ދެކުނު ގާޒާ އިން ފަލަސްތީން މީހުން ފައިބަން އިޒްރޭލުން އަންގައިފި

ދެކުނު ގާޒާ ގައި ދިރިއުޅޭ ފަލަސްތީން މީހުން އެ ސަރަހައްދުން ފައިބަން އިޒްރޭލް ސިފައިން އަމުރު ކޮށްފިއެވެ.

މި އަމުރު ކުރީ ގާޒާ ސިޓީގެ ގެދޮރުގެއްލިފައިވާ ފަލަސްތީން މީހުން ވަގުތީ ހިޔަލެއްގެ ގޮތުގައި ބޭނުން ކުރާ ސްކޫލަކަށް މީހުން ފަތިސް ނަމާދަށް ތިއްބާ އިޒްރޭލުން ބޮން އަޅާ 100 ށް ވުރެ ގިނަ ފަލަސްތީން މީހުން ޝަހީދު ކޮށްލިތާ ސައުވީސް ގަޑީއިރުވެސް ނުވަނީހެވެ.

ގާޒާ ސިޓީގެ ތާބިއީން ސްކޫލަށް ބޮން އެޅި އިރު ސްކޫލްގެ ނަމާދު ކުރާ ބަޔަށްވެސް ޓާގެޓް ކޮށް ބޮން އަޅާފައިވާކަން ރިޕޯޓްތަކުގައި ފާހަގަ ކޮށްފައިވެއެވެ.

ގާޒާގެ ސްކޫލަކަށް ހޮނިހިރު ދުވަހު އިޒްރޭލުން ހަމަލާދީ ހިންގި ގަތުލުއާއްމު އެތައް ގައުމަކުން ވަނީ ކުށްވެރިކޮށްފައެވެ. އަލްޖީރިއާ އިން ވަނީ މި ހަމަލާ އާ ގުޅިގެން އދ ގެ ސެކިއުރިޓީ ކައުންސިލްގެ ބައްދަލުވުމެއް ބޭއްވުމަށް އެދި ހުށަހަޅާފައެވެ.

ގާޒާގެ ސްކޫލަކަށް ދިން ހަމަލާ އާ ބެހޭ ގޮތުން އިޒްރޭލުން ބުނެފައިވަނީ، އެއީ ހަމާސް ޓެރަރިސްޓުންގެ ކޮމާންޑް އެންޑް ކޮންޓްރޯލް ސެންޓަރެއް ކަމަށެވެ.

ހަމާސް އިން އިޒްރޭލް ގެ އެވާހަކަ އަށް ރައްދު ދެމުން ހަމާސް އިން ބުނެފައިވަނީ އެ އިމާރާތުގައި އެއްވެސް ހަނގުރާމަވެރިއެއް ނޫޅޭ ކަމަށެވެ. އަދި އެއީ ފަލަސްތީންގެ މައުސޫމް ރައްޔިތުން މެރުމަށް އިޒްރޭލުން ދައްކާ ބަހަނާ އެއް ކަމަށެވެ.

ޚާން ޔޫނިސް އަށް އިޒްރޭލް ސިފައިން އަރާ ފަލަސްތީން ރައްޔިތުންނަށް އަނިޔާ ދެމުން ދާއިރު، އަލް-ޖަޒީރާ އިން ބުނެފައިވާ ގޮތުގައި އިޒްރޭލުން ހިފާފައިވާ ހުޅަނގު އައްސޭރީގެ އަވަށްތަކަށް ވެސް އިޒްރޭލް ސިފައިން އަރާ ގެންދަނީ ރެއިޑް ކުރަމުންނެވެ.

އަނެއްކޮޅުން ހޮނިހިރު ދުވަހު އިޒްރޭލުގެ ހައިފާ އާއި ތެލް އަވީވް ގައި އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އާ ދެކޮޅަށް އިޒްރޭލް ރައްޔިތުން ވަނީ މުޒާހަރާ ކޮށްފައެވެ. މުޒާހަރާ ކުރި މީހުން އިޒްރޭލް ސަރުކާރުން ގާޒާ ގައި ހިންގަމުންދާ ހަނގުރާމަ ކުރިއަށް ގެންދާ ގޮތާ މެދު ނުރުހުން ފާޅު ކޮށް، ހަމާސް އިން ރަހީން ކޮށްފައިވާ އިޒްރޭލު ރައްޔިތުން މިނިވަން ކުރުމުގައި ނަތަންޔާހޫ ސަރުކާރުން ނުކުޅެދިފައިވާ ކަމަށް ބުނެފައިވެއެވެ. ރަހީނުން މިނިވަން ކުރުމުގެ އެއްވެސް ގަސްދެއް ނަތަންޔާހޫގެ ސަރުކާރުގައި ނެތް ކަމަށްވެސް މުޒާހަރާގެ ބައިވެރިން ބުނެފައިވާ ކަމަށް އަލް-ޖަޒީރާ އިން ހާމަކޮށްފައިވެއެވެ.

އިޒްރޭލުން ގާޒާ ގައި ހިންގާ އަނިޔާވެރި ހަނގުރާމާގައި މިހާތަނަށް ފަލަސްތީނުން ޝަހީދުވި މީހުންގެ އަދަދު 39،790 ށް ވަނީ އަރާފައެވެ. ޒާގާ ގެ ހެލްތް މިނިސްޓްރީ އިން ބުނާ ގޮތުގައި އިޒްރޭލުގެ ހަމަލާތަކުގައި ޒަޚަމްވި މީހުންގެ އަދަދު 92،002 ށް ވަނީ އަރާފައެވެ.

ހަނގުރާމަ ހުއްޓާލުމާ ބެހޭ ވާހަކަތަކަށް އެމެރިކާ އާއި ގަތަރާއި މިސްރުން ހަމާސް އަށް ދައުވަތު ދީފައިވާ ކަމަށާއި، އެ ގައުމުތަކުން ހުށަހަޅާފައިވާ ހުށަހެޅުން ދިރާސާ ކުރަމުންދާ ކަމަށާއި ހަމާސް އިން އެކަމުގައި ނިންމާ ގޮތެއް ފަހުން ހާމަ ކުރާނެ ކަމަށް ހަމާސް އިން ބުނެފައިވެއެވެ.