ފ.އަތޮޅު ވޮލީ މުބާރާތް: ފީއަލީ ދެ ޓީމަށް ވެސް ރަނގަޅު ފެށުމެއް

ފ.އަތޮޅުގެ ރަށްތަކަށް ހުޅުވާލައިގެން ކުރިއަށް ގެންދާ، ފ.އަތޮޅު ވޮލީ ބޯޅަ މުބާރާތުގައި ކުޅުނު ފުރަތަމަ ދެ މެޗުން ވެސް މޮޅުވެ ފީއަލީގެ ފިރިހެން ޓީމާއި އަންހެން ޓީމުން މުބާރާތުގެ ފެށުން ރަނގަޅު ކޮށްފި އެވެ.

ފ.މަގޫދޫ އައުޓްޑޯ ވޮލީ ކޯޓުގައި މުބާރާތް ފަށާފައި ވަނީ ހޮނިހިރު ދުވަހުގެ ހަވީރު އެވެ. މުބާރާތުގެ ފުރަތަމަ މެޗުގައި ފިރިހެން ޑިވިޝަން އިން ވާދަކޮށްފައި ވަނީ ފީއައްޔާއި، ބިލެތްދޫ އެވެ. އެ މެޗު ފީއަލިން ކާމިޔާބު ކޮށްފައި ވަނީ ތިން ސެޓު އެއް ސެޓުންނެވެ. މެޗުގެ ފުރަތަމަ ދެ ސެޓު ކާމިޔާބު ކުރީ ފީއަލީންނެވެ. އެއީ 25-21 އަދި 25-19 އިންނެވެ. ތިން ވަނަ ސެޓުގައި ވާދަވެރި ކުޅުމެއް ފެނުނުއިރު، ބިލެތްދޫ އިން ވަނީ 21-25 އިން މި ސެޓު ކާމިޔާބު ކޮށްފަ އެވެ. ނަމަވެސް ހަތަރު ވަނަ ސެޓު 25-14 އިން ކާމިޔާބުކޮށް ފީއަލި ވަނީ މެޗުން މޮޅުވެފަ އެވެ.

މުބާރާތުގެ އަންހެން ޑިވިޝަންގެ ފުރަތަމަ މެޗުގައި ހޮނިހިރު ދުވަހުގެ ރޭ ފީއަލި ނިކުތީ ބިލެތްދޫއާ ދެކޮޅަށެވެ. އެ މެޗު ފީއަލީ ޓީމުން ކާމިޔާބު ކޮށްފައި ވަނީ ސީދާ ތިން ސެޓުންނެވެ. މެޗުގެ ސެޓުތައް ފީއަލީ ޓީމުން ކާމިޔާބު ކޮށްފައި ވަނީ، 25-10، 25-12، އަދި 25-18 އިންނެވެ.

މިއީ ފ.އަތޮޅުގެ ރަށްތަކަށް ހުޅުވާލައިގެން ފ.އަތޮޅު ކައުންސިލުން ކުރިއަށް ގެންދަމުން އަންނަ މުބާރާތެކެވެ. މުބާރާތުގައި އާދިއްތަ ދުވަހުގެ ހަވީރު އަދި ރޭގަނޑު ވެސް މެޗުތައް ކުޅޭނެ އެވެ.