ގުޅީފަޅުން ބިން ލިބުނު މީހުންނަށް ބިން ހަވާލު ކުރެވޭނެ ވަކި ތާރީޚެއް ނޭނގޭ: މިނިސްޓަރު ހައިދަރު
12 އޯގަސްޓު 2024 | ހޯމަ 08:31ކަންމުޑި ޖަހައިގެން ވެސް އެ ކަންމުޑިތައް އެތާ ހުންނާނެ ކަމުގެ ޔަގީން ކަމެއް ނެތް
ރައްޔިތުން މަޖިލީހުގެ ޖަލްސާގައި ހައުސިން މިނިސްޓަރު ޑރ.އަލީ ހައިދަރު ވާހަކަދައްކަވަނީ
ގުޅީފަޅުން ބިން ލިބުނު މީހުންނަށް ބިން ވަކިކޮށް ހަވާލު ކުރެވޭނެ ވަކި ތާރީޚެއް ނޭނގޭ ކަމަށް ހައުސިން މިނިސްޓަރު ޑރ.އަލީ ހައިދަރު ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގެ ޖަލްސާގައި މެންބަރަކު ކުރި ސުވާލަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ގުޅީފަޅުން ބިން ލިބުނު މީހުންނަށް ބިން ވަކިކޮށް ހަވާލު ކުރެވޭނެ ވަކި ތާރީޚެއް ނޭނގޭ ކަމަށާއި، މިހާރުގެ ހާލަތުގެ ގޮތުން ބިން ކަނޑައަޅާ ކަންމުޑި ޖެހިދާނެ ކަމަށެވެ. ނަމަވެސް ތިލަމާލެ ބްރިޖުގެ މަސައްކަތްތައް ކުރިއަށްދާތީ ކަންމުޑި ޖަހައިގެން ވެސް އެ ކަންމުޑިތައް އެތާ ހުންނާނެ ކަމުގެ ޔަގީން ކަމެއް ނެތް ކަމަށް މިނިސްޓަރު ހައިދަރު ވިދާޅުވިއެވެ.
ގުޅީފަޅުގެ ބިން އެއްކޮށް ހިއްކާ ނުނިމޭކަން ފާހަގަކުރައްވައި މިނިސްޓަރު ހައިދަރު ވިދާޅުވީ ބްރިޖުގެ މަސައްކަތަށް އެސައިޓު ވަރަށް ބޮޑަށް ބޭނުންކުރަމުންދާ ކަމަށެވެ. އަދި އެސައިޓު ހުސްކުރެވޭނެ ކަމަށް މައުލޫމާތު ލިބެނީ ސެޕްޓެންބަރު މަހުގެ ތެރޭގައި ކަމަށެވެ.
ގުޅީފަޅު ހިއްކާ ނުނިމޭ ކަމަށް މިނިސްޓަރު ހައިދަރު ވިދާޅުވިއިރު، އެ ސަރަހައްދަކީ ރައީސް ޑރ.މުހައްމަދު މުއިއްޒު ގުޅީފަޅަށް އިތުރުކުރަން ނިންމި ސަރަހައްދެވެ. ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ގޯތި ދީފައިވާ ސަރަހައްދު ވަނީ އެޕްރީލް މަހުގެ ތެރޭގައި ހިއްކާ ނިންމާފައެވެ.
ގޯތި ދޫކުރުން މިސަރުކާރުން ލަސްކުރަމުންދާތީ ގިނަ އަދަދެއްގެ އާއްމު ރައްޔިތުން ދަނީ ކަންބޮޑުވުންފާޅުކޮށް ސިލްސިލާ މުޒާހަރާތައް ވެސް ކުރަމުންނެވެ.
