައި ވެއެވެ.

ޔޫރަޕްގެ ތިން ގައުމުން ހަނގުރާމަ އާ އެކަހެރިވުމަށް އީރާނަށާއި އީރާނުގެ ބައިވެރިންނަށް ގޮވާލާ ބަޔާނެއް ނެރުނު އިރު، ފަލަސްތީންގެ ހަނގުރާމަ ހުއްޓާލާ ސުލްހަ ގާއިމް ކުރުމަށް މަޝްވަރާ ކުރުމަށް ހަމާސް އަށާއި އިޒްރޭލަށް ގޮވާލާ އެމެރިކާ އާއި މިސްރާއި ގަތަރުގެ އެންމެ އިސްވެރިން ވަނީ ބަޔާނެއް ނެރުއްވާފައެވެ.

ސުލްހަ ގާއިމް ކުރުމަށް ބަޔާން ނެރުނު ޖަރުމަނުވިލާތާއި ފަރަންސޭސި ވިލާތަކީ އިޒްރޭލަށް ހަތިޔާރު ފޯރުކޮށްދޭ ދެ ގައުމެވެ. ބަޔާނުގައި ސޮއި ކޮށްފައިވާ އިނގިރޭސިވިލާތުން ވެސް މިހާތަނަށް ދިޔައީ އިޒްރޭލަށް ހަތިޔާރު ފޯރުކޮށްދެމުންނެވެ. އެހެން ނަމަވެސް އިޒްރޭލަށް ހަތިޔާރު ވިއްކުން އައު ސަރުކާރުން ރިވިއުކުރަނީ ކަމަށް ބުނެ މިވަގުތު އޮތީ މެދުކަނޑާލާފައެވެ.